Paglahutay sa mga Pagsulay
Tibuok Kalibotan nga Debosyonal alang sa mga Young Adult
Dominggo, Pebrero 18, 2024
Elder Ulisses Soares: Maayo kaayo. Salamat. Atoa na karong tan-awon ang mga pangutana kalabot sa “paglahutay sa mga pagsulay.”
GHANA—PANGUTANA 7
Elder Soares, Ganahan ko nga masayod kon nganong kanunayng lisod kon kabahin na gani sa pagpakita og hugot nga pagtuo diha sa malisod nga mga panahon.
CHILE CONCEPCIÓN—PANGUTANA 8
Hello, Elder Soares. Ang akong pangutana mao ang mosunod: Unsaon man nimo pagtabang sa usa ka tawo nga hilabihan nga nag-antos diha sa kinabuhi nga daw sila wala gayod makadawat sa mga panalangin sa ebanghelyo ni Jesukristo?
SPAIN BILBAO—PANGUTANA 2
Elder Soares, sa Simbahan kita adunay takos nga batan-ong katawhan nga nakaserbisyo og mga misyon ug kinsa nagpadayon sa pagserbisyo sa Simbahan ug sa komunidad. Apan bisan pa man sa ilang pagserbisyo, sila wala nakakita sa gisaad nga mga panalangin. Unsa man ang imong ikasulti niadtong mga batan-ong katawhan kansang panaw sa yuta dili ingon niana ka bulahan sama sa gisaad ngadto kanila?
Elder Soares: Salamat kaayo alang niadto nga talagsaong mga pangutana. Kuan, usa ka komon kaayo nga sayop nga pagsabot sa kadaghanan nato mao nga kon kita maningkamot sa tanan natong gahom sa pagsunod sa kabubut-on sa Ginoo, pagpuyo og usa ka matarong nga kinabuhi, wala nay bati nga mahitabo kanato. Sa dihang kita midawat sa plano sa atong Langitnong Amahan sa wala pa sa mortalidad, kita nasayod nga kita makasinati og hingpit nga kalipay ingon man mga pagsulay atol sa atong panaw latas sa mortal nga kinabuhi. Ang pagpadayon latas niining usahay malisod nga mga kahimtang mao ang kabahin sa atong proseso sa pagkat-on aron mosarang sa atong pagbalik ngadto sa presensiya sa atong Langitnong Amahan. Busa ang kamatuoran mao nga kita moatubang og mga kalisdanan sa atong kinabuhi dili igsapayan kon unsa kita ka matarong. Sa laing bahin, ang mga sangpotanan sa maayo nga mga buhat segurado nga moabot apan usahay dili diha-diha dayon. Kini nga mga panalangin mahimong moabot sa panahaon nga sukwahi sa atong gilaoman ug sumala sa kabubut-on sa Amahan kinsa, sa Iyang kaalam ug kahibalo sa tanang butang, nasayod unsa ang atong gikinahanglan ug unsa ang labing maayo alang kanato niining kinabuhia.
Busa usa sa labing importante nga mga butang nga atong mahimo kon kita mag-atubang og kalisdanan sa mortal nga kinabuhi mao ang idangop ang atong kasingkasing ug mosalig ngadto sa Manluluwas. Kon kita mobuhat sa ingon, kita dili lang makakaplag sa kahupay nga atong gipangita apan makabaton usab og pagsaka sa hugot nga pagtuo ug pagpamatuod sa reyalidad sa Manluluwas ug sa Iyang Pag-ula. Giantos ni Kristo ang mga kasakit, mga balatian, ug mga tintasyon sa matag matang aron siya mapuno sa kaluoy ug makahibalo kon unsaon sa pagtabang kanato sumala sa atong mga kakulangan. Ang Manluluwas makahimo, labaw ni bisan kinsa, sa pag-ayo sa mga epekto sa bisan unsang mga sirkumstansiya sa mortalidad. Sa piho nga mga okasyon, kita tingali dili diha-diha dayon maayo sa pisikal nga paagi gikan sa atong kasakit o balatian, apan kita mahimong maayo sa espirituhanong paagi pinaagi sa gihatag nga kalig-on, pagsabot, ug pailob sa pagdala sa mga palas-anon ngari kanato. Busa kon atong idangop ang atong kasingkasing ngadto sa atong Manluluwas, Siya makahimo og katingalahan sa atong kinabuhi.
Laing punto nga ikonsiderar mao nga kita makatan-aw sa atong mga pagsulay isip mga oportunidad sa paglambo kay sa pagtugot sa atong mga kaugalingon sa pagbati og kaguol tungod niini. Ako mopasalig kaninyo, akong mga higala, nga ang paglihok niining paagiha makahatag kanato og mga oportunidad sa pagpakita sa Ginoo ug sa atong kaugalingon nga kita makahimo sa tanang butang nga gisugo sa Ginoo nga atong buhaton—ug mas magkaduol sa mga butang nga adunay mahangtorong bili bisan pa sa atong mga sirkumstansiya. Siya nasayod nga kita makahimo sa lisod nga mga butang! Siya naghatag kanato og dakong gahom.
Sama sa gitudlo ni Elder Orson F. Whitney, usa sa mga Apostol sa Pagpahiuli: “Walay kasakit nga atong giantos, walay kasakit nga atong nasinati ang makawang. Kini mangalagad sa atong edukasyon, sa kaugmaran sa maong mga kalidad sama sa pailob, hugot nga pagtuo, kalig-on, ug pagkamapainubsanon, … [ug] kon kita mapailobon nga naglahutay niini, makapalig-on sa atong mga kinaiya, makapalimpyo sa atong mga kasingkasing, makapalambo sa atong mga kalag, ug makapahimo kanatong mas malumo ug manggiluy-on, mas takos nga matawag nga mga anak sa Dios. … Pinaagi sa kasubo ug pag-antos, paningkamot ug kalisdanan, nga kita makaangkon sa edukasyon nga maoy atong gianhi aron maangkon.”
Akong mga higala, ang pag-ugmad og pailob makatabang kanato sa pagtan-aw sa kinabuhi gikan sa usa ka mahangtoron nga panglantaw, ug kini mamahimong usa ka makaayo nga impluwensiya sa atong mga kalag. Pinaagi sa pagkat-on sa atong kaugalingong kasinatian, kita makabaton og pagbati ug kapuangoron alang sa uban ug mamahimong makatabang diha sa pagbayaw kanila sa ilang mga panahon sa kalisdanan.
Pinangga, gusto ba nimong mokomentaryo kabahin niining importanteng butang?
Sister Rosana Soares: Oo, palangga. Adunay mga tawo nga lahi og reaksiyon ngadto sa sama nga mga hagit o makanunayon nga pag-antos.
Pipila kanila maghunahuna nga sila gilunsay diha sa mga kamot sa Labawng Tiglalang, nga mao ang atong Dios. Ang ubang tawo maghunahuna nga ang Ginoo nakalimot kanila ug kanunayng mangutana “Ngano?” sa atubangan niining mga sirkumstansiya. Ang uban molihok uban ang kamapailobon ug hugot nga pagtuo diha ni Jesukristo ug nakakita ug midawat sa kabubut-on sa Ginoo ngadto kanila aron maayo sa espirituhanong paagi ang ilang mga kalag. Kita ania sa yuta aron makakat-on ug molambo. Sa ginagmay nga paagi, atong makita ang mga bunga sa atong mga paningkamot; kita kinahanglan lang gayod nga magpadayon ug magmapailobon. Dili gayod kini sayon, ug mao kana nganong aduna kitay Manluluwas nga si Jesukristo!
Elder Soares: Salamat, pinangga. Salabuton kaayo nga mga komentaryo.
Ang pipila sa atong mga hagit maoy resulta sa mga kondisyon sa mortalidad, ug kini dili mopadayon ngadto sa sunod nga kinabuhi. Karon dili tingali nato masabtan og ayo ang tanang mga rason sa atong mga hagit o sa mga oportunidad nga ilang gihatag kanato aron sa paglambo. Kon kita mapailobon nga molahutay diha sa pagkamatarong, ang Ginoo mahimong mopadayag ngari kanato og mas dakong pagsabot mahitungod sa atong mga pagsulay ug sa katuyoan niini diha sa atong mga kinabuhi.