ការណែនាំរបស់ព្យាការី
ការប្រជុំធម្មនិដ្ឋានទូទាំងពិភពលោកសម្រាប់យុវមជ្ឈិមវ័យ
ថ្ងៃទី ១៩ ខែ វិច្ឆិកា ឆ្នាំ ២០២៣
បង្វែរទៅការទទួលយកការណែនាំរបស់ព្យាការី ខ្ញុំសូមថ្លែងទីបន្ទាល់ថាប្រធាន រ័សុល អិម ណិលសុន គឺជាព្យាការីដែលបានជ្រើសរើសដោយព្រះអម្ចាស់ ដើម្បីដឹកនាំសាសនាចក្ររបស់ទ្រង់នៅថ្ងៃនេះ ។ ខ្ញុំថ្លែងអំពីសេចក្តីស្រឡាញ់ និងការអរគុណរបស់ខ្ញុំចំពោះលោកជាច្រើនដងមកហើយ ។១
ពេលនិយាយអំពីការណែនាំរបស់ព្យាការី ប្រធាន ស្ពែនស៊ើរ ដបុលយូ ឃឹមបឹល បានថ្លែងថា ៖ « រាល់អ្វីៗទាំងអស់ … ដែលយើងគួរតែមានអំណរគុណយ៉ាងជ្រាលជ្រៅ [ ចំពោះ ] គឺស្ថានសួគ៌ត្រូវបានបើកឡើង ហើយសាសនាចក្រដែលបានស្ដារឡើងវិញរបស់ព្រះយេស៊ូវគ្រីស្ទត្រូវបានសង់នៅលើសិលានៃវិវរណៈ ។ វិវរណៈជាបន្ដបន្ទាប់ គឺជាលោហិតជីវិតនៃដំណឹងល្អនៃព្រះអម្ចាស់ និងព្រះអង្គសង្គ្រោះដ៏មានព្រះជន្មរស់ គឺព្រះយេស៊ូវគ្រីស្ទ » ។២
ព្យាការី អេណុក បានមើលឃើញជំនាន់ដែលយើងរស់នៅ ។ លោកបានឃើញសេចក្ដីទុច្ចរិតដ៏ធំដែលនឹងកើតមាន ហើយបានព្យាករណ៍អំពី « សេចក្ដីវេទនាដ៏ធំ » ដែលនឹងកើតមានឡើង ។ ទោះជាយ៉ាងណា ព្រះអម្ចាស់បានសន្យាថា « ឯសេចក្ដីសុចរិត នោះយើងនឹងចាត់ឲ្យចុះមកពីស្ថានសួគ៌ ហើយឯសេចក្ដីពិត នោះយើងនឹងចាត់ឲ្យចេញពីផែនដីទៅ ដើម្បីទៅធ្វើបន្ទាល់ពីព្រះរាជបុត្រាបង្កើតតែមួយរបស់យើង » ។៣ ការលេចចេញមកនៃព្រះគម្ពីរមរមនគឺជាការបំពេញនៃការប្រកាសរបស់ព្រះអម្ចាស់ចំពោះអេណុក ។
ព្យាការី យ៉ូសែប ស៊្មីធ បានទទួលវិវរណៈជាបន្ដបន្ទាប់ ។ វិវរណៈជាច្រើនបានរក្សាទុកសម្រាប់យើងនៅក្នុងព្រះគម្ពីរគោលលទ្ធិ និងសេចក្តីសញ្ញា ។ គម្ពីរបមាណីទាំងអស់នៃសាសនាចក្រមាននូវព្រះគតិ និងព្រះឆន្ទៈនៃព្រះអម្ចាស់សម្រាប់យើងនៅក្នុងគ្រាកាន់កាប់ត្រួតត្រាចុងក្រោយនេះ ។៤
បន្ថែមទៅលើបទគម្ពីរគ្រឹះដ៏មហិមាទាំងនេះ យើងត្រូវបានប្រទានពរនូវវិវរណៈជាបន្ដបន្ទាប់មកកាន់ពួកព្យាការីនៅរស់ ។ ពួកព្យាការីគឺជា « ភ្នាក់ងាររបស់ព្រះអម្ចាស់ ហើយបានអនុញ្ញាតឲ្យថ្លែងជំនួសទ្រង់ » ។៥
ដូចដែលខ្ញុំបាននិយាយជាច្រើនដងមកថា ខ្ញុំសូមប្រកាសដ៏ឧឡារិកថា វិវរណៈជាបន្ដបន្ទាប់ត្រូវបានទទួល ហើយត្រូវបានប្រគល់ឲ្យតាមរយៈតំណដែលព្រះអម្ចាស់បានស្ថាបនាឡើង ។
ខ្ញុំបានបម្រើជាសាវកនៅក្រោមការដឹកនាំនៃព្យាការីបីរូប ៖ ប្រធាន ហ្គរដុន ប៊ី ហ៊ិងគ្លី ប្រធាន ថូម៉ាស អេស ម៉នសុន និងប្រធាន រ័សុល អិម ណិលសុន ។ ខ្ញុំសូមថ្លែងទីបន្ទាល់ថាពួកលោកទាំងអស់បានទទួលវិវរណៈសម្រាប់សម័យរបស់យើង ។
ខ្ញុំសូមអះអាងក្មួយៗថា ការណែនាំប្រកបដោយវិវរណៈអាចទទួលបានតាមរយៈយើងម្នាក់ៗ នៅពេលយើងធ្វើកិច្ចការនៅក្នុងចម្ការរបស់ព្រះអម្ចាស់ ។ ការណែនាំភាគច្រើនរបស់យើងគឺមកពីព្រះវិញ្ញាណបរិសុទ្ធ ។ សម្រាប់ពេលខ្លះ និងគោលបំណងខ្លះ វាកើតមកពីព្រះអម្ចាស់ដោយផ្ទាល់ ។ ខ្ញុំសូមថ្លែងទីបន្ទាល់ដោយផ្ទាល់ថា រឿងនេះជាការពិត ។ ការណែនាំសម្រាប់សាសនាចក្រទាំងមូល ទទួលបានតែចំពោះប្រធាន និងព្យាការីនៃសាសនាចក្រប៉ុណ្ណោះ ។
ខ្ញុំសូមថ្លែងឡើងវិញនូវអ្វីដែលប្រធាន វិលហ្វួឌ វូឌដ្រុព្វ បានមានប្រសាសន៍អំពីព្យាការី យ៉ូសែប ស៊្មីធ វាពិតដូចគ្នានឹងប្រធាន រ័សុល អិម ណិលសុន ផងដែរ ។ ខ្ញុំបានឃើញ « កិច្ចការនៃព្រះវិញ្ញាណរបស់ព្រះជាមួយនឹងលោក និងវិវរណៈនៃព្រះយេស៊ូវគ្រីស្ទមកដល់លោក ព្រមទាំងការបំពេញនូវវិវរណៈទាំងនោះ » ។៦ លោកគឺជាព្យាការីនៃព្រះអម្ចាស់ ។
ក្នុងនាមជាសាវករបស់ព្រះអម្ចាស់ព្រះយេស៊ូវគ្រីស្ទម្នាក់ ខ្ញុំសូមថ្លែងទីបន្ទាល់ដ៏មុតមាំអំពីភាពជាព្រះរបស់ព្រះអង្គសង្គ្រោះ និងភាពពិតនៃដង្វាយធួនរបស់ទ្រង់ ។ ទ្រង់គឺជាព្រះអង្គសង្រ្គោះ និងព្រះប្រោសលោះរបស់យើង ។ នៅក្នុងព្រះនាមនៃព្រះយេស៊ូវគ្រីស្ទ អាម៉ែន ៕