Stap Folem Plan we God I Gat long Yumi
Divosen blong Ol Yang Adalt Raon long Wol
Sandei, 18 Febwari, 2024
Elda Ulisses Soares: Nekis topik blong yumi hem i “stap folem plan we God i gat long mi.”
Afta we mi lisin long ol kwestin blong yufala, mi wantem invaetem Brata Webb blong serem ol tingting blong hem abaot topik ia. ?Hemia i oraet?
FILIPINS SEBU—KWESTIN 8
Elda Soares, mi wantem askem wan kwestin. ?Wetaem nao yu bin save long yuwan se i tru God i stap long smosmol samting we i hapen long laef blong yu?
Brasil—KWESTIN 3
Elda Soares, ?Olsem wanem nao bae mi save sapos mi stap laef folem wanem we Papa long Heven i wantem long mi mo se Hem i akseptem ol joes we mi mekem?
Brata Chad H Webb: Fastaem we mi filim hemia, i taem we mi kasem petriakel blesing blong mi. Spirit i bin helpem mi blong save se Lod i bin save mi mo i wantem helpem mi long evri pat blong laef blong mi. Stat long taem ia kasem tedei, i bin gat plante taem we mi bin luk mi filim hemia. Yes, olsem wan misinari, mi bin luk han blong Hem long laef blong mi mo long laef blong plante pipol long ples ia long Meksiko. Bifo long misin blong mi, mi bin stap sem tumas mo fraet blong toktok wetem ol pipol. Long taem blong misin blong mi, Lod i bin blesem mi long ol gudfala wei, mo oli bin jenisim ful laef blong mi.
Be fevret eksampol blong mi i, olsem wanem Hem i bin helpem mi blong mitim Kristi. Bifo we mitufala i mit, mi bin aplae from wan wok we mi wantem tumas. Mi harem nogud bigwan taem we hemia i no bin go tru mo mi tingbaot mi mekem wan prea we i no naes, mi stap talem long Lod se hemia i no stret. Tingting blong mi i rong taem mi stap tingting se, mi stap traem blong laef folem gospel, Hem i mas givim wanem we mi mi wantem. Sam wik i pas, wan merikel i hapen mo mi bin save kasem wan narafala wok. Wok ia i lidim mi blong mitim Kristi. Hem i wan longfala stori, be wanem we i tru, i we, sapos ol samting i bin hapen folem tingting blong mi abaot fas wok ia, bae mi neva mitim hem. Mi save pikjarem long maen nomo wanem tingting blong Papa long Heven long taem blong prea blong mi ia we i no naes. Maet bae Hem i talem se, “?Bae yu save gat fasin ia blong save wet long taem? Mi gat wan plan. Mi gat wan samting we i moa gud blong yu sapos nomo bae yu trastem mi.” Mi glad tumas se Hem i bin gat kontrol long laef blong mi be i no mi. Mi bin lanem se Hem tu i stap wok long ol smosmol samting we i stap hapen long laef blong yumi, mo se Hem i save mekem plante moa samting long laef blong yumi bitim we yumi save mekem yumiwan. Mi no save se bae i bin olsem wanem, sapos i no bin Kristi. Mi glad tumas se Hem i save moa bitim wanem we mi mi nidim. Wanem we mi bin lanem i we, yumi save trastem Hem wetem ful hat blong yumi.
Elda Soares: Tangkyu long gudfala tijing blong yu, Brata Webb. Ol dia fren blong mi, i tru God i gat wan plan blong yumi. Plan blong Hem i laef we i no save finis. Mi testifae long yufala se taem yumi yusum fridom blong mekem joes blong yumi mo mekem ol desisen long stret mo gud fasin, yumi stap soem hamas yumi stap folem gud plan blong God blong yumi.