Pasiuna
Tibuok Kalibotan nga Debosyonal alang sa mga Young Adult
Dominggo, Pebrero 18, 2024
Akong minahal nga mga young adult gikan sa tibuok kalibotan, kini usa ka dako nga panalangin ug usa ka pribilihiyo alang kanamong tanan nga makauban kamo niining tibuok kalibotan nga CES nga young adult nga debosyonal. Gikalipay usab namo nga makauban kanato karong gabhiona si Brother Chad Webb, kinsa giubanan sa iyang minahal nga asawa, si Kristi. Si Brother ug Sister Webb mga matinud-anon nga mga disipulo ni Jesukristo ug talagsaon nga mga ehemplo sa debosyon ug gugma sa matag aspeto sa ilang kinabuhi.
Mahinamon kaayo kami sa inyong presensiya karon dinhi niini nga debosyonal. Ang inyong pagtambong nagpakita og dako mahitungod sa inyong hugot nga pagtuo sa Dios ug ni Jesukristo ug sa inyong tinguha nga mobati sa Ilang gugma ug mosunod Kanila. Samtang modesisyon kamo nga mosunod ug mosimba Kanila, ang inyong kinabuhi mapun-an og dugang nga kusog ug espirituwal nga kalig-on nga gikinahanglan kaayo sa atong panaw isip Iyang mga disipulo sa atong panahon. Gihigugma namo kamong tanan!
Nagdala ako nganha kaninyong tanan sa madasigon ug mainiton nga mga pagtimbaya ug gugma gikan sa atong minahal nga propeta, si Presidente Russell M. Nelson, gikan sa iyang mga magtatambag sa Unang Kapangulohan, ug sa tibuok Korum sa Napulog Duha ka Apostoles. Sila tinud-anay nga nahigugma ug nagpakabana kaninyo ug makanunayon nga nag-ampo alang sa inyong kaayohan. Naglaom ako nga inyong mabati ang ilang gugma ug ilabi na sa gugma sa Dios ug ni Kristo atol sa atong debosyonal karon.
Nalipay gayod ako sa dinasig nga awit nga gipasundayag ganina lang. Ang dinasig nga mga pulong niining minahal nga himno mipahiluna gayod sa atong debosyonal karong gabhiona ug naghatag kini og tubag sa usa sa labing halawom nga pangamuyo sa atong kasingkasing: “Ang kalinaw asa ko pangitaa?”
“Gustong masayod asa moadto?
“Hain, ang mohupay nimo nga bukton?
“Kinsay makasabot?
“Siya lamang.”
“Gugma’g kabuotan,
Diha sa pasilyo sa Bilding sa Buhatan sa Simbahan sa Dakbayan sa Salt Lake, adunay usa ka matahom nga painting ni Jesukristo uban sa Iyang mga bukton nga gituyhad ngadto sa Iyang disipulo. Ang Manluluwas migahin sa Iyang kinabuhi sa yuta nga nagdapit sa mga tawo nga moduol ngadto Kaniya, ug Siya maluluy-on nga mipaneguro kanila nga sa dihang sila moduol nga sila “makakaplag og pahulay alang sa [ilang] mga kalag.”
Si Jesukristo nagbarog diha sa mga ganghaan sa atong inadlaw nga mga kinabuhi nga adunay bukas nga mga bukton, ug Siya nanawag kanato, nagpahayag, “Ako mogakos kanimo sa mga bukton sa akong gugma.” Bisan kon kita nadagma o nagbarag-barag, kita mahimong modangop sa Iyang bukas nga mga bukton, mobati sa Iyang hingpit nga gugma, ug masayod nga ang luna taliwala sa Iyang mga bukton gipahinungod, pinaagi sa Iyang mahigugmaon, maulaon nga sakripisyo, isip usa ka dapit alang kanato. Pagkanindot nga paagi sa pagpangita og kalinaw dinhi niining makaugtas kaayo nga kalibotan.
Diha sa diwa sa pagpangita og kalinaw pinaagi sa Manluluwas, among gidapit ang mga estudyante sa insititute sa tibuok kalibotan sa pagpakigbahin sa ilang nag-unang mga kabalaka ug mga pangutana kanamo. Girekord nila ang ilang mga pangutana sa mugbo nga mga bidyo clip ug gipadala kini nganhi kanamo. Kami nadani ug natandog gayod sa tinud-anay nga pagkamaayo nga gipahayag pinaagi niini nga mga bidyo. Mabati gayod namo ang inyong tinguha nga mas magpaduol ngadto sa Manluluwas ug mahimong Iyang mapahinungoron nga mga disipulo.
Gigrupo namo kining mugbo nga mga bidyo pinaagi sa hilisgotan sama sa mosunod: (1) Pagpalig-on sa atong pagpamatuod, (2) paglahutay sa mga pagsulay, (3) pagsunod sa plano sa Dios alang kanato, (4) pagpangandam sa pagsulod ug pagsimba sa templo, ug (5) pagtutok sa atong kinabuhi diha ni Jesukristo.
Pakit-on namo kamo og gipili nga mga bidyo bahin sa inyong mga pangutana aron sa paghatag kaninyo og gamayng konteksto ug isip pasiuna ngadto sa matag hilisgotan sa atong panaghisgot karong gabhiona. Si Brother ug Sister Webb moapil kanato samtang hisgotan nato ang pipila niini nga mga hilisgotan, magpakigbahin sa ilang kaalam ug sa ilang talagsaon nga pagpamatuod sa ebanghelyo ni Jesukristo.
Daghan kaayong salamat. Kami nahigugma kaninyong tanan, ug ang mga pangutana nga inyong gipadala nagsulti kanamo kon unsa ka dako ang inyong gugma sa atong Manluluwas nga si Jesukristo.