សេចក្តីស្រឡាញ់ និងការមានចំណែក
ការប្រជុំធម្មនិដ្ឋានទូទាំងពិភពលោកសម្រាប់យុវមជ្ឈិមវ័យ
ថ្ងៃ អាទិត្យ ទី ១៩ ខែ វិច្ឆិកា ឆ្នាំ ២០២៣
អែលឌើរ ឃ្វីនថិន អិល ឃុក ៖ សំណួរអំពីសេចក្ដីស្រឡាញ់ និងការមានចំណែកគឺទាក់ទងខ្លាំងទៅនឹងការប្រឈមមុខនឹងឧបសគ្គក្នុងជីវិត និងសេចក្ដីជំនឿ ។ ម៉ារី តើអូនចង់ឆ្លើយសំណួរដ៏សំខាន់នេះទេ ?
ស៊ីស្ទើរ ម៉ារី ឃុក ៖ យើងទាំងអស់គ្នាគឺជាបុត្រាបុត្រីរបស់ព្រះ ហើយយើងជាសមាជិកនៃសាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយ ដែលបានស្ដារឡើងវិញរបស់ព្រះអម្ចាស់ ។ មិនថាស្ថានភាពយើងខុសគ្នាប៉ុណ្ណាទេ យើងទាំងអស់គ្នាមានចំណែក ។
នៅក្នុងព្រះគម្ពីរ ប្រាប់ច្បាស់ថា ព្រះស្រឡាញ់បុត្រខាងវិញ្ញាណទ្រង់ទាំងអស់ ហើយមនុស្សទាំងអស់គឺដូចគ្នានៅចំពោះព្រះ ហើយគ្រប់គ្នាមានចំណែក ។
នៅក្នុង នីហ្វៃទី២ ២៦:៣៣ យើងអានផ្នែកនេះថា « ទ្រង់អញ្ជើញពួកគេទាំងអស់គ្នាឲ្យមករកទ្រង់ ហើយទទួលទាននូវសេចក្ដីល្អសប្បុរសរបស់ទ្រង់ ហើយទ្រង់ពុំបដិសេធអ្នកណាម្នាក់ ដែលមករកទ្រង់ឡើយ គឺទាំងខ្មៅ និងស ទាំងបាវគេ និងសេរី ទាំងប្រុស និងស្រី … ហើយមនុស្សទាំងអស់ក៏ដូចគ្នានៅចំពោះព្រះដែរ » ។
ដោយសារយើងទាំងអស់គ្នាជាបុត្រខាងវិញ្ញាណរបស់ព្រះ នោះយើងមានអត្តសញ្ញាណខាងវិញ្ញាណ ហើយយើងច្រៀងអំពីរឿងនេះនៅក្នុងបទ « ខ្ញុំជាកូនរបស់ព្រះ » ។១
ច្រើនឆ្នាំកន្លងទៅ កាលយើងរស់នៅក្នុងតំបន់ឈូងសមុទ្រកាលីហ្វ័រញ៉ា មានយុវមជ្ឈិមវ័យ និងមជ្ឈឹមវ័យច្រៀង និងចូលរួមការសម្ដែងនៅព្រះវិហារបរិសុទ្ធ អូកលែន កាលីហ្វ័រញ៉ា ដែលមានចំណងជើងថា « ហើយហេតុការណ៍បានកើតឡើងថា » ។ មានបទចម្រៀងមួយថ្លែងអំពីអត្តសញ្ញាណខាងវិញ្ញាណរបស់យើង ។ វាមានចំណងជើងថា « តើខ្ញុំជានរណា ? » វាសួរសំណួរថា « ហេតុអ្វីយើងមកទីនេះ ? » និង « តើយើងនឹងទៅទីណា ? »
បទចម្រៀងនេះបញ្ចប់ដោយចម្លើយដ៏មានអានុភាពនេះ ៖
នេះគឺជាខ្ញុំ ។
វិញ្ញាណខ្ញុំបានរស់នៅជាមួយបិតាខ្ញុំ មុនពេលផែនដីកើតឡើង ។
ខ្ញុំជ្រើសរើសផ្លូវនេះដើម្បីដើរតាម នៅពេលសណ្ឋានទីមួយខ្ញុំបានបញ្ចប់ ។
ខ្ញុំមកកាន់ផែនដីដើម្បីមានរូបកាយដូចបិតាខ្ញុំដែរ
ដើម្បីរួបរួមវិញ្ញាណ និងរូបកាយខ្ញុំ ដើម្បីធ្វើឲ្យព្រលឹងខ្ញុំទៅជាទេវៈ » ។
នេះគឺជាខ្ញុំ ។
ខ្ញុំជាបុត្ររបស់បិតាខ្ញុំ … នៅសួគ៌ា ។
នេះគឺជាខ្ញុំ ។…
ខ្ញុំជាកូនរបស់ព្រះ ។
មនុស្សគ្រប់គ្នាដែលបានចូលរួមទទួលសាក្សីពីព្រះវិញ្ញាណថា ពួកគេកំពុងច្រៀងសេចក្ដីពិត ។
អែលឌើរ ឃុក ៖ កាលពីខែមុន ម៉ារី និងខ្ញុំបានទៅទីក្រុងអេហ្វេស៊ូសនៅប្រទេសតួកគី ជាមួយនឹងថ្នាក់ដឹកនាំបេសកកម្មមកពីអឺរ៉ុបភាគច្រើន ។ សាវកប៉ុលធ្លាប់បានរស់នៅ និងបង្រៀននៅទីនោះ ។ សំបុត្ររបស់លោកមួយទៅកាន់ពួកអេភេសូរ មាននូវការប្រកាសដ៏មានអានុភាពមួយ ៖ « ដូច្នេះ អ្នករាល់គ្នាមិនមែនជាអ្នកដទៃ ឬជាអ្នកគ្រាន់តែសំណាក់នៅទៀតទេ គឺជាជាតិតែ១នឹងពួកបរិសុទ្ធ ជាពួកដំណាក់ព្រះវិញ » ។២
យើងទាំងអស់គ្នាមានចំណែក !
ស៊ីស្ទើរ ឃុក ៖ អេ អេ ម៉ាលណឺ បាននិពន្ធសៀវភៅមួយក្បាលអំពីខ្លាឃ្មុំពណ៌មាសដែលចូលចិត្តទឹកឃ្មុំ មានចំណងជើងថា Winnie-the-Pooh ។
ពេលដើរជាមួយមិត្តភក្តិគាត់ឈ្មោះ Piglet នោះ Piglet បានសួរ Pooh ថា « តើឯងប្រកបពាក្យស្រឡាញ់យ៉ាងម៉េចទៅ ? » Pooh ឆ្លើយថា « យើងមិនប្រកបវាទេ ។ យើងទទួលអារម្មណ៍ពីវា » ។
នៅក្នុងកម្មវិធីសិក្សាព្រះគម្ពីរក្នុងបណ្ណាល័យដំណឹងល្អ ការពិពណ៌នាទូទៅសម្រាប់ពាក្យ « សេចក្ដីស្រឡាញ់ » គឺថា « សេចក្តីស្រឡាញ់គឺជាអារម្មណ៍នៃការលះបង់ដ៏ជ្រាលជ្រៅ ការខ្វល់ខ្វាយ និងមេត្រីភាព ។ គំរូដ៏អស្ចារ្យបំផុតនៃសេចក្ដីស្រឡាញ់របស់ព្រះសម្រាប់បុត្រាបុត្រីទ្រង់ បង្ហាញនៅក្នុងដង្វាយធួនដ៏និរន្ដរ៍របស់ព្រះយេស៊ូវគ្រីស្ទ ។ សេចក្តីស្រឡាញ់ចំពោះព្រះ និងមនុស្សទូទៅ គឺជាបុគ្គលិកលក្ខណៈមួយនៃសិស្សរបស់ព្រះយេស៊ូវគ្រីស្ទ » ។៣
នៅក្នុង យ៉ូហាន ៣:១៦ យើងអានថា « ដ្បិតព្រះទ្រង់ស្រឡាញ់មនុស្សលោក ដល់ម៉្លេះបានជាទ្រង់ប្រទានព្រះរាជបុត្រាទ្រង់តែ១ ដើម្បីឲ្យអ្នកណាដែលជឿដល់ព្រះរាជបុត្រានោះ មិនត្រូវវិនាសឡើយ គឺឲ្យមានជីវិតអស់កល្បជានិច្ចវិញ » ។
នៅពេលព្រះយេស៊ូវគ្រីស្ទបានយាងមកផែនដីនេះក្នុងគ្រាដ៏រុងរឿងបំផុត ទ្រង់បានបង្រៀនយើង ៖
« ត្រូវឲ្យស្រឡាញ់ព្រះអម្ចាស់ ជាព្រះនៃឯងឲ្យអស់អំពីចិត្ត អស់អំពីព្រលឹង ហើយអស់អំពីគំនិតឯង ។
នេះជាបញ្ញត្តិយ៉ាងសំខាន់ទី១ ។
« ហើយបញ្ញត្តិទីពីរក៏បែបដូចគ្នាគឺថា ត្រូវស្រឡាញ់អ្នកជិតខាងដូចខ្លួនឯង » ។៤
យើងបង្ហាញសេចក្ដីស្រឡាញ់របស់យើងចំពោះព្រះជាព្រះវរបិតា និងព្រះយេស៊ូវគ្រីស្ទដោយការរក្សាបទបញ្ញត្តិទាំងនេះ ។ នេះហើយជាកិច្ចការរបស់យើង ។
យើងបង្ហាញសេចក្ដីស្រឡាញ់ចំពោះបុត្រាបុត្រីទាំងអស់របស់ព្រះ ដោយការផ្ដល់ការងារបម្រើដល់ពួកគេ និងរស់នៅយ៉ាងសកម្មតាមដំណឹងល្អ—ដោយការធ្វើកិច្ចការផ្សព្វផ្សាយសាសនា នៅពេលយើងស្រឡាញ់ ចែកចាយ និងអញ្ជើញអ្នកដទៃឲ្យ « មករកព្រះគ្រីស្ទ » ។ យើងបង្ហាញសេចក្ដីស្រឡាញ់ចំពោះគ្រួសារ ដោយការរក្សាសេចក្ដីសញ្ញាព្រះវិហារបរិសុទ្ធរបស់យើង និងការធ្វើកិច្ចការព្រះវិហារបរិសុទ្ធសម្រាប់បុព្វការីជនយើង ។
ឥឡូវ សូមស្មោះត្រង់ចំពោះខ្លួនឯង ។ សូមសួរ ៖ តើទង្វើខ្ញុំបង្ហាញពីសេចក្ដីស្រឡាញ់ចំពោះព្រះវរបិតាសួគ៌ និងព្រះយេស៊ូវគ្រីស្ទដែរឬទេ ? តើខ្ញុំកំពុងជួយអ្នកដទៃដែលនៅជុំវិញខ្ញុំឲ្យជឿដែរឬទេ ? ប្រសិនបើខ្ញុំត្រូវគេចោទប្រកាន់ថាជាគ្រីស្ទាន តើមានភស្តុតាងគ្រប់គ្រាន់ដើម្បីផ្តន្ទាទោសខ្ញុំទេ ?
កំណាព្យ « Outwitted » ដែលនិពន្ធដោយ Edwin Markham អានថា ៖
គាត់គូសរង្វង់មួយដែលដកខ្ញុំចេញ—
មតិខុសឆ្គង បះបោរ រឿងមួយដែលត្រូវមើលងាយ ។
តែដោយសារក្តីស្រឡាញ់ ខ្ញុំមានប្រាជ្ញាដើម្បីឈ្នះ ៖
យើងគូសរង្វង់មួយដែលនាំគាត់ចូលវិញ ! »
ចូរយើងធ្វើជាសិស្សដ៏ពិត និងជាអ្នកផ្សះផ្សាគេ ។ សូមឲ្យសេចក្ដីស្រឡាញ់ដ៏សុទ្ធសាធរបស់ព្រះគ្រីស្ទមាននៅក្នុងចិត្តយើង កាលយើងបង្ហាញសេចក្ដីស្រឡាញ់ចំពោះព្រះ និងព្រះរាជបុត្រាសំណព្វទ្រង់គឺ ព្រះយេស៊ូវគ្រីស្ទ តាមរយៈសកម្មភាពយើង ។
អែលឌើរ ឃុក ៖ ខ្ញុំបានសូមអែលឌើរ និងស៊ីស្ទើរ ហ្គីលប៊ឺត ឲ្យឆ្លើយនឹងសំណួរពីរបន្ទាប់នេះ ៖
ទីមួយ តើយើងអាចពង្រឹងផែនការជីវិត និងតុល្យភាពជីវិតបានយ៉ាងដូចម្ដេច ? និងទីពីរ តើយើងឈរការពារសេចក្ដីពិតនៅក្នុងគ្រាដ៏ស្មុគស្មាញទាំងនេះដោយរបៀបណា ?