Pagsentro sa Atong Kinabuhi diha ni Jesukristo
Tibuok Kalibotan nga Debosyonal alang sa mga Young Adult
Dominggo, Pebrero 18, 2024
Elder Ulisses Soares: Ang tanang maanindot nga pangutana nga atong nahisgotan karong gabhiona natapos sa labing importante nga hilisgotan nga inyong gidala ngari namo alang sa atong debosyonal: “pagtutok sa atong kinabuhi diha ni Jesukristo.”
Bidyo, palihog.
BOLIVIA LA PAZ—PANGUTANA 3
Elder Soares, duna koy pangutana. Unsaon nato, sa usa ka masamok nga kalibotan, pagpalambo og mas dakong pagsalig sa Manluluwas ug mas makapandan-ag sa kahayag ni Jesukristo niini nga kalibotan?
SIYUDAD SA MEXICO #1—PANGUTANA 4
Elder Soares, unsaon nako nga makapaduol ngadto sa gahom sa Dios ug, pinaagi sa pagbuhat sa ingon, mopalambo sa akong kinabuhi ug makahimo sa pagtabang sa uban?
PILIPINAS CEBU—PANGUTANA 9
Elder Soares, gusto kong mangutana, Unsaon nato sa pag-ila sa pagkamahingpiton (perfectionism) gikan sa pagdapit ni Kristo nga magmahingpit sama Kaniya?
Elder Soares: Daghan kaayong salamat sa inyong matarong nga tinguha sa pagsunod sa Manluluwas nga gipadayag pinaagi niini nga mga pangutana. Kinahanglan kamong masayod nga ang atong Manluluwas nga si Jesukristro nagbarog sa ganghaan sa atong mga panahon, pinaagi sa Iyang maluluy-ong mga bukton nga gituyhad nga andam, masugtanon, ug makahimo sa pagliyok kanato uban sa Iyang gugma. Siya nagtinguha nga kita mahimong sama Kaniya, nga kita maghunahuna ug molihok sama Kaniya tungod kay Siya nasayod nga kana mao ang paagi nga makabaton og maluntarong kalinaw ug kalipay. Tungod niini, ang Manluluwas sa kanunay nga nagdapit kanato sa pagpaduol ngadto Kaniya ug sa pagsunod Kaniya sa tibuok kasingkasing. Ikonsiderar kini nga imbitasyon sumala sa nahisulat sa mga kasulatan:
“Paghunahuna ngari kanako sa matag hunahuna; ayaw pagduha-duha, ayaw kahadlok.” Samtang atong hangpon kini nga imbitasyon, ang Manluluwas mituman sa Iyang talagsaong mga saad, lakip sa paglakaw diha sa Iyang kahayag ug pagdawat og personal nga giya sa atong kinabuhi.
Ang pagtutok sa atong kinabuhi diha sa Manluluwas nagkinahanglan nga atong ipahiuyon ang atong hunahuna ug ang atong mga tinguha ngadto sa Iyang hunahuna ug mga tinguha. Aron matuman kining paningkamot, kita kinahanglan nga maningkamot nga makat-on pa og dugang mahitungod Kaniya, mopahigayon sa atong mga kinabuhi nga nahiuyon sa Iyang ebanghelyo sa kanunay, ug mohimo sa matag adlaw og makugihong paningkamot sa pagtutok sa tanan nga maayo.
Sa atong mga paningkamot sa pagpahiuyon sa atong kinabuhi uban sa Manluluwas, tingali kita maglibog unsa ang gipasabot nga mahimong hingpit diha ni Kristo ug pagkamahingpiton. Pinangga, mahimo bang mopakigbahin ka og hunahuna mahitungod niini?
Sister Rosana Soares: Oo. Gusto nakong sublion unsay gitudlo ni Elder Vern Stanfill gikan sa Seventy mahitungod niining butanga. Miingon siya nga kinahanglan nga atong hinumdoman nga ang pagkamahingpiton dili sama sa pagkahingpit diha ni Kristo. Ang pagkamahingpiton nagkinahanglan og imposible, gipahamtang sa kaugalingon nga sumbanan nga nagtandi kanato ngadto sa uban. Kini makamugna og pagbati nga sad-an ug grabe nga kabalaka ug makahimo kanato nga gustong mopalayo ug mag-inusara.
Ang pagkahimong hingpit diha ni Kristo lahi ra kaayo. Kini mao ang proseso—mahigugmaon nga gigiyahan sa Espiritu Santo—sa pagkahimong mas sama sa Manluluwas. Ang mga sumbanan gitakda pinaagi sa usa ka mabination ug nasayod sa tanan nga Langitnong Amahan ug klaro nga gipasabot diha sa mga pakigsaad nga gidapit kita sa pagdawat. Samtang dawaton nato ang pagdapit sa Manluluwas nga moduol ngadto Kaniya, kita sa dili madugay makaamgo nga ang atong labing maayo paigo na ug nga ang grasya sa usa ka mahigugmaon nga Manluluwas mao ang mopuno sa kulang sa mga paagi nga dili nato mahanduraw.
Elder Soares: Akong mga higala, ang paghimo niini nga sumbanan dili na ikapangutana, usa ka hinay-hinay, proseso sa tibuok kinabuhi ug nagkinahanglan og labaw sa pagtuo lamang. Apan samtang hangpon nato kini, makasinati kita og hingpit nga kalipay, kalinaw, ug espirituwal nga paglambo, ug ang mga hiyas sa Manluluwas mahimong kabahin sa atong kinaiya, ug ang Iyang imahe makulit sa inyong panagway.
Ako nakakita gayod kon sa unsa nga paagi nga ang pagtutok sa atong kinabuhi diha sa Manluluwas makahatag og kalig-on sa pagbuntog sa mga kalisod, mga kahuyang, ug mga kasubo sa kinabuhi, nga lisod kaayo sa paglahotay kon wala ang Iyang tabang ug makaayo nga gahom. Duna koy higala nga kinsa sa kasamtangan nakasinati og seryoso nga balatian, ug ang medikal nga panagna dili positibo. Kini nga higala wala mahasol niini nga kahimtang. Ang bugtong niyang tinguha mao nga makahibalo kon siya ba maisugon sa iyang pagpamatuod sa Manluluwas nga si Jesukristo diha sa iyang kinabuhi. Klaro ngari nako nga kini nga higala nakatutok sa iyang kinabuhi diha sa Manluluwas ug mibati sa Iyang gipatuyhad nga mga bukton nga naggakos kaniya, ilabi na atol sa makapaguol nga panahon.
Si Presidente Nelson mitudlo: “[Kinahanglan] kini og tininuod [ug] makanunayon nga paningkamot sa pagpuno sa atong inadlaw nga kinabuhi sa mga pulong [sa Manluluwas], sa Iyang mga pagtulun-an, [ug] sa Iyang mga kamatuoran.” Wala nay mas makadapit sa Espiritu kay sa atong makanunayong pagtutok kang Jesukristo.
Minahal nakong mga higala, sa akong pagtuo hapit nga kita mahuman sa atong talagsaon nga kasinatian. Sa dili pa ako mopakigbahin sa akong panapos nga pakigpulong, gusto nako nga dapiton ang atong minahal nga Brother ug Sister Webb ug dayon ang akong pinalangga nga asawa sa pagpakigahin sa ilang mubo nga mga pagpamatuod. Makahimo ka ba niana? Salamat.
Sister Kristi Webb: Mga kaigsoonan, gimahal nako ang atong Manluluwas, nga si Jesukristo. Ang pagsabot sa Iyang hingpit nga gugma alang nako nakapausab sa akong kinabuhi. Siya miusab kanako. Mopamatuod ko nga Siya buhi. Mopamatuod ko nga Siya nahigugma sa matag usa nato. Mopamatuod ko nga Siya mitugyan sa Iyang kinabuhi aron sa pagtubos kanato. Ang Iyang ehemplo sa pagkamapainubsanon, pagkamasulundon, ug paghigugma nakapadasig nako kada adlaw. Siya nagtudlo nako unsaon sa pagsalig ug pagserbisyo sa akong Langitnong Amahan. Siya ang akong kahayag, akong kusog, ug akong paglaom. Sa ngalan ni Jesukristo, amen.
Brother Chad H Webb: Usa gayod ka talagsaong pribilihiyo namo nga makig-uban kaninyo karong gabhiona ug makig-uban nila ni Elder ug Sister Soares. Gusto nako nga idugang ang akong pagpamatuod sa calling ni Elder Soares isip usa ka Apostol ni Ginoong Jesukristo. Nasayod usab ako nga si Presidente Nelson mao ang propeta sa Ginoo sa kalibotan karon. Idugang usab nako ang akong pagpamatuod nga ang Langitnong Amahan nahigugma kaninyo. Siya adunay hingpit nga plano sa kalipay sa pagluwas ug paghimaya sa Iyang mga anak. Si Jesukristo mao ang sentro nga tawo nianang hingpit nga plano ug mao ang Manluluwas ug Manunubos sa kalibotan. Siya ang atong hingpit nga ehemplo. Siya mao ang buhi nga Kristo. Siya mao ang Dios sa kaluwasan. Kita makasalig Kaniya sa atong tibuok kasingkasing. Ako mapasalamaton kaayo nga nahimong miyembro sa Iyang Simbahan ug alang sa tanang panalangin nga atong naangkon pinaagi sa Iyang gipahiuli nga ebanghelyo. Sa ngalan ni Jesukristo, amen.
Sister Soares: Minahal kong mga higala , mapasalamaton kaayo ko sa Dios nga miapil sa gagmay nga mga butang sa atong mga kinabuhi. Nasayod siya unsay atong gikinahanglan, ug Siya adunay mga tubag sa atong mga pangutana. Ang tanan natong buhaton mao lamang ang pagpangayo! Kon kita mopakita sa atong pailob, pasalamat, ug sa atong hugot nga pagtuo ngadto Kaniya pinaagi sa sinsero nga pag-ampo, Siya anaa kanunay, andam nga motabang kanato. Dili gayod Siya mobiya kanato. Bisan kon wala kita mobati Kaniya nga anaa, Siya anaa kanunay.
Ug unsa ang nakahatag nako sa labing dako nga paglaom mao ang pagkahibalo nga kita adunay Manluluwas kinsa naggiya sa Iyang Simbahan dinhi sa yuta pinaagi ni Presidente Nelson ug sa Iyang mga propeta, mga manalagna, ug mga tigpadayag. Sa ngalan sa atong Manluluwas, nga si Jesukristo, amen.