Las Testemoni
Divosen blong Ol Yang Adalt Raon long Wol
Sandei, 18 Febwari, 2024
Amen. Tangkyu dia. Ol dia yang adalt fren blong mi raon wol, mi wantem testifae long yufala se pis long laef ia, yumi faenem nomo long Jisas Kraes mo sakrifaes blong atonmen blong Hem. Mi witnes long yufala se strong tingting blong yumi long Hem bae mekem yumi strong blong gohed blong muv i go fored long laef, nomata ol jalenj we yumi go tru long olgeta. Plis tingbaot oltaem se blong stap kam long Hem i givim yumi risen blong gat strong hop, mo givim wan strong angka long ol sol blong yumi, we i givim yumi wan pis insaed we i no save finis, wan ples blong haed long taem blong strong win, mo wan wol we i neva stop blong jenis.
Mi witnes long yufala se ol han blong Hem oli open bigwan mo rere blong raonem yumi wetem lav blong Hem, iven, mo speseli, taem yumi filim se yumi lus, man i nomo laekem yumi, o yumi stap yumiwan nomo. Tabu spes long medel blong han blong Sevya, hem stret saes mo sep blong ol brokbrok hat blong yumi, ol hadtaem long laef, ol sol we oli soa, mo ol wari tingting—oli mekem i spesel, i spesel blong tekem tugeta wanwan long yumi. Jisas i mekem welkam blong Hem i bigwan inaf blong raonem yumi long lav blong hem we i no save finis. Mi testifae long yufala se Hem i oltaem stap kolosap, i stap wet long yumi wetem wan fasin blong wet longtaem, we i wantem blong wokbaot wetem yumi, speseli taem yumi wari mo lukaotem help from ol hevi trabol blong yumi. Mi invaetem yufala blong wokhad blong kam kolosap long Sevya blong yumi, blong faenem Hem long laef blong yufala, mo blong filim hevi blong lav blong Hem from yufala. Taem yufala i mekem olsem, yufala bae save fulumap laef blong yufala wetem laef blong Hem, mo wokbaot wetem Hem.
Mi promesem yufala long nem blong Sevya blong yumi Jisas Kraes se sapos yufala i no ronwe long ol han blong Hem we i open bigwan wetem lav, bae sol blong yufala i fulap wetem wan fulap we bae i fulumap evri rum insaed long sol blong yufala. Mi promesem yufala se taem yufala i lukaot Sevya wetem wan tru hat, hiling paoa blong Hem bae save mo bae fulumap sol blong yu wetem pis blong Hem, laef, andastaning, strong tingting, glad, mo lav.
Mi talemaot promes blong mi long yufala se Jisas Kraes i laef, mo lav blong Hem we i stret gud evriwan, Hem i stap givim i kam long evri man we oli kam long Hem. Jos blong Hem we i kambak bakegen long wol ia long las dispensesen ia i blong rere from seken kaming blong Hem. Mi talemaot tu se God i laef mo lavem yumi, mo Hem i sendem Pikinini Boe blong Hem i kam blong helpem yumi faenem hop, pis, mo glad we i no gat en. Mi glad from yufala. Mifala i respektem yufala, mo mifala i lavem yufala evriwan. Mo mi talem ol samting ia long tabu nem blong Sevya mo Ridima blong yumi, Jisas Kraes, amen.