Lea Fakafeʻiloakí
Fakataha Lotu Fakaemāmani Lahi maʻá e Kakai Lalahi Kei Talavoú
Sāpate, 19 Nōvema 2023
Mālō, Palesiteni Reese.
Kimuʻa pea kamata ʻema fakamatalá, ʻoku ou fie fakahā atu ʻa e pekia ʻa Palesiteni M. Lāsolo Pālatí ʻi he Sāpate kuo ʻosí—ko ʻeku palesiteni kōlomú mo e kaungāmeʻa ʻofeina. ʻOku ou fakahā ʻeku fie kaungāmamahi ki hono fāmilí pea mo ʻeku ʻofa mo e houngaʻia ʻi heʻene moʻui feilaulau mo e mateakí ʻi hono faitāpuekina ʻa e fānau kotoa ʻo ʻetau Tamai Hēvaní.
ʻOku ou fiefia mo Mele ke kau fakataha mo ʻEletā Kalake G. Kilipeti mo Sisitā Kilisitina Kilipeti ke lea kiate kimoutolu ʻi he fakataha lotu fakaemāmani lahi ko ʻeni ʻoku fakahoko atu mei he ʻapiako Brigham Young University.
ʻI heʻemau teuteu ki he fatongiá ni, naʻa mau tānaki ha ngaahi fehuʻi mei he kakai lalahi kei talavou ʻi he Siasí. Naʻa mau kamata mo e kau ako ʻi heʻetau ngaahi ʻapiako ʻi he CES: ʻi heni ʻi BYU, hoko atu ki BYU–Idaho, BYU-Hawaii, mo e Ensign College. Naʻa mau hoko atu leva ʻo fehuʻi ki he kau ako BYU–Pathway ʻi he funga ʻo e māmaní mo kinautolu ʻoku nau kau ki he ʻinisititiuti ʻi he Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní. Naʻe kau atu ʻa e kau palesiteni ʻo e ngaahi ʻinisititiuti ko ʻení mo ha kau taki kehe ʻo nau fakataha mo e ngaahi kulupu ʻo ha kau ako ke fakapapauʻi pe ko e hā ʻa e ngaahi fehuʻi ʻoku mahuʻinga taha ki he kakai lalahi kei talavoú ʻi he taimi ko ʻení. Ko ha founga fakaʻofoʻofa ia, pea ʻi he fakaʻosingá naʻe fakaofo ʻa e ngaahi fehuʻí.
Naʻe makehe ʻa e faitatau hoʻomou ngaahi fakakaukaú mo hoʻomou ngaahi ongó; ʻoku tokolahi hamou niʻihi ʻoku tatau hoʻomou ngaahi fehuʻi fakalaumālié mo e ngaahi fehuʻi kehe ʻo e moʻuí. Naʻe tatau ai pē pe ko ha tokotaha ako ʻinisititiuti ʻi Pelū, tokotaha ako ʻenisinia ʻi BYU–ʻAitahō, ko ha taha ako ʻo BYU–Pathway ʻi ʻAfilika Hihifo, ko ha tokotaha ako fokotuʻutuʻu fakatātā (graphic design) ʻi heni ʻi BYU, pe ko ha taha ngāue fakapalōfesinale ʻoku kau ki he ʻinisititiutí ʻi ʻIulope, ʻOtu Filipainí, pe ʻi heni pē ʻi ʻIutā, ʻoku uouangataha ʻa e kakai lalahi kei talavou ʻi he Siasí kotoa ʻi heʻenau tui kia Sīsū Kalaisí pea ʻoku nau faitatau ʻi he ngaahi fakaʻānauá, ngaahi fakaʻamú, mo e ngaahi hohaʻá. ʻOku mou fakaofo pea ʻoku mou hoko ko ha konga mātuʻaki mahuʻinga ʻo e kahaʻu ʻo e Siasí ni.
Kuó ma fakakulupu hoʻomou ngaahi fehuʻí ki ha ngaahi kulupu ʻe nima ki heʻema ako ʻi he ʻaho ní:
-
Ko e fehangahangai mo e ngaahi pole ʻo e moʻuí mo e tuí
-
ʻOfá mo e ongoʻi kau maí
-
Ko hono palaniʻi ʻo e moʻuí mo e potupotutatau ʻo e moʻuí
-
Taukaveʻi ʻa e moʻoní
-
Ko hono maʻu ʻo e fakahā fakatāutahá
-
Fakahinohino fakaepalōfitá
ʻI he ʻaho ní, ʻokú ma fie fealeaʻaki mo kimoutolu ki he ngaahi fehuʻi kotoa ko ʻení ʻi ha founga ʻoku fakaʻaongaʻi ai ʻema ngaahi aʻusia fakataautaha ʻi he moʻuí mo ʻema ngaahi vakai mei heʻema fengāueʻaki mo e kakai lalahi kei talavou ʻi he Siasí kotoa.
Te u lea mo Sisitā Kuki ʻi he ongo ʻuluaki fehuʻi fekauʻaki mo e ngaahi pole ʻo e moʻuí mo e tuí pea mo e ʻofá mo e ongoʻi kau maí. ʻE vahevahe atu leva ʻe ʻEletā mo Sisitā Kilipeti ha ngaahi aʻusia ki he founga ke potupotutatau ai ʻa e ngaahi fatongia ʻo e moʻuí. Te na lea foki fekauʻaki mo e ʻuhinga ke taukaveʻi ʻa e moʻoní ʻi he taimi ko ʻeni ʻo e moveuveú. Te u vahevahe atu leva ha ngaahi fakakaukau mo e faleʻi ki hono maʻu ʻo e fakahā fakatāutahá pea fakaʻosi ʻaki ha ngaahi fakakaukau fekauʻaki mo e fakahinohino fakaepalōfitá.