Stap Mekem Laef blong Yumi I Lukluk Nomo long Jisas Kraes
Divosen blong Ol Yang Adalt Raon long Wol
Sandei, 18 Febwari, 2024
Elda Ulisses Soares: Evri gudfala kwestin we yumi bin luklukbak long hem long naet ia i tekem tu moa impoten topik we yufala i givim long mifala blong divosen blong yumi: “mekem laef blong yumi i lukluk nomo long Jisas Kraes.”
ol vidio, plis.
BOLIVIA LA PAZ—KWESTIN 3
Elda Soares, mi gat wan kwestin. Long wan wol we i trabol, ?olsem wanem bae yumi developem wan tras we i moa bigwan long Sevya mo saenem moa laet blong Jisas Kraes long wol ia?
MEKSIKO SITI #1—KWESTIN 4
Elda Soares, ?olsem wanem nao bae mi kam kolosap long paoa blong God mo, taem mi stap mekem hemia, bae laef blong mi i kam moa gud mo save helpem ol narawan?
FILIPINS SEBU—KWESTIN 9
Elda Soares,mi wantem askem, ?Olsem wanem nao bae yumi luksave defren blong invitesen blong fasin blong Kraes we i stret gud evriwan blong kam stret gud evriwan olsem Hem?
Elda Soares: Tangkyu tumas long ol fasin ia blong yufala blong wantem samting we i stret gud blong folem singaot blong Sevya tru ol kwestin ia. Yu nid blong save se Sevya Jisas Kraes i stanap long get blong ol dei blong yumi, wetem ol han blong sore blong Hem we i stret mo rere, i wantem mo save kavremap yumi wetem lav blong Hem. Hem i wantem tumas blong yumi kam olsem Hem, se yumi tingting mo mekem wanem we Hem bae i mekem from Hem i save se Hem i rod ia blong pis mo hapines we i blong oltaem. From hemia, oltaem Sevya i invaetem yumi blong go kolosap long Hem mo folem Hem wetem ful hat blong yumi. Tingting long invitesen blong Hem olsem we oli raetem insaed long ol skripja:
“Lukluk long mi long evri tingting blong [yufala]; no gat tu tingting, no fraet.” Taem yumi akseptem invitesen ia, Sevya i mekem ol bigfala promes blong Hem i hapen, we i tekem tu blong stap wokbaot long laet blong Hem mo stap kasem gaed blong yumiwan long laef blong yumi.
Blong stap mekem laef blong yumi i lukluk moa long Sevya, i nidim yumi blong stretem maen mo ol tingting blong yumi, i go wetem blong Hem. Blong mekem hemia i hapen, yumi nid blong traehad blong lanem abaot Hem, oltaem mekem laef blong yumi i go stret wetem gospel blong Hem, mo mekem wan evri dei hadwok blong lukluk nomo long evri samting we i gud.
Long ol traehad blong yumi blong stretem laef blong yumi wetem Sevya, bae yumi save konfius abaot wanem i minim blong kam stret gud evriwan long Kraes mo laef we i stret gud evriwan. ?Dia, yu save serem wan tingting abaot hemia?
Sista Rosana Soares: Yes. Mi wantem blong ripitim wanem we Elda Vern Stanfill blong Olgeta Seventi i tijim abaot problem ia. Hem i talem se yumi mas tingbaot se fasin blong mekem samting i stret evriwan, i no semmak olsem blong kam stret evriwan tru long Kraes. Fasin blong kam stret evriwan i wan standet we i no posibol we yumiwan yumi mekem, we i blong stap komperem yumi long ol narawan. Hemia i mekem man i harem nogud, mo wari mo i save pulumaot yumi mo mekem yumi stap yumiwan.
Blong stap kam stret evriwan long Kraes i wan defren samting. Hem i wan proses—we Tabu Spirit i givhan wetem lav—blong stap kam moa olsem Sevya. Papa long Heven we i save evri samting i putum ol standet mo mining blong hem i klia insaed long ol kavenan we oli invaetem yumi blong mekem. Taem yumi akseptem invitesen blong Sevya blong kam long Hem, kwiktaem yumi kam blong luksave se wanem yumi mekem i gud tumas i gud inaf mo se gladhat blong wan Sevya we i gat lav, bae i mekemap ples we i stap long ol wei we yumi no save tingting long hem.
Elda Soares: Ol fren blong mi, blong stap pat long paten ia, i nogat wan kwestin, wan stret, proses we i blong oltaem mo i nidim moa bitim wan simpol bilif. Be taem yumi folem, bae yumi eksperiensem glad, pis mo gro long saed blong spirit, mo ol fasin blong Sevya i save kam pat blong fasin blong yumi, mo pikja blong Hem i save stap long fes blong yumi.
Fastaem mi bin luk olsem wanem blong stap putum Sevya i faswan long laef blong yumi i givim paoa blong winim ol hadtaem, fasin blong kam slak mo ol harem nogud blong laef, we oli had tumas blong go tru taem i nogat help mo hiling paoa blong Hem. Mi gat wan fren we naoia i stap eksperiensem wan sik we i series, mo sik blong hem i no stap go gud. Fren ia i no harem nogud long sik ia. Hem i wantem tumas blong save sapos hem i no gat fraet mo strong long testemoni blong hem abaot Sevya Jisas Kraes long laef blong hem. I klia long mi se fren ia i bin putum Sevya i faswan long laef blong hem mo i filim open han blong Hem we i stretem i holem hem, speseli long taem blong wan trabol taem.
Presiden Nelson i tijim: “Hem i [nidim wan] hadwok wetem tingting [mo], oltaem, blong fulumap evri dei laef blong yumi wetem ol toktok blong Hem, ol tijing blong Hem, mo ol trutok blong Hem.” I no gat wan samting we i invaetem Spirit moa bitim taem we yumi lukluk nomo long Jisas Kraes.
Ol dia fren blong mi, mi ting se yumi kam long en blong naesfala eksperiens ia blong yumi tugeta. Bifo mi serem las toktok blong mi, mi wantem invaetem dia fren blong yumi Brata mo Sista Webb mo afta dia waef blong mi, blong serem ol sot testemoni blong olgeta. ?Yu save mekem hemia? Tangkyu.
Sista Kristi Webb: Ol Brata mo Sista, mi lavem Sevya blong yumi Jisas Kraes. Blong kam blong andastanem lav blong Hem we i stret gud evriwan long mi i bin jenisim laef blong mi. Hem i jenisim mi. Mi testifae se Hem i stap laef. Mi testifae se Hem i lavem wanwan long yumi. Mi testifae se Hem i givim laef blong Hem blong pemaot yumi. Eksampol blong fasin blong putum tingting i stap daon, obei mo lav blong Hem i givim insperesen long mi evri dei. Hem i stap tijim mi olsem wanem blong trastem mo givim seves long Papa long Heven. Hem i laet, paoa mo hop blong mi. Long nem blong Jisas Kraes, amen.
Brata Chad H Webb: hem i wan janis blong mifala blong stap wetem yufala long naet ia mo Elda mo Sista Soares. Mi wantem ademap testemoni blong mi abaot koling blong Elda Soares olsem wan Aposol blong Lod Jisas Kraes. Mi save tu se Presiden Nelson i profet blong Lod long wol tedei. MI ademap testemoni blong mi se Papa long Heven i lavem yufala. Hem i gat wan plan we i stret gud evriwan blong hapines blong sevem mo mekem ol pikinini blong Hem i kam olsem ol god. Jisas Kraes Hem i stap long medel blong plan ia we i stret gud evriwan mo Hem i Sevya mo Ridima blong wol. Hem stret eksampol blong yumi. Hem i Kraes we i stap laef. Hem i God blong fasin blong kam fri Yumi save trastem Hem wetem ful hat blong yumi. Mi glad bigwan blong kam wan memba blong Jos Ia blong Hem mo evri blesing we yumi kasem tru long gospel blong Hem we i bin kambak. Long nem blong Jisas Kraes, amen.
Sista Soares: Ol dia fren blong mi, mi talem tangkyu from wan God we i pat blong evri smol samting long laef blong yumi. Hem i save wanem yumi nidim, mo Hem i gat ol ansa long ol kwestin blong yumi. !Yumi nidim blong askem nomo! Taem yumi soem fasin blong yumi blong save wet long taem, tangkyu blong yumi, mo fet blong yumi long Hem tru long ol prea we i kam long hat, oltaem Hem i stap, mo i redi blong helpem yumi. Bae Hem i neva lego yumi. Nomata sapos yumi no filim se Hem i stap, oltaem Hem i stap.
Mo wanem i givim moa hop long mi i blong save se yumi gat wan Sevya we i stap lidim Jos blong Hem long wol ia tru long Presiden Nelson mo ol profet, sia mo reveleta blong Hem. Long nem blong Sevya blong yumi, Jisas Kraes, amen.