Pag-atubang sa mga Hagit sa Kinabuhi ug sa Hugot nga Pagtuo
Tibuok Kalibotan nga Debosyonal alang sa mga Young Adult
Dominggo, Nobiyembre 19, 2023
Elder Quentin L. Cook: Samtang si Mary ug ako mirebyo sa pangutana bahin sa pag-atubang sa mga hagit sa kinabuhi ug sa pagtuo, among giila nga ang tanan nga henerasyon mag-atubang og mga hagit nga mosangpot ngadto sa usa ka hagit sa ilang pagtuo. Kon kita mosiksik sa mga kasulatan ug morebyo sa mga pakigsabot sa Dios ngadto sa Iyang mga anak, duha ka tema ang gihatagan og gibug-aton.
Una, tungod kay adunay katugbang sa tanang butang ug adunay kaaway kinsa dili gusto nga kita magbaton og hugot nga pagtuo diha sa Dios, ang matag henerasyon kinahanglan modiskobre ug makaangkon sa ilang kaugalingon nga kahibalo ug pagpamatuod sa Dios.
Ikaduha, matag henerasyon kinahanglan makasabot kinsa sila ug sa ilang mahangtoron nga pagkatawo. Kining duha lisod sabton tungod kay ang kaaway dili gusto nga kamo makabaton og klaro nga pagsabot sa Dios, ang Amahan ug ni Jesukristo ug sa Ilang plano sa kalipay alang kaninyo ug kon si kinsa kamo ngadto Kanila.
Niadtong mga 1960, si Mary ug ako mga young adult pa. Ako migradwar gikan sa Stanford Law School ug misugod sa pagpangabogado. Si Mary nakahuman og kurso sa master didto sa Stanford ug usa ka batan-ong inahan. Ang mga hagit sa kinabuhi ug sa pagtuo ug ang katilingbanon nga mga pagbalda lahi kaniadto apan susama kaayo sa unsay giatubang sa mga young adult karon.
Mary, unsa man ang pipila sa mga hagit nga anaa niadtong panahona?
Sister Mary Cook: Usa ka dakong kultura nga nagdasig sa mga tawo sa paggamit og druga popular kaayo, ilabi na sa San Francisco Bay Area diin kami nagpuyo. Ang dagko nga mga riot ug mga protesta bahin sa mga problema sa katilingban komon. Ang pag-apil sa Estados Unidos sa panagbangi didto sa Vietnam dili kaayo maayo, ug ang mga nagprotesta nga mga estudyante miparalisa sa mga unibersidad. Ug kana nakaapekto gayod kanako, imbis sa tradisyonal nga maanindot nga huni sa musika nga ang magtiayon mag-atubangay kon manayaw, ang musika nausab. Kusog na ang tugtog ug saba kaayo—ug ang mga tawo magbulag na sa pagpanayaw.
Sa tibuok kalibotan, ang pipila niini nga mga hagit ug daghan pa ang gigamit sa pag-atake sa relihiyon sa kinatibuk-an ug sa pagtuo diha sa Dios.
Elder Cook: Niadtong Abril 8, 1966, sa Time magasin, diin adunay daghan pang mobasa nianang higayona, mipili isip nag-una nga istorya nga gibutang sa hapin niini kining makapasuko ug walay pagtahod nga ulohan: “Patay ba ang Dios?”
Diha sa pangbukas nga sulat gikan sa tigmantala sa magasin, iyang gipasabot nga ang ideya miabot tungod sa “nagkadako nga problema tali sa mga tiyolohikanhong mga tawo mahitungod sa Dios ug sa kalibotan nga mibulag sa tinuohan niadtong mga tunga-tunga sa 1960.”1 Ang sulod sa artikulo kasagaran dili relihiyoso ug wala maghisgot og relihiyon o pagtuo sa makatagbaw nga paagi.2
Siyempre, ang mga pangutana sa hugot nga pagtuo dili lang niadtong mga 1960 o karon. Kini anaa sa kanunay. Sa dihang si Apostol Pablo mibisita sa Atenas, misulay siya sa pagtudlo bahin sa Pagkabanhaw ni Jesukristo. Sa iyang paningkamot atong mabasa diha sa Mga Buhat, “Ang tanan nga mga taga-Atenas ug mga dumuloong nga nagpuyo didto wala man lamay laing mahimo, kondili ang pagtabi, o pagpaminaw sa bag-ong butang nga mahiabot.”3
Dili ba kini mura og ang social media nga kalibotan sa karong panahona?
Sa dihang ang mga tawo nakaamgo sa yanong relihiyoso, nakabase sa hugot nga pagtuo nga kinaiya sa mensahe ni Pablo, lakip sa iyang pagpamatuod ni Jesukristo, sila misalikway niini.
Agi og dugang sa pagtuo sa Dios, ang kabalaka mahitungod sa atong tinuod nga pagkatawo gihagit usab sa tibuok nga natala nga kasaysayan. Dili namo tumong ang pagtubag sa tanan nga mga problema nga may kalabotan sa pagkatawo sa karon nga kalibotan. Apan ang tubag kanunayng mao gihapon. Kitang tanan espiritu nga mga anak sa sama nga mahigugmaong Langitnong Amahan. Si Presidente Russell M. Nelson namulong niini sa makatandog kaayo nga paagi. Siya mihatag og gibug-aton sa tulo ka malahutayon nga mga titulo: “anak sa Dios,” “anak sa pakigsaad,” ug “disipulo ni Jesukristo.”4
Siya miawhag usab kanato nga dili manghingalan sa atong kaugalingon o manghingalan sa uban. Daghan sa mga problema nga atong giatubang masulbad kon kita moila sa atong kaugalingon isip mga anak sa mahigugmaong Langitnong Amahan.
Kadtong kinsa nagtinguha sa pagguba sa pagtuo kanunayng nagmatuod nga ang pagtuo wala nay kalabotan. Sayop kaayo silang mipili sa ilang personal nga mga pagpihig, kabahin sa mga problema sa katilingban karon sa pagpuli sa pagpadayag nga hinatag sa Dios ug sa mga kasugoan. Sila miasumer ug nagmatuod nga ang dakong gidaghanon sa mga tawo adunay samang sosyal nga mga gusto ug dili na mga matinud-anon nga mga miyembro.
Alang sa inyong kasayoran, ang kabatan-onan ug mga young adult wala magka dili aktibo o mobiya sa Simbahan nga nagkadaghan kay sa nangagi, sumala sa gipalakaw og maayo. Ang gidaghanon sa mga misyonaryo nga gitawag sa pagserbisyo dako kaayo ang pagsaka. Ang porsiyento sa pag-apil sa simbahan alang sa nagtubo nga henerasyon nagpakita og padayon nga pagsaka.5 Dugang pa, ang gidaghanon sa mga young adult nga nagtambong sa institute nagkadaghan usab.
Palihog sabta nga ako wala nanaway niadtong adunay mga pagduda; apan, ako nagsugyot nga importnate ang kon giunsa ninyo pag-atubang niini. Ang tubag niini nga hagit mao ang ebanghelyo ni Jesukristo. Ako mosaad kaninyo: kon kamo matinud-anon nga mobasa sa mga kasulatan, mag-ampo, ug magbaton og relihiyoso nga pagsunod diha sa inyong kinabuhi, kamo, sa paglabay sa panahon, makakaplag og mga tubag sa inyong mga pangutana ug makasulbad sa mga pagduhaduha nga mahimong motumaw gikan sa matag karon ug unya.
Usa sa akong paborito nga mga asoy sa kasulatan makit-an diha sa ebanghelyo ni Marcos mahitungod sa amahan nga gusto nga ang iyang anak nga lalaki maluwas gikan sa daotan nga espiritu. Sa asoy sa kasulatan ang Manluluwas mahinungdanong nangutana sa amahan kon siya mituo ba nga ang iyang anak mamaayo. Ang amahan, nga luhaan ang mga mata, miingon, “[Ginoo], nagatuo ako; tabangi ang pagtuo ko nga nakulangan.”6 Kini madawat ngadto sa Ginoo, ug Siya mibadlong sa espiritu ug miayo sa anak nga lalaki.
Ang leksiyon mao nga dili itugot ang pagduhaduha o kawalay pagtuo nga mobuntog sa atong pagtuo. Ang makugihon nga pagtuon sa kasulatan, sinsero nga pag-ampo, tinuyo nga relihiyoso nga pagsunod, ug pagsunod sa mga tambag sa propeta sa Ginoo makatugot kaninyo sa pagbuntog sa mga hagit sa pagtuo.