Ko hono Palaniʻi ʻo e Moʻuí mo e Potupotutatau ʻo e Moʻuí
Fakataha Lotu Fakaemāmani Lahi maʻá e Kakai Lalahi Kei Talavoú
Sāpate, 19 Nōvema 2023
Elder Clark G. Gilbert: Mālō, ʻEletā mo Sisitā Cook, ki hoʻomo faleʻi fakaʻofoʻofá. ʻOku ou fiefia mo Kilisitina ke aleaʻi ʻa e fuofua fehuʻi ko ʻeni fekauʻaki mo hono palaniʻi ʻo e moʻuí mo e potupotutatau ʻo e moʻuí.
Sister Christine Gilbert: ʻOku femoʻuekina homau fāmilí. Kuo faingataʻa maʻu pē ʻa e ngaahi fiemaʻu fakaengāue mei hoku husepānití—ʻi heʻene hoko ko ha palōfesa ʻi Havātí, CEO ʻi ha kautaha mītia, mo palesiteni ʻi ha ongo ʻunivēsiti. Lolotonga kotoa ʻení, naʻá ma fakatou fua ha ngaahi uiuiʻi femoʻuekina ʻi he Siasí. Ka ko homa ngaahi fatongia mahuʻinga tahá maʻu pē ki heʻema nofo-malí mo e fānaú.
Elder Gilbert: Naʻe fakamanatu mai kiate au ʻe he meʻá ni ʻi he taimi naʻá ku maʻu ai ha faʻahitaʻu ke taki ʻi he Deseret News. Ko e toko fiha ʻo kimoutolu kakai lalahi kei talavou ʻoku mou lau ha nusipepa kuo paaki ʻi he ʻaho kotoa? Hiki hake homou nimá. Ko e meʻa pē ia naʻá ku fakakaukau ki aí—meimei hala ha taha. Naʻe ʻomi kiate au ʻa e fatongia ke tokoni ʻi he liliu ko ia ʻa e Deseret News mei ha nusipepa angamaheni ki hono kahaʻu fakaʻilekitulōniká. Ko ha taimi faingataʻa moʻoni ia. ʻI he taimi ko iá, naʻe ʻosi fanauʻi ʻa e toko fitu ʻo ʻema fānau ʻe toko valú, pea naʻá ku hoko ko ha pīsope.
ʻI he ʻaho ʻe taha, naʻe fakafokifā pē ha ui mai ʻa Palesiteni Poiti K. Peeka ʻo fehuʻi mai, “Brother Kilipeti, ʻoku ou fehuʻi atu fekauʻaki mo ho fāmilí. ʻOku feʻunga nai ho taimi mo ho uaifí?” Naʻá ku kiʻi longo peá u tali ange, “Mahalo ʻikai.” Naʻá ne pehē mai leva, “Brother Kilipeti, te ke tataki ʻa e kulupu mītia ko ʻení ʻi ha vahaʻataimi, ka te ke hoko ko ha husepāniti mo ha tamai ʻo taʻengata.” Naʻá ne vahe mai leva ha fatongia ke ma teiti fakauike mo Kilisitina.
Naʻá ne fehuʻi mai leva pe ko e fihá naʻá ku mohe aí, peá u tali ange ko e 1:00 pe 2:00 hengihengi ʻi he pō kotoa. Naʻe taʻeʻamenekina kiate au ʻene talí. Naʻá ne pehē mai, “ʻOkú ke pehē ʻoku makatuʻunga kotoa ʻeni ʻi hoʻo ngāué. ʻOku ʻikai ke ke falala ki he ʻEikí.” Naʻe ʻomi ʻe Palesiteni Peeka ha fakataputapui fakaeʻaposetolo, ʻa ia kuó u fāifeinga ke tauhi ki ai talu mei ai.
Sister Gilbert: Ko ia kapau ʻoku ʻi ai haʻo taimi fakataputapui mo ha pō teiti kuo fakataimi-tēpileʻi fakauike, ʻoku founga fēfē hoʻo tokangaʻi ʻa e toenga ho fatongia mahuʻingá?
ʻOku kamata ia ʻaki ʻa e palani. Talu mei he ngaahi fuofua taʻu ʻo ʻema nofo-malí, kuó ma fakahoko mo hoku husepānití ha fakataha fakauike ki he tohi māhiná ʻi he pō Sāpate kotoa. Ko ha tukupā ʻeni kuo ʻikai ke ma teitei liʻaki neongo ʻema femoʻuekiná.
Ko e uá, ʻoku fiemaʻu foki ke ʻi ai ha ngaahi taumuʻa tatau ʻi hono ʻai ke potupotutatau ʻa e ngaahi fatongia ʻi he moʻuí. Naʻa mo e taimi ʻokú ma māvahevahe aí, ʻokú ma kei ongoʻi faaitaha pē ʻi heʻema maʻu ha taumuʻa tataú. Ko ia ʻi he taimi naʻe folau ai hoku husepānití ʻi he ngāué pe naʻá ku akoʻi ha kalasi semineli pongipongi pe naʻá ne ʻalu ʻi ha fatongia fakauooti, kapau naʻá ma ʻosi hiki ʻa e ngaahi fatongia ko iá ki he tohi māhiná mo fakafenāpasi ʻema taumuʻá, naʻá ma fakataha pē neongo ʻema māvahevahé.
Elder Gilbert: Neongo ia, ʻoku kei ʻi ai pē ha ngaahi taimi ʻoku fiemaʻu ai ke ke fokotuʻu ha ngaahi fakangatangata ki ha ngaahi fili pau.
Naʻe vahevahe ʻe Kelei Kulisiteniseni, ko ha kaungāmeʻa ʻofeina mei Positoni, ʻa e ʻeke ange ʻe ha supavaisa pe ʻe lelei ange ha fakataha ʻi he pongipongi Sāpaté pe pongipongi Tokonakí ki ha fakataha fakatimi kuo ʻosi fakataimi-tēpileʻi fakauike pe angamahení. Naʻe tali mai ʻe Kelei, “Naʻá ku fakapapauʻi ʻi he ngaahi taʻu kuohilí te u tukupā ʻa e Tokonakí ki hoku uaifí mo e Sāpaté ki he ʻOtuá, pea kapau te ke toe fiemaʻu ha ʻaho mei ai, ʻe fiemaʻu ke ke kole fakahangatonu kiate kinaua ha ngofua.”
ʻOku fiemaʻu ke ʻoua naʻa lava ʻo feliliuaki ha ngaahi tukupā pau ʻi hoʻo moʻuí. Ki homau fāmilí, kuo kau heni ʻa e ʻalu ki he lotú ʻi he Sāpaté, efiafi fakafāmili fakauike ʻi ʻapí, fakataha lotu fakafāmili ʻi he pongipongí mo e efiafí, mo ha taimi fakataha ko ha ongo meʻa mali ʻi he uike takitaha.