Pagpangandam sa Pagsulod ug Pagsimba diha sa Templo
Tibuok Kalibotan nga Debosyonal alang sa mga Young Adult
Dominggo, Pebrero 18, 2024
Elder Ulisses Soares: Nakadawat kami og daghang maayo nga mga pangutana kalabot sa usa sa mga paborito nga hilisgotan ni Presidente Russell M. Nelson: “pagpangandam sa pagsulod ug pagsimba diha sa templo.”
Brother ug Sister Webb, mahimo ba nga inyo usab nga ipakigbahin ang inyong mga hunahuna niini nga hilisgotan human maminaw niining nakarekord nga mga pangutana?
CANADA EDMONTON— PANGUTANA 1
Elder Soares, ang akong pangutana kay unsaon nako pagpangandam sa pag-adto sa templo sa unang higayon ug pagdawat sa akong mga pagtuga?
CANADA EDMONTON— PANGUTANA 2
Elder Soares, unsaon nako pagkahibalo kon andam na ba ako nga modawat sa akong mga pagtuga?
CHILE CONCEPCION— PANGUTANA 3
Hello, Elder Soares. Duna koy pangutana. Unsaon nako paghimo sa pagtambong sa templo nga mas makahuloganon ug mas importante nga bahin sa akong kinabuhi?
Brother Chad H Webb: Nindot kaayo ug importante kana nga pangutana.
Ang unang butang nga akong isugyot mao ang pagpangandam sa espirituhanong paagi. Pagkat-on sa pagpaminaw sa tingog sa Ginoo ug pagsanong sa mga pag-aghat. Paningkamot nga mahimong limpyo sa moral nga paagi ug likayi ang mga butang nga mopugong sa Espiritu sa inyong kinabuhi. Kon nakahimo kamo og mga sayop, paghinulsol ug pagpakatakos nga mosulod sa balay sa Ginoo. Bisan diin pa kamo gikan sa inyong kinabuhi, ang Pag-ula ni Jesukristo makatabang ninyo. Tungod Kaniya, mamahimo kamong takos. Motabang Siya kaninyo.
Sister Kristi Webb: Ang laing sugyot mao ang pag-istorya bahin sa templo uban sa kasaligan nga mga sakop sa pamilya, mga lider, o mga higala. Ang templo sagrado, apan dili ang tanan bahin niini kay kompidensiyal, ug pwede tang maghisgot pa og daghan bahin sa templo kay sa atong buhaton usahay. Ug nagtuo ko nga makatabang kana sa dili pa ug pagkahuman sa imong unang pagtambong. Nindot ang daghang pangutana; ingon niana ang atong pagkat-on, mao nga dad-a ang inyong mga pangutana ngadto sa mga tawo nga inyong masaligan, kinsa naghigugma sa templo ug naghupot niini nga sagrado. Labaw sa tanan, dad-a ang inyong mga pangutana ngadto sa Ginoo. Ang pagkanaay mga pangutana maoy labing maayong paagi sa Ginoo sa pagtudlo kanato pinaagi sa pagpadayag. Ug kon magsige mo og tambong sa templo, mas daghan Siya og matudlo ninyo.
Brother Webb: Ang kataposan nga usa ka sugyot mao ang pagtuon. Pagkat-on kutob sa inyong mahimo mahitungod sa templo. Ang usa sa labing maanindot nga dapit sa pagbuhat niana mao ang ChurchofJesusChrist.org/temples, diin makakat-on kamo og dugang mahitungod sa pagtuga, sa garment sa templo, ug ilabi na nga makat-on mahitungod sa matag pakigsaad nga inyong himoon sa sulod sa templo. Kana nga site makatabang kaayo.
Isip kabahin sa inyong pagtuon, pagkat-on kutob sa inyong mahimo mahitungod sa simbolokanhong mga butang sa templo. Para nako, ang usa sa labing maayong mga paagi sa pagpangandam aron makasabot sa templo mao ang pagkat-on mahitungod sa karaang tabernakulo nga gihulagway diha sa Daan nga Tugon. Ang mga simbolo sa bag-ong mga templo lahi kay sa karaang mga panahon, apan ang mga baroganan ug mga katuyoan parehas kaayo ug makatabang nato sa pagpangandam alang sa atong kaugalingong kasinatian sa templo.
Kadto nga mosulod sa karaang tabernakulo moadto una sa altar, diin mohalad sila og mga sakripisyo nga may kalabotan sa maulaong sakripisyo sa Manluluwas. Hugasan sila diha sa dakong kopa sa tubig ug dihogan og lana ug hatagan og sagrado nga sapot. Usab sulod sa tabernakulo adunay tolda nga gitawag og Dapit nga Balaan diin gibutang nila ang menorah, nga nagsimbolo sa pagpakabuhi uban sa Espiritu o kahayag sa Dios. Ang lamesa sa pan ug bino, parehas nga mga simbolo sa sakramento. Aduna usab kini altar sa insenso, nga nagrepresentar sa pag-ampo. Ang kataposan nga bahin sa tabernakulo mao ang Dapit nga Labing Balaan, diin gipahimutang ang Arca sa Tugon ni Jehova ug ang Halaran-sa-Pagpasig-uli. Ang labaw nga pari [high priest] lamang ang makaagi lahos sa tabil ug mosulod ngadto sa Dapit nga Labing Balaan, ug mahitabo kadto makausa lamang ka adlaw sa usa ka tuig, sa adlaw sa Pag-ula. Ang dapit sa gawas nga hawanan nagrepresentar sa telestial nga gingharian; ang Dapit nga Balaan, sa terrestrial nga gingharian; ug ang Dapit nga Labing Balaan, sa celestial nga gingharian. Kini nga ang-ang sa pag-uswag lahos sa tabernakulo nagtudlo sa karaang Israel mahitungod sa ilang panaw latas sa mortalidad, inubanan sa kinatas-ang tumong sa pagsulod sa presensiya sa Dios.
Sa unsay akong gihunahuna nga usa sa labing dakong mga simbolo sa kasaysayan sa kalibotan, dihang si Jesus gilansang sa krus, dihay linog ug ang tabil sa templo ni Herod nagisi sa tunga, nagsimbolo nga karon nakompleto na ang Pag-ula, ang tanan adunay kahigayonan nga mosulod sa celestial nga gingharian, o sa presensiya sa Dios.
Bisan gani ang mga kolor sa tabernakulo—asul, pulang-lagumon [purple], pula, ug puti—adunay simbolokanhong kahulogan. Ang asul sa kasagaran gihunahuna nga nagrepresentar sa langit, ang pulang-lagumon mao ang karaang simbolo sa pagkaharianon, ang pula nagpahinumdom kanato sa dugo ni Jesukristo, ug ang puti sa kasagaran gigamit isip simbolo sa kaputli. Gihiusa diha sa mga kortena sa tabernakulo ug sa mga sapot sa mga kaparian, kini sila makatudlo sa atong mga hunahuna ngadto sa ideya nga pinaagi kini sa harianong dugo sa langit nga kita mahimong putli.
Mao kana ang rason nga moadto kita sa templo—aron makat-on unsaon sa pag-angkon sa tibuok nga gahom sa maulaong sakripisyo ni Jesukristo sa atong kinabuhi. Nakat-on kita nga pinaagi sa mga pakigsaad ug mga ordinansa sa templo, ug pinaagi sa Manluluwas, makapangandam kita sa pagbalik ngadto sa presensiya sa Dios, limpyo ug putli. Sa templo makat-on kita mahitungod ni Adan ug ni Eva ug kon giunsa sila pagpalayo sa presensiya sa Dios ug giunsa nila pag-andam aron makabalik ngadto Kaniya. Pinaagi sa ilang asoy makat-on kita kon unsaon sa pagpangandam alang nianang maanindot kaayo nga adlaw. Si Presidente David O. McKay miingon nga ang templo “mao ang anam-anam nga pagsaka ngadto sa mahangtorong Presensya. Kon ang atong mga batan-on makadaklit lamang og lantaw niini, mao kini ang labing gamhanang espirituwal nga pagdasig sa ilang kinabuhi.”
Mao nga kon moadto mo sa templo, pangitaa si Jesukristo ug tan-awa unsay inyong nakat-onan mahitungod sa pagpangandam nga maanaa sa presensiya sa Langitnong Amahan, ug makaangkon kamo og talagsaong kasinatian.
Sister Kristi Webb: Puede ba nga motubag ko sa pangutana “Unsaon nako pagkahibalo kon andam na ako nga modawat sa mga pagtuga?”
Sa ubang rason, kini nga pangutana nakapahunahuna nako ni propeta Abraham. Dihay panahon sa kinabuhi ni Abraham sa dihang gibati niya ang dinasig nga tinguha alang sa dugang nga espirituwal nga kahayag ug kahibalo. Nagtinguha siya og mas suod nga relasyon ngadto sa Dios ug mas dako nga kapasidad sa pagserbisyo Kaniya. Diha sa Abraham 1:2 miingon siya: “Ug, sa pagkakita nga adunay labaw pa nga kalipay ug kalinaw ug kapahulayan alang kanako, ako mitinguha sa mga panalangin sa akong mga amahan.” Dinhi gihulagway ni Abraham ang iyang kaugalingon nga “usa ka sumusunod sa pagkamatarong, nagtinguha usab nga mahimo nga usa kinsa makaangkon og dako nga kahibalo, ug mahimo nga usa ka labaw nga sumusunod sa pagkamatarong, ug makaangkon og dako nga kahibalo … ug nagtinguha sa pagdawat og mga panudlo, ug sa paghupot sa mga sugo sa Dios.”
Mao kini ang akong gibati dihang nagsugod ko sa paghunahuna mahitungod sa pag-adto sa templo aron modawat sa akong pagtuga. Puno na ang akong kadasig sa pagsunod sa ebanghelyo. Nagkat-on ko og daghan kaayo gikan sa akong pagtuon sa kasulatan, ug nagtubo ko ug nagserbisyo nga malipayon sa akong ward. Apan gibati nako ang hilabihan nga tinguha sa pagkat-on og dugang pa mahitungod sa Langitnong Amahan ug sa Iyang plano para kanako. Labaw pa kini sa pagkakuryoso, gibati nako ang hilabihan nga tinguha sa pagkat-on kon unsaon nga mas mapaduol sa Dios ug mahimong mas makanunayon nga disipulo ni Jesukristo. Gusto gayod nako nga tugotan ang Dios nga mas mopatigbabaw pa sa akong kinabuhi. Ang akong suod nga mga higala ug ang akong bishop nakahibalo nga andam na ako nga mohimo og mga pakigsaad sa templo ug mitabang nako sa pagpangandam aron makadawat sa akong kaugalingong pagtuga.
Elder Soares: Maayo kaayo. Salamat kaayo sa inyong maanindot kaayo nga mga komentaryo, Brother ug Sister Webb. Minahal nga mga higala, sama sa gitudlo ni Presidente Nelson, “Ang indibidwal nga katakos aron makasulod sa balay sa Ginoo nagkinahanglan og dakong indibidwal nga espirituhanong pagpangandam. … Ang indibidwal nga katakos nagkinahanglan og hingpit nga pagkakabig sa hunahuna ug sa kasingkasing aron mahimong mas sama sa Ginoo, … aron mahimong mas maayong ehemplo, ug mahimong mas balaan nga tawo.” Busa, kon atong tutokan sa matarong nga paagi ang atong pagpangandam sa pagsulod sa templo, atong mausab ang atong kasinatian diha sa templo, nga maoy mousab sa atong kinabuhi sa gawas sa templo.