Gugma ug Pagkahisakop
Tibuok Kalibotan nga Debosyonal alang sa mga Young Adult
Dominggo, Nobiyembre 19, 2023
Elder Quentin L. Cook: Ang pangutana mahitungod sa gugma ug pagkahisakop may kalabotan kaayo sa pag-atubang sa mga hagit sa kinabuhi ug hugot nga pagtuo. Mary, mahimo ba nimong hisgotan kining importante nga pangutana?
Sister Mary Cook: Kitang tanan mga anak sa Dios, ug kita nahisakop sa gipahiuli nga Simbahan ni Jesukristo sa mga Santos sa Ulahing mga Adlaw. Dili igsapayan sa atong lainlaing mga sitwasyon, kitang tanan nahisakop.
Klaro diha sa mga kasulatan nga ang Dios nahigugma sa tanan sa Iyang espiritu nga mga anak ug ang tanan managsama ngadto sa Dios ug ang tanan nahisakop.
Sa 2 Nephi 26:33 mabasa kini, sa usa ka bahin, “Siya nagdapit kanilang tanan sa pagduol ngadto kaniya ug sa pag-ambit sa iyang kaayo; ug siya wala maglimod kang bisan kinsa nga moduol ngadto kaniya, itom ug puti, ulipon ug gawasnon, lalaki ug babaye; … ug ang tanan managsama ngadto sa Dios.”
Tungod kitang tanang espiritu nga mga anak sa Dios, kita adunay espirituwal nga pagkatawo, ug kita mokanta niini sa “Ako Anak sa Dios.”1
Pipila ka tuig kaniadto, sa dihang nagpuyo kami diha sa California Bay Area, ang mga young adult ug mas magulang nga kabatan-onan mikanta ug miapil sa pasundayag sa Oakland California Temple nga giulohan og “Ug Kini Nahinabo.” Usa ka awit mahitungod sa atong espirituwal nga pagkatawo. Giulohan kini og “Kinsa Ako?” Kini nangutana “Nganong ania kita dinhi?” ug “Asa kita paingon?”
Ang awit natapos uban niining gamhanan nga tubag:
Kini mao kinsa ako.
Ang akong espiritu nagpuyo uban sa akong Amahan sa wala pa naporma ang yuta.
Gipili nako ang dalan nga sundon sa dihang nahuman ang akong kinabuhi sa wala pa dinhi sa yuta.
Mianhi ako sa yuta alang sa usa ka lawas nga gihimo sama sa akong Amahan
Aron sa paghiusa sa akong espiritu ug lawas aron sa paghimo sa akong kalag nga diosnon.
Kini mao kinsa ako:
Ako usa ka anak sa akong amahan … sa langit.
Kini mao kinsa ako. …
Ako anak sa Dios.
Ang tanan nga miapil adunay usa ka pagsaksi sa Espiritu nga sila nanganta sa kamatuoran.
Elder Cook: Miaging bulan, si Mary ug ako didto sa Ephesus sa Turkey uban sa mga lider sa misyon alang sa dakong bahin sa Europe. Si Apostol Pablo mipuyo ug mitudlo didto. Usa sa iyang mga sulat ngadto sa mga Taga-Efeso naglangkob og gamhanan nga pamahayag: “Busa, kamo karon dili na mga langyaw ug mga dumuloong, kondili mga katagi-lungsod sa mga balaan ug mga sakop sa panimalay sa Dios.2
Kitang tanan nahisakop!
Sister Cook: Si A. A. Milne misulat og usa ka libro mahitungod sa bulawanon, ganahan og dugos nga oso nga gitawag nga si Winnie-the-Pooh.
Diha sa usa ka paglakaw uban sa iyang higala nga si Piglet, si Piglet nangutana kang Pooh, “Unsaon pag-espeling sa gugma?” Si Pooh mitubag, “Dili nimo kini espelingon. Mabati nimo kini.”
Diha sa app sa pagtuon sa kasulatan diha sa Gospel Library, ang kinatibuk-ang pagpasabot alang sa “Gugma” mabasa, “Ang gugma usa ka lawom nga debosyon, pakabana, ug pagbati. Ang labing mahinungdanong ehemplo sa gugma sa Dios alang sa Iyang mga anak makita diha sa walay kinutoban nga Pag-ula ni Jesukristo. Ang gugma alang sa Dios ug sa isigkatawo maoy usa ka kinaiya sa mga disipulo ni Jesukristo.”3
Sa Juan 3:16 atong mabasa, “Kay gihigugma pag-ayo sa Dios ang kalibotan ug tungod niini gihatag niya ang iyang bugtong Anak, aron ang tanan nga motuo kaniya dili malaglag kondili makabaton hinuon sa kinabuhing dayon.”
Sa dihang si Jesukristo mianhi dinhi niini nga yuta sa tunga-tunga sa panahon, Siya mitudlo kanato:
“Higugmaa ang Ginoo nga imong Dios sa tibuok mong kasingkasing, sa tibuok mong kalag ug sa tibuok mong hunahuna.
“Kini ang labing dako ug labing importanteng sugo.
“Ug ang ikaduha susama ra, Higugmaa ang imong silingan sama sa imong kaugalingon.”4
Atong ipakita ang atong gugma alang sa Dios nga Amahan ug kang Jesukristo pinaagi sa pagsunod sa Ilang mga sugo. Kini mao ang atong buhat.
Ipakita nato ang atong gugma ngadto sa tanang anak sa Dios pinaagi sa pagpangalagad ngadto kanila ug sa aktibong pagsunod sa ebanghelyo—pinaagi sa paghimo sa misyonaryo nga buhat samtang kita mohigugma, mopakigbahin, ug modapit sa uban nga “moduol ngadto kang Kristo.” Ipakita nato ang atong gugma alang sa pamilya pinaagi sa pagtuman sa atong mga pakigsaad sa templo ug pahimo sa buhat sa templo alang sa atong mga katigulangan.
Karon, pagmatinuoron sa inyong kaugalingon. Pangutana: Ang akong mga aksiyon ba nagpakita og gugma alang sa Langitnong Amahan ug ni Jesukristo? Gitabangan ba nako ang uban sa akong palibot nga motuo? Kon giakusahan ko sa pagkahimong usa ka Kristiyano, aduna bay igong ebidensiya sa pagkombikto kanako?
Ang balak nga “Outwitted” ni Edwin Markham mabasa:
Mihimo siya og lingin nga kanako mipagula—
Irihis, rebelde, butang nga angayang ibaliwala.
Apan ang Gugma ug Ako dunay pagbati nga modaog:
Mihimo kami og lingin nga kaniya mipasulod!
Magmahimo kitang tinuod nga mga disipulo ug mga tigpasiugda og kalinaw. Itugot nga ang tiunay nga gugma ni Kristo mopuyo sa atong mga kasingkasing samtang ipakita nato sa atong mga aksiyon ang atong gugma alang sa Dios ug sa Iyang Pinalanggang Anak, si Jesukristo.
Elder Cook: Gihangyo nako si Elder ug Sister Gilbert sa paghisgot sa mosunod nga duha ka pangutana:
Una, Unsaon nato sa pagpalig-on ang pagplano sa kinabuhi ug balanse nga kinabuhi? Ug, ikaduha, Unsaon nato sa pagpanalipod sa kamatuoran niining komplikado nga mga panahon?