ការទទួលវិវរណៈផ្ទាល់ខ្លួន

ការប្រជុំធម្មនិដ្ឋានទូទាំងពិភពលោកសម្រាប់យុវមជ្ឈិមវ័យ

ដោយ ឃ្វីនថិន អិល ឃុក

ក្នុងកូរ៉ុមនៃពួកសាវកដប់ពីរនាក់

ថ្ងៃអាទិត្យ ទី ១៩ ខែ វិច្ឆិកា ឆ្នាំ ២០២៣

សូមអរគុណអែលឌើរ និង ស៊ីស្ទើរ ហ្គីលប៊ឺត សម្រាប់ដំបូន្មានដ៏ល្អ ។

សំណួរចុងក្រោយគឺមានទាំងគោលលទ្ធិ និងភាពស៊ីជម្រៅ ។ តើខ្ញុំអាចទទួលបានពរជ័យតាមរយៈវិវរណៈផ្ទាល់ខ្លួន និងការណែនាំពីព្យាការីដោយរបៀបណា ?

ការនិមិត្តដ៏អស្ចារ្យនៅក្នុងព្រះគម្ពីរមរមន គឺជាសុបិនព្យាករណ៍របស់លីហៃអំពីដើមឈើជីវិត ។^១ ការនិមិត្តនេះពិពណ៌នាយ៉ាងច្បាស់អំពីបញ្ហាប្រឈមចំពោះសេចក្តីជំនឿដែលមាននៅក្នុងជំនាន់យើង និងការបែងចែកដ៏ធំរវាងអ្នកដែលស្រឡាញ់ ថ្វាយបង្គំ និងទទួលអារម្មណ៍នៃការទទួលខុសត្រូវចំពោះព្រះ និងមនុស្សមិនគោរពស្រឡាញ់ព្រះ ។ លីហៃ បានពន្យល់អំពីការប្រព្រឹត្តមួយចំនួនដែលបំផ្លាញសេចក្ដីជំនឿ ។ មនុស្សមួយចំនួនមានអំនួត ឥតប្រយោជន៍ និងឆោតល្ងង់ ។ ពួកគេគ្រាន់តែចាប់អារម្មណ៍នៅលើអ្វីដែលហៅថា « ប្រាជ្ញានៃលោកិយ » ប៉ុណ្ណោះ ។^២ អ្នកផ្សេងទៀតមានចំណាប់អារម្មណ៍ខ្លះៗទៅលើព្រះ ប៉ុន្តែបានវង្វេងក្នុងអ័ព្ទនៃសេចក្តីងងឹត និងអំពើបាបរបស់លោកិយ ។^៣ អ្នកខ្លះបានភ្លក់រសជាតិនៃសេចក្តីស្រឡាញ់របស់ព្រះ និងព្រះបន្ទូលទ្រង់ ប៉ុន្តែមានអារម្មណ៍ខ្មាសអៀនព្រោះតែពួកអ្នកដែលចំអកដាក់គេ ហើយក៏បានធ្លាក់តាមផ្លូវហាមឃាត់ទាំងឡាយវង្វេងបាត់អស់ទៅ ។^៤

យើងទទួលស្គាល់ថា មានសមាជិកជាច្រើន ដែលមិនសូវចាប់អារម្មណ៍ និង មិនសូវស្មោះត្រង់ចំពោះការបង្រៀនមួយចំនួនរបស់ព្រះអង្គសង្គ្រោះ ។ គោលបំណងរបស់យើងគឺចង់ឲ្យសមាជិកទាំងនេះភ្ញាក់រលឹកទាំងស្រុងចំពោះសេចក្ដីជំនឿ និងដើម្បីបង្កើនសកម្មភាព និងការប្ដេជ្ញា និងកិច្ចខិតខំរបស់ពួកគេដើម្បីទទួលបានវិវរណៈផ្ទាល់ខ្លួន ។ ព្រះស្រឡាញ់បុត្រាបុត្រីទាំងអស់របស់ទ្រង់ ។ ទ្រង់ចង់ឲ្យពួកគេទាំងអស់គ្នាត្រឡប់ទៅរកទ្រង់វិញ ។ ទ្រង់ចង់ឲ្យមនុស្សគ្រប់គ្នាដូចជាទំនុកតន្ដ្រីដ៏ពិសិដ្ឋនៃសេចក្ដីជំនឿ ។ ដង្វាយធួនរបស់ព្រះអង្គសង្គ្រោះ គឺជាអំណោយសម្រាប់មនុស្សគ្រប់គ្នា ។ វិវរណៈផ្ទាល់ខ្លួនគឺមានសម្រាប់មនុស្សគ្រប់គ្នា ។

សារលិខិត ការបម្រើ និងដង្វាយធួននៃព្រះយេស៊ូវគ្រីស្ទ ដែលជាព្រះអង្គសង្គ្រោះយើង គឺជាផ្នែកដ៏សំខាន់សម្រាប់ការទទួលវិវរណៈផ្ទាល់ខ្លួន ។ គ្មានបទគម្ពីរណាដែលកំណត់ពីដំណើរស្វែងរកសេចក្ដីជំនឿដ៏ត្រឹមត្រូវ [ ជាង ] នីហ្វៃទី២ ២៥:២៦ ហើយយើងនិយាយអំពីព្រះគ្រីស្ទ យើងអររីករាយក្នុងព្រះគ្រីស្ទ យើងផ្សាយអំពីព្រះគ្រីស្ទ យើងព្យាករអំពីព្រះគ្រីស្ទ ហើយយើងសរសេរ ស្របតាមពាក្យព្យាករណ៍ទាំងឡាយរបស់យើង ដើម្បីឲ្យកូនចៅយើងអាចដឹងថា តើត្រូវស្វែងរកប្រភពទឹកណាមួយ ដើម្បីឲ្យបានផ្ដាច់បាបរបស់ពួកគេ » ។

ព្រះគម្ពីរមរមនសំខាន់ខ្លាំងណាស់ ។^៥ វាមានតួនាទីសំខាន់ក្នុងការទទួលបានវិវរណៈផ្ទាល់ខ្លួន ។ មែនហើយ គឺតែងតែមានអ្នកបន្ទាបតម្លៃ ទាំងទិតៀនព្រះគម្ពីរដ៏ពិសិដ្ឋនេះជានិច្ច ។ អ្នកខ្លះបានប្រើជាការលេងសើច ។ មុនពេលខ្ញុំបម្រើបេសកកម្ម មានសាស្រ្តាចារ្យសាកលវិទ្យាល័យម្នាក់បានដកស្រង់សេចក្តីថ្លែងរបស់ ម៉ាក ថ្វេន ដែលថា បើយើងដកឃ្លាភ្ជាប់ « ហើយហេតុការណ៍បានកើតឡើង » ចេញពីព្រះគម្ពីរមរមន នោះព្រះគម្ពីរមរមន « នឹងក្លាយជាខិតប័ណ្ណតូចមួយតែប៉ុណ្ណោះ » ។^៦

ពីរបីខែក្រោយមក ខណៈពេលកំពុងបម្រើបេសកកម្មនៅទីក្រុង ឡុងដ៍ ប្រទេសអង់គ្លេស សាស្រ្តាចារ្យ នៅមហាវិទ្យាល័យទីក្រុងឡុងដ៍ដែលមានការអប់រំពីសាកលវិទ្យាល័យអូកស្វតដ៏ល្បីម្នាក់មានសញ្ញាតិ អេហ្សីប ជាអ្នកជំនាញភាសាសេមីត គាត់បានអានព្រះគម្ពីរមរមនឆ្លើយឆ្លងនឹងប្រធានសាសនាចក្រ គឺប្រធាន ដេវីឌ អូ មិកឃេ រួចហើយក៏បានជួបនឹងពួកអ្នកផ្សព្វផ្សាយសាសនា ។ គាត់បានប្រាប់ពួកគេថា គាត់បានជឿជាក់ថាព្រះគម្ពីរមរមនគឺពិតជាការបកប្រែនៃការរៀនរបស់សាសន៍យូដា និងភាសាអេហ្សីបសម្រាប់សម័យកាលដែលបានពិពណ៌នានៅក្នុងព្រះគម្ពីរមរមនពិតប្រាកមែន ។^៧ ជាឧទាហរណ៍មួយក្នុងចំណោមឧទាហរណ៍ជាច្រើនដែលគាត់បានប្រើគឺឃ្លាភ្ជាប់ « ហើយហេតុការណ៍បានកើតឡើង » ដែលគាត់បាននិយាយថា វាឆ្លុះបញ្ចាំងអំពីរបៀបដែលគាត់នឹងបកប្រែឃ្លាដែលប្រើនៅក្នុងការសរសេរភាសាសេមីតពីបុរាណ ។^៨ សាស្រ្តាចារ្យរូបនេះបានថ្លែងថា ខណៈដែលបញ្ញារបស់គាត់ពឹងផ្អែកលើវិជ្ជាជីវៈដើម្បីជួយគាត់ នោះវានៅតែចាំបាច់ដើម្បីឲ្យមានទីបន្ទាល់ខាងវិញ្ញាណដដែល ។ តាមរយៈការសិក្សា និងការអធិស្ឋាន គាត់បានទទួលសាក្សីខាងវិញ្ញាណហើយបានជ្រមុជទឹក ។ ដូច្នេះអ្វីដែលអ្នកកំប្លែងដ៏ល្បីម្នាក់ចាត់ទុកថាជារឿងកំប្លែង នោះក៏មានអ្នកប្រាជ្ញម្នាក់យល់ថា វាជាភស្តុតាងដ៏មានអត្ថន័យនៃសេចក្តីពិតនៃព្រះគម្ពីរមរមន ដែលបានបញ្ជាក់ទៅគាត់ដោយព្រះវិញ្ញាណ ។

គោលលទ្ធិដ៏សំខាន់នៃសិទ្ធិជ្រើសរើសតម្រូវឲ្យមានទីបន្ទាល់នៃដំណឹងល្អដែលបានស្តារឡើងវិញ ដោយផ្អែកលើសេចក្តីជំនឿជាជាងភស្តុតាងខាងក្រៅ ឬខាងវិទ្យាសាស្រ្ត ។ នៅទីបំផុត ដំបូន្មានរបស់មរ៉ូណៃ ឲ្យអាន និងសញ្ជឹងគិត ហើយទូលសួរព្រះដោយចិត្តស្មោះសរ គឺដោយស្មោះអស់ពីចិត្ត ដើម្បីទទួលការបញ្ជាក់សេចក្តីពិតក្នុងបទគម្ពីរដោយសាក្សីនៃព្រះវិញ្ញាណ គឺត្រូវបានឆ្លើយ ។^៩ វាច្បាស់ណាស់ ការសិក្សាព្រះគម្ពីរយ៉ាងសកម្ម និងការធ្វើតាមដំបូន្មានរបស់ព្យាការីរបស់ព្រះអម្ចាស់ គឺជាបន្ទាត់ខណ្ឌចែករវាងអ្នកដែលស្តាប់ទំនុកតន្រ្តីនៃសេចក្តីជំនឿ ចេញពីអ្នកថ្លង់ ឬអ្នកមិនចង់ស្ដាប់តន្រ្តី ។

វិវរណៈផ្ទាល់ខ្លួនគឺជាពរជ័យដ៏អស្ចារ្យដែលបានទទួលបន្ទាប់ពីពិធីបុណ្យជ្រមុជទឹក នៅពេលយើង « បានញែកចេញជាបរិសុទ្ធ ដោយការទទួលនូវព្រះវិញ្ញាណបរិសុទ្ធ » ។^១០ ព្រះវិញ្ញាណបរិសុទ្ធគឺជាអង្គបើកសម្ដែង និងអង្គថ្លែងទីបន្ទាល់អំពីសេចក្ដីពិតទាំងអស់ ជាពិសេសអំពីព្រះអង្គសង្គ្រោះ ។ នាសម័យយើង ការណែនាំនៃវិវរណៈគឺចាំបាច់ខ្លាំងណាស់ ។ ប្រធាន រ័សុល អិម ណិលសុន បានបង្រៀនថា « នៅពេលខាងមុខ វានឹងមិនអាចរស់រានខាងវិញ្ញាណបានឡើយ បើគ្មានព្រះចេស្ដាណែនាំ ដឹកនាំ និងលួងលោមចិត្តជាប់ជានិច្ចមកពីព្រះវិញ្ញាណបរិសុទ្ធនោះ » ។^១១

សូមយល់ថា ការមានសេចក្តីជំនឿលើព្រះអម្ចាស់ព្រះយេស៊ូវគ្រីស្ទ និងការរក្សាព្រះបញ្ញត្តិរបស់ទ្រង់ គឺជា និងតែងតែមានការសាកល្បងដែលបានកំណត់នៅក្នុងជីវិតរមែងស្លាប់នេះជានិច្ច ។ លើសពីនេះទៅទៀត នោះយើងម្នាក់ៗត្រូវតែដឹងថា នៅពេលដែលម្នាក់ស្ដាប់មិនឮទំនុកតន្រ្តីនៃសេចក្តីជំនឿ នោះគាត់នឹងនៅឆ្ងាយពីព្រះវិញ្ញាណហើយ ។ ដូចព្យាការី នីហ្វៃ បានបង្រៀនថា « បងរាល់គ្នាបានឮសំឡេងរបស់ព្រះអង្គ … ហើយទ្រង់មានព្រះបន្ទូលជាមួយនឹងបងរាល់គ្នា ដោយសំឡេងតូចរហៀងៗ ប៉ុន្តែបងរាល់គ្នាមានចិត្តវក់វិញ ទើបមិនអាចចាប់អារម្មណ៍ពីព្រះបន្ទូលរបស់ព្រះអង្គឡើយ » ។^១២ បទគម្ពីរបានបញ្ជាក់យ៉ាងច្បាស់ថា ព្រះវិញ្ញាណបរិសុទ្ធអាចទំនាក់ទំនងតាមរបៀបជាច្រើន ។ ពេលខ្លះ ទ្រង់មានព្រះបន្ទូលដោយភាពសុខសាន្តដល់គំនិតរបស់អ្នក ។^១៣ ពេលខ្លះ លោកបំផុសគំនិត ឬយោបល់ដែលចូលមកក្នុងគំនិតរបស់អ្នក ។^១៤ ពេលខ្លះ ទ្រង់បំភ្លឺគំនិតរបស់អ្នក ។^១៥ ពេលខ្លះ ទ្រង់បណ្ដាលឲ្យដួងចិត្តរបស់អ្នកពេញដោយអំណរ ។^១៦

ខ្ញុំមានអំណរគុណ ចំពោះការឆ្លើយតបខាងប្រព័ន្ធផ្សព្វផ្សាយ ដែលខ្ញុំបានទទួលក្នុងការផ្សាយរបស់ខ្ញុំអំពីរបៀបដែលអ្នកទទួលវិវរណៈ ។ កំណត់ចំណាំមួយនិយាយថា យើងចាំបាច់ត្រូវមានចិត្តរាបសារ ហើយទទួលយកចំណាប់អារម្មណ៍ខាងវិញ្ញាណ ដែលយើងទទួលបាននោះ ។ បន្ទាប់មក យើងចាំបាច់ត្រូវស្ដាប់តាមការចំណាប់អារម្មណ៍នោះជាជាងស្ដាប់តាមលោកិយ ។

ប្រធាន រ័សុល អិម ណិលសុន បានបង្រៀនថា ៖ « បងប្អូនពុំចាំបាច់ឆ្ងល់ថាតើអ្វីគឺជាការពិតនោះទេ ។ បងប្អូនពុំចាំបាច់ឆ្ងល់ថា បងប្អូនគួរទុកចិត្តនរណាដោយមានសុវត្ថិភាពនោះទេ ។ តាមរយៈវិវរណៈផ្ទាល់ខ្លួន បងប្អូនអាចទទួលសាក្សីដោយផ្ទាល់ថា ព្រះគម្ពីរមរមនគឺជាបន្ទូលរបស់ព្រះ ថាយ៉ូសែប ស៊្មីធគឺជាព្យាការី ហើយថា នេះគឺជាសាសនាចក្ររបស់ព្រះអម្ចាស់ » ។^១៧

គោលលទ្ធិរបស់យើងគឺច្បាស់លាស់ យើងត្រូវតែវិជ្ជមាន និងរីករាយឡើង ។ ខ្ញុំចូលចិត្តដែលប្រធានដាល្លិន អេក អូក និងស៊ីស្ទើរ គ្រីស្ទិន អិម អូក បានបញ្ជាក់អំពីការរីករាយឡើងនៅឯការប្រជុំធម្មនិដ្ឋានពិសេសរបស់ពួកលោក កាលពីខែឧសភាមុន ។ យើងតែងតែសង្កត់ធ្ងន់លើសេចក្តីជំនឿរបស់យើង ពុំមែនសេចក្តីភ័យខ្លាចរបស់យើងនោះទេ ។ យើងរីករាយក្នុងការអះអាងរបស់ព្រះអម្ចាស់ថាទ្រង់នឹងគង់ក្បែរយើង ហើយប្រទានការណែនាំ និងដឹកនាំដល់យើង ។^១៨ ព្រះវិញ្ញាណបរិសុទ្ធថ្លែងទីបន្ទាល់ចំពោះដួងចិត្តយើងថា យើងមានព្រះវរបិតាដែលពេញដោយក្តីស្រឡាញ់គង់នៅស្ថានសួគ៌ ដែលមានផែនការណ៍ដ៏មេត្តាករុណាសម្រាប់ការប្រោសលោះយើង ដែលនឹងត្រូវបានបំពេញនូវគ្រប់ទិដ្ឋភាពទាំងអស់ដោយសារការពលិកម្មធួនរបស់ព្រះយេស៊ូវគ្រីស្ទ ។