Pagsunod sa Plano sa Dios alang Kanato
Tibuok Kalibotan nga Debosyonal alang sa mga Young Adult
Dominggo, Pebrero 18, 2024
Elder Ulisses Soares: Ang atong sunod nga hilisgotan mao ang “pagsunod sa plano sa Dios alang kanako.”
Human maminaw sa inyong mga pangutana, gusto nakong dapiton si Brother Webb sa pagpakigbahin sa iyang mga hunahuna mahitungod niini nga hilisgotan. Okey ba kana?
PILIPINAS CEBU—PANGUTANA 8
Elder Soares, gusto kong mangutana. Kanus-a ka nahibalo sa imong kaugalingon nga ang Dios sa tinud-anay nagtagad ug nagpakabana sa imong kinabuhi?
BRAZIL—PANGUTANA 3
Elder Soares, unsaon nako pagkasayod kon ako nagpuyo ba sa mga gidahom sa Langitnong Amahan alang kanako ug nga Siya nag-uyon sa mga pagpili nga akong gihimo?
Brother Chad H Webb: Ang unang higayon nga gibati ko gayod kadto mao ang akong pagkadawat sa akong patriyarkal nga panalangin. Ang Espiritu mitabang kanako sa pagkasayod nga ang Ginoo nakaila kanako ug gustong motabang kanako sa tanang aspeto sa akong kinabuhi. Sukad niadto, adunay dili maihap nga mga higayon nga nakita ug nabati nako kadto. Sa pagkatinuod isip usa ka misyonaryo akong nakita ang Iyang impluwensya sa akong kinabuhi ug sa mga kinabuhi sa daghang katawhan dinhi sa Mexico. Sa wala pa ang akong misyon manggiulawon kaayo ko ug mahadlokon makigsulti sa mga tawo. Atol sa akong misyon ang Ginoo mipanalangin kanako sa katingalahan nga mga paagi, ug kini nakapausab gayod sa akong kinabuhi.
Apan ang akong paborito nga ehemplo mao kon sa unsang paagi ko Niya gitabangan sa pagkaila ni Kristi. Sa wala pa kami nagkita, mi-apply ko og trabaho nga gusto gyod nako. Nasagmuyo ko kaayo sa dihang wala ko madawat ug nahinumdom nga nag-ampo og dili mapasalamaton nga pag-ampo, nagsulti sa Ginoo nga dili kini makiangayon. Nasayop ako og hunahuna nga tungod kay naninguha ko sa pagpuyo sa ebanghelyo, unta Iya kong hatagan sa unsay akong gusto. Pipila ka semana human niadto usa ka milagro ang nahitabo, ug nakakuha ko og laing trabaho. Kadto nga trabaho maoy nakapaila-ila nako kang Kristi. Taas kini nga istorya, apan sa pagkatinuod kon nahinayon pa ang una nakong trabaho, dili unta nako siya maila-ila. Mahunahuna ko lang ang unsay gihunahuna sa Langitnong Amahan niadtong akong walay pasalamat nga pag-ampo. Mura kadto og sama sa, “Mahimo bang magpailob ka? Ako adunay plano. Ako adunay butang nga mas maayo kaayo alang kanimo kon mosalig ka lang Kanako.” Mapasalamaton kaayo ako nga nagdumala Siya sa akong kinabuhi ug dili ako. Akong nakat-onan nga Siya nagpakabana sa atong mga kinabuhi ug Siya makagiya kanato sa daghang kalamposan sa atong kinabuhi kaysa atong mahimo kon wala Siya. Dili nako mahunahuna ang akong kinabuhi nga wala si Kristi. Nalipay kaayo ko nga mas nasayod Siya kay kanako kon unsa gayod ang akong gikinahanglan. Unsay akong nakat-onan mao nga makasalig kita Kaniya sa tibuok natong kasingkasing.
Elder Soares: Salamat sa imong maanindot kaayo nga panudlo, Brother Webb. Mahal kong mga higala, ang Dios sa tinuod adunay plano alang kanato. Ang Iyang plano mao ang kinabuhing dayon. Ako mopamatuod kaninyo nga samtang kita mobuhat sa atong kabubut-on ug mohimo og mga desisyon diha sa pagkamatarong, atong matino kon unsa kita kamaayo sa pagsunod sa plano sa Dios alang kanato.