Fas Toktok
Divosen blong Ol Yang Adalt Raon long Wol
Sandei, 18 Febwari, 2024
Ol dia yang adalt raon long wol, hem i wan bigfala blesing mo wan janis blong yumi mifala evriwan blong stap wetem yufala long raon wol CES, yang adalt devosonol. Yumi glad tu blong gat wetem yumi long naet ia Brata Chad Webb, we i kam wetem dia waef blong hem, Kristi. Brata mo Sista Webb oli ol fetful disaepol blong Kraes mo oli ol gudfala eksampol blong devosen mo lav long evri eria blong laef blong olgeta.
Mifala i glad tumas we yufala i save stap ia tedei long devosonol ia Atendens blong yufala i soem hamas fet yufala gat long God mo long Jisas Kraes, mo strong tingting blong yufala blong filim lav blong Tufala, mo folem Tufala. Taem yufala disaed blong folem mo wosipim Tufala, laef blong yufala bae fulap wetem moa paoa, paoa blong stanap strong long hadtaem, we yumi nidim moa long rod blong yumi olsem ol disaepol blong Hem long taem blong yumi tedei. !Mifala i lavem yufala evriwan!
Mi givim hapi griting mo lav blong dia profet blong yumi, Presiden Russell M. Nelson, blong ol kaonsela blong hem long Fas Presidensi, mo ful Kworom blong Olgeta Twelef i kam long yufala evriwan. Olgeta oli lavem mo kea abaot yu tumas, mo prea blong yufala i stap hapi mo helti oltaem. Mi hop se bae yu filim lav blong olgeta, mo speseli lav blong God mo Kraes long devosen blong yumi tedei.
Mi laekem tumas mesej long singsing we oli singsing long hem wan minit i jes pas. Mesej long ol toktok blong singsing ia, i putum stret filing blong devosonol blong yumi long naet ia, mo givim wan ansa long wan long ol krae blong hat blong yumi: ?“Wea nao mi save go blong faenem pis?”
“Wea, taem mi nidim blong save, wea bae mi ron i go long hem?
“Wehem kwaet han ia blong ronemaot wari?
“Hu, huia I save andastanem?
“Hem, Hem Nomo.”
“Oltaem hem i stap mo kaen,
Long fas rum, taem yu openem doa i kam insaed long Jos Ofis Bilding long Sol Lek Siti, i gat wan naesfala peinting blong Jisas Kraes wetem ol Han blong Hem i open long medel blong olgeta disaepol blong Hem. Sevya i bin spendem laef blong Hem long wol ia blong stap invaetem pipol blong kam long Hem, mo Hem i leftemap tingting blong olgeta se taem oli kam, olgeta oli save “faenem pis long sol blong [olgeta] .”
Jisas Kraes i stanap long ol get blong evri dei laef blong yumi wetem ol han we oli open, hem i stap invaetem yumi,taem hem i se, “Bae mi raonem yu wetem ol han blong lav blong mi.” Iven sapos yumi foldaon o mekem mistek, yumi save dipen long Hem taem yumi sakem sin, Hem i oltaem welkamem yumi, tru long lav mo sakrifaes blong atonmen blong Hem, we i wan spes we hem i mekem from yumi. I wan gudfala wei tumas blong faenem pis long wan wol we i fulap long wari.
Long spirit blong faenem pis tru long Sevya, yumi invaetem ol institiut studen raon wol blong serem ol bigfala wari blong olgeta mo ol kwestin wetem yumi. Olgeta oli rekodem ol kwestin blong olgeta insaed blong ol sot vidio mo sendem olgeta i kam long mifala. Mifala i glad bigwan long ol gudfala ones toktok we oli kamaot long ol vidio ia, oli tajem hat blong mitufala. Mifala i save filim save hevi ia long hat blong yufala, hat ia blong wantem kam kolosap moa long Sevya, mo givim yufala fulwan olsem ol disaepol blong Hem.
Mifala i putum tugeta ol sot vidio folem topik olsem ia: (1) Mekem testemoni blong yumi i kam strong , (2) stanap strong tru long ol haed taem, (3) folem plan blong God from yumi, (4) rere blong go mo wosip insaed long tempol, mo (5) mekem laef blong yumi i lukluk moa long Jisas Kraes.
Mifala bae soem ol vidio we mifala i jusum aot long ol kwestin blong yufala blong givim yufala sam tingting, mo olsem pat blong Introdaksen long wanwan topik long storian blong yumi tedei long naet. Brata mo sista Webb bae joenem yumi blong tokbaot sam long olgeta topik ia, blong serem waes tingting blong tufala, mo gudfala testemoni blong tufala abaot gospel blong Jisas Kraes.
Tangkyu tumas. Mifala i lavem yufala evriwan, mo ol kwestin we yufala i sendem i kam i talem hamas yufala i lavem Sevya blong yumi Jisas Kraes.