Stap Stanap Strong Kasem En long Ol Tes blong Laef
Divosen blong Ol Yang Adalt Raon long Wol
Sandei, 18 Febwari, 2024
Elda Ulisses Soares: Gud tumas. Tangkyu. Bae yumi luk ol kwestin we oli go wetem “ol tes blong stap strong kasem en.”
GANA—KWESTIN 7
Elda Soares, mi wantem blong save from wanem, oltaem i had tumas blong stap eksasaesem fet long ol hadtaem.
JILE KONSEPSEN—KWESTIN 8
Halo, Elda Soares. Kwestin blong mi hemia: ?Olsem wanem nao yu save helpem wan we oli safa bigwan long laef blong olgeta, mo i olsem se oli neva bin kasem ol blesing blong gospel blong Jisas Kraes?
SPEN BILBAO—KWESTIN 2
Elda Soares, insaed long Jos yumi gat ol yangfala pipol we oli klin inaf, we oli save go long ol misin mo oli gohed blong blong givim seves, tugeta long Jos mo long komuniti. Be nomata long seves blong olgeta, oli no bin save luk ol promes blesing ia. ?Wanem nao bae yu save talem long ol yangfala pipol ia we oli no bin kasem blesing we oli bin promes se bae oli kasem, long wokbaot blong olgeta long wol ia?
Elda Soares: Tangkyu tumas long ol gudfala kwestin ia. Okei, i gat wan popula toktok we i stap goraon long medel blong plante long yumi se, sapos yumi traehad wetem ful paoa blong tingting blong yumi blong folem tingting blong Lod, stap laef long stret mo gud fasin, bae i no gat ol nogud samting i hapen long long yumi. Taem yumi akseptem plan ia blong Papa long Heven bifo laef long wol ia, yumi bin save se bae yumi eksperiensem bigfala glad mo tu ol tes blong laef mo hadtaem long rod blong yumi long laef ia. Blong stap go tru long hemia, samtaem ol situesen we oli had tumas, oli pat blong rod blong yumi blong stap lan, blong mekem se yumi kwalifae blong gobak long ples blong Papa blong yumi long Heven. So trutok i we, bae yumi fesem ol samting we i kam agens long laef blong yumi nomata hamas laef blong yumi i stap stret mo gud. Long narafala toktok, ol risal blong ol gudfala aksen bae i tru, oli kam, be samtaem, i no kwiktaem. Ol blesing ia bae oli save kam long wan defren taemtebol, be i no folem blong yumi mo folem tingting blong Papa we, tru long waes tingting blong Hem mo from Hem i save evri samting, Hem i save wanem yumi nidim mo wanem i i gud long yumi, long laef ia.
So, wan long ol impoten samting we yumi save mekem taem yumi fesem ol samting we i kam agens long laef ia, i blong tanem hat mo tras blong yumi i go long Sevya. Taem yumi mekem olsem, bae yumi no faenem kamfot nomo we yumi lukaotem, be tu, bae yumi kam antap long fet mo testemoni abaot wanem we i tru long saed blong Sevya mo Atonmen blong Hem. Kraes i safa long ol bigfala harem nogud, ol hadtaem, mo ol temtesen blong evri kaen, mekem se Hem i save fulap wetem sore mo save olsem wanem blong givhan long yumi folem ol samting we yumi no save mekem yumiwan. Sevya Ia, i save mekem, gud moa bitim eniwan, hilim ol risal blong eni situesen we i had blong laef long wol. Long sam situesen, bae yumi no save kam oraet kwiktaem long ol harem nogud blong yumi long saed blong bodi o sik, be yumi save kasem paoa long saed blong spirit blong kam oraet, long andastaning, mo gat tingting blong save wet longtaem blong go tru ol wari we i stap long yumi. So, taem yumi tanem hat blong yumi i go long Sevya, bae Hem i wokem ol sapraes samting insaed long laef blong yumi.
Wan narafala poen blong tingting long hem i we, yumi save lukluk long ol hadtaem mo ol tes blong laef, olsem ol janis blong gro, be i no blong letem ol harem nogud, oli pulum yumi i godaon. Mi givim promes long yufala ol fren blong mi se, blong stap tekem aksen folem wei ia, i save givim ol janis long yumi blong soem long Lod mo long yumiwan se, yumi save, mo bae yumi mekem evri samting we Lod i givim komanmen long yumi blong mekem—mo blong kam kolosap long ol samting we oli gat valiu we oli no save finis nomata, ol situesen blong yumi. !Hem i save se yumi save mekem ol had samting! Hem i givim fulap paoa long yumi.
Olsem we Elda Orson F. Whitney i bin tijim, wan long Ol Aposol blong Restoresen: “I no gat sobodi we yumi safa long hem, i no gat wan tes we yumi stap gotru long hem we i blong westem taem. Hemia i givhan long edukesen blong yumi, blong developem ol kwaliti olsem fasin blong save wet longtaem, fet, strong paoa long tingting mo fasin blong putum tingting i stap daon, … [mo] taem yumi go tru long olgeta wetem fasin blong stap wet longtaem, i bildimap ol fasin blong yumi, mekem hat blong yumi i kam klin, mekem sol blong yumi i gro mo mekem yumi kam moa kaen mo gat moa lav, moa klin inaf blong oli singaotem yumi ol pikinini blong God. … Hem i tru long harem nogud mo safaring, hadwok mo hadtaem, se yu kasem edukesen we yumi kam long ples ia blong kasem.”
Ol fren blong mi, blong stap developem fasin blong stap wet longtaem, i helpem yumi blong luk laef long wan lukluk we i no save finis, mo hemia i kam wan paoa blong hilim sol blong yumi. Blong stap lanem samting tru long ol eksperiens blong yumiwan, i save givim paoa ia blong save andastanem mo gat sore long ol narawan, mo i save help blong stap leftemap olgeta long taem we oli fesem ol hadtaem.
Dia, ?bae yu wantem komen long impoten situesen ia?
Sista Rosana Soares: Yes, dia. I gat ol pipol we oli tekem aksen i defren long ol semmak jalenj o gohed blong safa.
Sam long olgeta, oli ting se, oli mekem olgeta oli kam klin tru long han blong Krieta blong yumi we Paoa blong hem i Hae Tumas, we Hem i God blong yumi. Ol narawan oli ting se Lod i fogetem olgeta mo oltaem oli stap askem, “?From Wanem?” long taem blong ol situesen ia. Ol narawan oli tekem aksen wetem fasin blong stap wet longtaem mo fet long Jisas Kraes, mo oli save luk mo akseptem tingting blong Lod blong helpem olgeta, blong save hilim sol blong olgeta long saed blong spirit. Yumi stap long wol ia blong lan mo gro. Smol afta smol, bae yumi luk ol frut blong ol hadwok blong yumi, yumi gohed nomo blong stap gat fasin blong save wet longtaem. Hem i neva bin isi, mo hemia i from wanem yumi gat Sevya blong yumi, !Jisas Kraes!
Elda Soares: Tangkyu, dia. Ol komen ia oli gud tumas.
Sam long ol jalenj blong yumi oli ol risal blong ol situesen blong laef long wol ia, mo bae oli no gohed i go long nekis laef. Tedei, maet bae yumi no save kasem evri risen blong ol jalenj blong yumi, o ol janis we ol jalenj oli givim long yumi blong yumi gro. Taem yumi stanap strong wetem fasin blong save wet longtaem tru long fasin blong stap stret mo gud, bae Lod i save talemaot long yumi ol bigfala andastaning abaot hadtaem blong yumi mo from wanem oli hapen long laef blong yumi.