Pagbarog alang sa Kamatuoran
Tibuok Kalibotan nga Debosyonal alang sa mga Young Adult
Dominggo, Nobiyembre 19, 2023
Sister Christine Gilbert: Ang sunod nga pangutana nga gihangyo kami nga pagahisgotan mao ang unsaon sa pagbarog alang sa kamatuoran atol sa usa ka panahon sa dako nga kalibog.
Pila kaninyo ang adunay mga kutay sa text [text chains] nga kamo nakigbinayloay sa mga higala ug pamilya? Tingali tanan kanato, dili ba? Sa usa sa akong pipila ka grupo sa text, adunay pipila kinsa masaligon gayod sa ebanghelyo ug uban kinsa nanglimbasog sa mga isyu nga may kalabotan sa Simbahan. Pamilyar ba kini ni bisan kinsa kaninyo? Unsay mahitabo kon usa sa inyong gihigugma mosulti nga ang usa ka butang nga inyong nahibaloan dili tinuod?
Elder Clark G. Gilbert: Nakadungog kami og susama nga mga istorya bahin niini gikan sa mga young adult sa tibuok Simbahan. Nasayod kami nga nabati ninyo kini.
Samtang hisgotan namo kini nga hilisgotan, ako moila nga giambitan namo ang pulpito karon uban sa duha ka maayo kaayo nga mga ehemplo kinsa nagpakita niini ug nagpakita kanato kon unsaon sa pagtagad sa mga tawo uban ang kamabination ug sa pagpanalipod sa unsay ilang gituohan.
Si Elder ug Sister Cook nagpuyo sa San Francisco Bay Area alang sa dakong bahin sa ilang propesyonal nga kinabuhi. Si Elder Cook mitambong sa Stanford Law School, nangulo sa usa ka kompanya sa mga abogado [law firm] diha sa Bay Area ug sa usa ka dako nga health care system. Ang mga Cook mitrabaho ug mipuyo taliwala sa daghang kauban kinsa wala kanunay nagbaton sa ilang mga mithi. Apan nakakaplag sila og mga paagi sa pagpanalipod sa kamatuoran samtang nahimo gihapon nga maayo nga mga higala ug maayo nga mga silingan. Nakita nako kini samtang miapil ko sa mga Cook didto sa open house sa Washington D.C. Temple uban sa usa ka grupo sa inila, nasodnon nga mga peryodista ug akademiko nga mga lider. Nahingangha ko kon giunsa sa mga Cook sa pagpakigbahin sa mga kamatuoran sa ebanghelyo sa larino nga paagi, lakip sa importansiya sa kaminyoon sa templo, moral nga kalimpyo, ug pagtuman sa mga pakigsaad, samtang sa tibuok panahon nagmugna og mga relasyon sa pagsinabtanay ngadto sa ubang mga tawo.
Ako adunay laing mga kahigayonan nga makat-on kon unsaon sa pagpanalipod sa kamatuoran uban ang gugma. Miaging tuig, nakadawat ko og tawag gikan ni Presidente Oaks. Miingon siya, “Elder Gilbert, mamulong ko sa usa ka umaabot nga debosyonal, ug ganahan ko nga ikaw ang akong kauban nga mamumulong. Mahimo ba nga kuyogan ko nimo gikan sa pulpito samtang magkauban kitang mamulong aron tubagon ang pipila sa mahagiton nga mga isyu karong panahona?” Miingon siya nga hisgotan namo ang LGBTQ nga mga problema, mga isyu sa kagikan, ug ang pagkadili masayop sa usa ka propeta. Siya dayon misugyot, “Dili kita mamulong gikan sa usa ka sinulat. Motubag lang kita sa usag usa sa natural nga paagi, sa inter-aktibo nga paagi.” Dali kong mitubag nga “Segurado ko nga mahimo kini alang sa iyang pakigpulong, apan alang sa kaayohan sa tibuok Simbahan, tingali mas maayo kon isulat namo kon unsay akong isulti.”
Sa iyang pakigpulong, si Presidente Oaks milatid og lima ka paagi nga kita makapanalipod alang sa kamatuoran uban ang gugma.1
Ang una mao ang paglikay sa mga sitwasyon nga mosangpot sa grabeng panaglalis. Sama sa gitudlo ni Elder Neil L. Andersen, “Adunay mga panahon nga ang pagbuhat og kadaitan nagpasabot nga pugngan nato ang tinguha sa pagtubag ug hinuon uban sa kaligdong, magpabilin nga hilom.2
Ang ikaduha mao ang paghigugma sa uban, aron mangita og butang nga parehas nga gituohan bisan kon kita dili magkauyon.
Ang ikatulo mao ang paghupot sa kamatuoran, bisan diha sa atong pagpakigsandurot. Adunay tintasyon usahay nga mobiya sa unsay atong nahibaloan diha sa atong mga paningkamot sa pagpakita og gugma. Dili kita kinahanglang molimod sa unsay atong nahibaloan nga tinuod.
Ang ikaupat mao ang pagkahimong usa ka kahayag ug usa ka higala ug pagserbisyo sa uban, ug ang kataposan mao ang pagpabiling nakaangkla kang Jesukristo.
Sister Gilbert: Niining kataposan nga kinatibuk-ang komperensiya, si Elder Cook namulong bahin sa kalisod sa pagpanalipod sa kamatuoran nga dili magpadala sa mga pagpamugos sa kalibotan: “Ang malinawon nga mga sumusunod ni Kristo dili [moatras gikan sa kamatuoran ni mapakyas sa paghigugma sa uban]. Kita maabiabihon, maapilon nga mga sakop sa mga komunidad diin kita nagpuyo. Kita [usab] nahigugma, nagpakigbahin, ug nagdapit sa tanang anak sa Dios sa pagsunod sa mga pagtulun-an ni Kristo.”3
Nagtuo ko nga mao kini ang unsay gitudlo ni Presidente Nelson kanato sa iyang panawagan kanato nga mahimong mga tigpasiugda og kalinaw.4 Dili siya gusto nga kita magpalayo sa kamatuoran, apan gusto gayod siya nga buhaton nato kini uban ang gugma sa Manluluwas.