Stap Rere blong Go mo Wosip Insaed long Tempol
Divosen blong Ol Yang Adalt Raon long Wol
Sandei,18 Febwari, 2024
Elda Ulisses Soares: Mifala i bin kasem plante gud kwestin we i go gud wetem wan long ol topik we Presiden Russell M. Nelson i laekem tumas: “Stap rere blong go mo wosip insaed long tempol.”
Brata mo sista Webb, ?Yutufala i save serem tingting blong yutufala long topik ia tu afta we yutufala i lisin long ol kwestin we oli bin rekodem?
KANADA EDMONTON—KWESTIN 1
Elda Soares, kwestin blong mi se ?Hao nao mi save rere blong go long tempol blong fas taem mo kasem ol endaomen blong mi?
KANADA EDMONTON—KWESTIN 2
Elda Soares, ?hao nao mi save taem mi rere blong kasem ol endaomen blong mi?
JILE KONSEPSEN—KWESTIN 2
Halo, Elda Soares. Mi gat wan kwestin. ?Hao nao mi save mekem se blong go long tempol plante taem i impoten mo wan pat we i moa impoten long laef blong mi?
Brata Chad H Webb: Hemia wan gud mo impoten kwestin.
Fas samting we mi tingting long hem i blong rere long saed blong spirit. Lan blong harem voes blong Lod mo stap ansa long ol filing ia. Traehad blong stap klin long saed blong tingting mo no mekem ol samting we i stopem Spirit long laef blong yu. Spos yu bin mekem mistek, sakem sin mo kam klin inaf blong stap insaed long haos blong Lod. Nomata weaples yu bin stap long hem long laef, Atonmen blong Jisas Kraes, hem i blong yu. From Hem, yu save kam klin inaf. Bae hem i helpem yu.
Sista Kristi Webb: Wan nara tingting i blong tokbaot tempol wetem ol memba blong famli, ol lida o ol fren we yumi trastem. Tempol i tabu, be i no evri samting abaot tempol we yumi no tokbaot, mo yumi save toktok moa abaot tempol bitim we yumi stap mekem samtaem. Mo mi ting se hemia i save helpem tugeta bifo mo afta we yu atendem tempol blong fas taem. I gud blong gat ol kwestin, hemia nao hao yumi lan, so tekem ol kwestin blong yu i go long ol pipol we yu trastem, we oli lavem tempol mo kipim i tabu. Moa long hemia, tekem ol kwestin blong yu i go long Lod. Stap gat ol kwestin, hem i wan moa gud wei blong Lod i tijim yumi tru revelesen. Mo moa yu go long tempol, moa bae Hem i tijim yu.
Brata Webb: Las tingting hem i blong stadi. Lanem evri samting we yu save abaot tempol. Wan long ol gudfala ples blong mekem hemia hem i ChurchofJesusChist.org/temples, ples we yu save lanem moa abaot endaomen, tempol gamen, mo speseli lan abaot wanwan kavenan we bae yu mekem insaed long tempol. Websaet ia i save helpem gud yu.
Olsem wan pat blong stadi blong yu, lanem evri samting we yu save abaot simbol blong tempol. Blong mi, wan long ol moa gud wei blong rere blong andastanem tempol hem i blong lanem abaot olfala tabenakol we oli tokbaot long OlTesteman. Ol simbol long ol tempol blong yumi tedei oli defren long ol taem bifo, be ol prinsipol mo stamba tingting oli semmak gud mo i save helpem yumi rere from tempol eksperiens blong yumiwan.
Olgeta we oli bin go insaed long olfala tabenakol, fas samting we oli pas long hem i wan olta, ples we oli bin stap mekem sakrifaes olsem wan saen blong atonmen mo sakrifaes blong Sevya. Oli bin wasem olgeta long wan besin blong wota mo anoentem olgeta wetem oel mo givim olgeta ol tabu klos. Mo tu long tabenakol i gat wan tenet we oli singaotem Tabu Ples, ples we oli holem wan stan blong 8 kandel stik we i simbol blong stap laef wetem Spirit o laet blong God. Tebol blong shewbread (jiubred) mo waen, semmak oli simbol blong sakramen. Hem i gat tu wan olta blong senta, we i ripresentem prea. Las pat blong tabenakol i bin rum we i Tabu we i tabu, from Ak blong Kavenan mo Jea blong Sore i stap insaed ia. Hae pris nomo i save pas tru long vel mo go insaed long Rum we i Tabu we i Tabu, mo hemia i hapen nomo wan dei long wan yia, long dei blong Atonmen. Eria aotsaed i ripresentem telestial kingdom; Tabu Ples, hem i terestrial kingdom; mo Rum we i Tabu we i tabu, hem i selestial kingdom. Ol step ia blong folem blong go tru long tabenakol i bin tijim Isrel blong bifo abaot rod blong olgeta long laef ia wetem tingting long en blong gobak stap long ples blong God.
Wanem we mi tingting long hem olsem wan big simbol long histri blong wol, i bin taem we Jisas i krusifae, mo graon i bin seksek mo vel blong tempol blong Herod i bin brok long haf, we i olsem wan simbol se naoia Atonmen i hapen finis, evriwan i gat janis ia blong go insaed long selestial kingdom, o long ples we God i stap long hem.
Iven long ol kala insaed long tabenakol—blu, pepol, red, mo waet—oli ol simbol we i gat mining. Blu oltaem yumi tingting long hem se i ripresentem heven, pepol i wan olfala simbol blong laen blong ol king, red i rimaenem yumi long blad blong Jisas Kraes, mo waet oltaem yumi yusum olsem wan simbol blong klin fasin. Putum tugeta ol kala ia long keten blong tabenakol mo ol klos blong pris, oli mekem maen blong yumi i tingting se hem i tru long blad laen blong heven we i mekem yumi klin gud.
Hemia nao from wanem yumi go long tempol—blong lanem hao blong kasem ful paoa blong atonmen mo sakrifaes blong Jisas Kraes long ol laef blong yumi. Yumi lanem se tru long ol tempol kavenan mo odinens, mo tru long Sevya, yumi save rere blong gobak stap long ples blong God yumi kam fri long rong mo sem, mo tru long Jisas Kraes, yumi kam klin inaf blong gobak stap long ples we God i stap long hem. Long tempol yumi lanem abaot Adam mo Iv mo hao oli bin sakemaot olgeta long ples we God i stap long hem mo hao oli rere blong gobak long Hem. Tru long stori blong olgeta, yumi lanem hao yumi save rere from naesfala dei ia. Presiden David O. McKay i se tempol “i wan step folem step rod we yu mas klaem kasem Ples we i no save finis. Sapos ol yang pipol blong yumi oli save statem smol, bae hem i wan samting long laef blong olgeta we i givim moa paoa long saed blong spirit.”
So taem yu go long tempol, lukaotem Jisas Kraes mo lukaotem wanem we yu stap lanem abaot stap rere blong stap long ples we Papa long Heven i stap long hem mo bae yu gat wan gudfala eksperiens.
Sista Webb: Mi save ansa long kwestin ia “?Hao nao mi save wetaem mi rere blong kasem ol endaomen blong mi?”
Blong sam risen, kwestin ia i mekem mi tingbaot profet Abraham. I bin gat wan taem long laef blong Abraham taem hem i bin filim insperesen blong wantem moa laet mo save long saed blong spirit. Hem i bin wantem blong gat wan rilesensip we i moa kolosap long God mo gat bigfala paoa blong givim seves long Hem. Long Ebraham 1:2 hem i se: “Mo, taem mi bin faenem se i gat moa hapines m pis, mo spel blong mi, nao mi lukaotem ol blesing blong ol papa blong bifo.” Abraham i tokbaot hemwan olsem “wan disaepol blong stret mo gud fasin, mo mi wantem stap olsem wan we i gat bigfala save, mo blong mi stap olsem wan moa bigfala disaepol blong stret mo gud fasin, mo blong mi gat moa save … mo mi wantem blong kasem ol tijing, mo blong holem ol komanmen blong God.”
Hemia hao mi bin filim taem mi stat blong tingbaot blong go long tempol blong kasem endaomen blong mi. Mi bin komitim mi fulwan finis blong laef folem gospel. Mi bin stap lanem plante samting taem mi stadi skripja; mo bin stap gro mo stap givim seves wetem glad long wod blong mi. Be mi bin filim wan hanggri we i bigwan tumas blong lanem moa abaot Papa long Heven mo plan blong Hem blong mi. Hemia i moa bitim we blong lukluk nomo, mi bin filim strong blong wantem lanem hao blong go moa kolosap long God mo blong kam moa wan disaepol blong Jisas Kraes we i gud moa. Mi plis long yu blong letem God i stap win insaed long laef blong yu. Ol gud fren mo bisop blong mi oli luksave se mi bin rere blong mekem ol tempol kavenan mo helpem mi rere blong kasem endaomen blong mi.
Elda Soares: Naes. Tangkyu tumas from ol naesfala komen blong yutufala, Brata mo Sista Webb. Ol dia fren blong mi, olsem we Presiden Nelson i bin tijim, “I nidim blong wanwan man i rere long saed blong spirit blong mekem se hem i save stap klin inaf blong go insaed long haos blong Lod.… Blong wanwan i stap klin inaf, i nidim blong wan i jenisim fulwan maen mo hat blong kam moa olsem Lod, … blong i stap olsem wan moa gud eksampol, mo i wan moa tabu man o woman.” From hemia, sapos yumi lukluk moa wetem stret mo gud fasin taem yumi stap rere blong go insaed long tempol, bae yumi jenisim eksperiens blong yumi long tempol, we bae i jenisim laef blong yumi aotsaed long tempol.