Stap Mekem Testemoni blong Yumi I Kam Strong
Divosen blong Ol Yang Adalt Raon long Wol
Sandei, 18 Febwari, 2024
Elda Ulisses Soares: Letem yumi statem fas topik, “stap mekem testemoni blong yumi i kam strong moa.”
JILE KONSEPSEN—KWESTIN 2
Elda Soares, kwestin blong mi hem i, ?Olsem wanem nao bae mifala i luksave taem we mifala i stap slip long saed blong spirit, mo olsem wanem nao mifala save kamaot long hemia?
BOLIVIA LA PAS—KWESTIN 6
Elda Soares, ?wanem kaonsel bae yu givim long ol yangfala pipol we oli laef folem gospel, we oli save long maen blong olgeta se i tru, be oli no filim long hat blong olgeta?
JILE KONSEPSEN—KWESTIN 11
Halo, Elda Soares. Kwestin blong mi hem i, ?Wanem nao bes wei blong helpem olgeta we yumi lavem, blong oli kambak long rod blong gospel, afta we oli nomo kam long jos blong plante yia?
Elda Soares: Ol dia fren blong mi, wan tru testemoni blong gospel i wan witnes blong wanwan man o woman we Tabu Spirit i karem i kam long ol sol blong yumi we i talem ol stret impoten samting we oli no save finis se oli tru. Witnes ia blong wanwan man o woman i stap krietem wan strong tingting long hat we i stap gro insaed long yumi we i wantem tanem hat blong yumi i go long Sevya tru long fet mo sakem sin, mo kasem eksperiens blong wan laef we i jenis, kasem ol odinens blong sevem man, mo kavenan blong gohed blong folem Hem truaot long laef blong yumi long wol ia. Hemia i tekem i kam laet blong gospel blong Jisas Kraes we i bin kambak, i kam insaed long laef blong yumi mo mekem yumi evriwan i lukluk nomo i go from semmak gol blong gobak long Papa blong yumi long Heven. Wan strong testemoni i kam paoa blong yumi blong mekem gud moa long laef ia, mo wan strong wol we i raonem yumi we i protektem yumi long ol atak blong Setan we i stap gohed oltaem.
Sevya i mekem wan wei long yumi blong mekem testemoni blong yumi i kam strong moa mo blong stopem ol filing blong kam slak mo stap foldaon long trap blong nogat paoa blong wantem gro long saed blong spirit. Hem i talem, “Lanem samting aot long mi, mo lisin long ol toktok blong mi; wokbaot wetem fasin blong no stap flas we i kam long Spirit blong mi, mo bae yu kasem pis long mi.” Lod, Hemwan i mekem promes se bae Hem i save lidim ol rod blong yumi sapos yumi save akseptem invitesen ia.
Sam yia i pas, dia profet blong yumi, Presiden Russell M. Nelson, i bin tijim abaot nid blong kasem paoa blong faea long saed blong spirit. Hem i talem, “Yumi neva nidim gud paoa blong faea blong spirit moa bitim we yumi nidim naoia, blong stopem spid we ivel mo ol saen blong tudak blong taem, blong kam strong moa.” Hem i givim faef stret samting we yumi save mekem hemia blong helpem yumi blong oltaem gat paoa blong faea long saed blong spirit mo olsem wan risal, i save givim paoa long testemoni blong yumi abaot gospel blong Jisas Kraes. Hemia olgeta: (1) kam long kavenan rod mo stap ia, (2) faenemaot glad ia blong sakem sin evri dei, (3) lanem abaot God mo hao Hem i wok, (4) lukaotem mo wet long ol merikel, mo (5) endem raorao insaed long laef blong yuwan. Ol dia fren blong mi, olsem oltaem ol profet oli stap mekem, ol tijim blong olgeta i kam wetem ol promes: “Taem yu tekem aksen folem ol samting we yu stap wok from, mi promesem yu se bae yu gat paoa blong muv fored long kavenan rod ia, wetem moa paoa blong faea blong spirit, nomata wanem samting yu fesem. Mo mi promesem se bae yu gat moa paoa blong stanap agensem temtesen, moa pis long maen, yu fri long fraet, mo gat moa yuniti insaed long famli blong yufala.” Hemia i wanem we profet i bin talem.
Ol fren blong mi, fet i hapen tru long aksen, mo ol aksen oli gro mo mekem testemoni blong yumi i kam strong moa. Taem yumi tekem aksen folem fet long ol samting we dia profet blong yumi i bin tijim, testemoni blong yumi abaot Sevya mo gospel blong Hem, bae oli kam strong moa; bae yumi kipim Kraes i laef moa insaed long yumi, mo bae yumi laef long wan wei we laef blong yumi i “tekem rus mo i stanap long Hem, mo i strong i stap long fet, mo yumi talem tangkyu plante from.” Wanem we i impoten i we, bae yufala gat moa intres long gospel, oltaem, bae yufala filim paoa blong Tabu Spirit long laef blong yufala, mo bae yufala i kam strong moa long saed blong spirit blong protektem yufala agensem filing blong nogat paoa blong wantem gro long saed blong spirit mo gat wan testemoni we i kam slak.
Dia, ?yu gat wan toktok abaot stap helpem ol narawan blong kambak long rod blong kavenan, we oli bin lusum testemoni blong olgeta?
Sista Rosana Soares: Yes. Mi bilivim, mo oltaem bilivim se bes wei blong help blong tekem wan we yu lavem hem blong kambak long rod blong gospel, i blong lavem God mo man o woman ia bigwan, mo blong traem bes blong stap wan gudfala eksampol. Yufala save leftemap tingting blong olgeta blong kam blong save God mo glad long lav blong God we i stret gud evriwan, be i no blong stap talem ol toktok we i no stret blong jajem olgeta o mekem oli filim se oli no impoten. Taem, moa yumi lavem God mo obei ol komanmen blong Hem, bae yumi filim moa lav blong man o woman ia, mo wantem blong hem i glad long ol blesing blong gospel, nomata weaples oli stap long rod blong fasin blong stap wan disaepol. Mi ting se ol pipol oli mas filim lav, nomata sapos ol desisen blong olgeta i stap tekem olgeta i go longwe long rod blong kavenan.