Panapos nga Pagpamatuod
Tibuok Kalibotan nga Debosyonal alang sa mga Young Adult
Dominggo, Pebrero 18, 2024
Amen. Salamat, pinangga. Akong minahal nga young adult nga mga higala gikan sa tibuok kalibotan, ako buot nga mopamatuod kaninyo nga ang kalinaw niini nga kinabuhi makit-an lamang pinaagi ni Jesukristo ug sa Iyang maulaong sakripisyo. Ako mosaksi diha kaninyo nga ang atong pagsalig diha Kaniya molig-on kanato sa pagpadayon sa pagpakabuhi, bisan pa sa mga hagit nga atong gisagubang. Palihog hinumdomi kanunay nga ang pagpaduol ngadto Kaniya makahatag kanato og rason alang sa lig-on nga paglaom ug magsangkap og lig-on nga angkla sa atong mga kalag, maghatag nato og malungtaron nga kalinaw sa kahiladman ug usa ka santuwaryo diha sa nagkaguliyang ug nag-usab-usab nga kalibotan.
Ako mopamatuod kaninyo nga ang Iyang mga bukton abli og dako ug andam nga mogakos kanato diha sa Iyang gugma, gani, ug ilabi na, kon kita mobati nga nahisalaag, gibiyaan, o gipasagdan. Ang sagrado nga luna taliwala sa mga bukton sa Manluluwas mao gayod ang gidak-on ug porma sa atong masub-anong mga kasingkasing, bun-og nga mga kinabuhi, nasamdan nga mga kalag, ug mabalak-on nga mga hunahuna—espesyal nga gibuhat, espesyal nga gipahaom alang sa matag usa kanato. Si Jesus kanunay nga nagpalapad sa Iyang paghangop aron sa paglibot kanato diha sa Iyang mahantoron, mahigugmaon nga paggakos. Ako mopamatuod kaninyo nga Siya sa kanunay duol, mapailobon nga naghulat kanato, andam sa kahangtoran nga maglakaw uban kanato, ilabi na kon kita maluya ug nagtinguha og kahupayan alang sa atong mga palas-anon. Ako modapit kaninyo nga makugihon nga mopaduol ngadto sa atong Manluluwas, sa pagkaplag Kaniya diha sa inyong kinabuhi, ug sa pagbati sa kadako sa Iyang gugma alang kaninyo. Sa pagbuhat sa ingon, inyong mapuno ang inyong kinabuhi sa Iyang kahayag ug maglakaw uban Kaniya.
Ako mosaad kaninyo sa ngalan sa atong Manluluwas nga si Jesukristo nga kon kamo dili motalikod gikan sa Iyang gituy-od, mahigugmaong mga bukton, ang inyong mga kalag mapuno sa kahingpitan nga mosanap sa kinahiladmang mga luna sa inyong kalag. Ako mosaad kaninyo nga samtang kamo matinud-anong mangita sa Manluluwas, ang Iyang makaayo nga gahom mopuno ug makapuno sa inyong kalag uban sa Iyang kalinaw, kahayag, pagsabot, kaisog, kalipay ug gugma.
Ako ligdong nga mopahayag kaninyo nga si Jesukristo buhi ug ang Iyang hingpit nga gugma gihatag ngadto sa tanan nga moduol ngadto Kaniya. Kini ang Iyang gipahiuli nga Simbahan dinhi sa yuta niining kataposang dispensasyon sa pagpangandam alang sa Iyang Ikaduha nga Pag-anhi. Ako usab mopahayag nga ang Dios buhi ug nahigugma kanato ug nga Siya mipadala sa Iyang Anak ngari kanato aron sa pagtabang kanato sa pagkaplag og paglaom, kalinaw, ug malungtarong kalipay. Ako nagdayeg kaninyo. Gitahod namo kamo, ug kami nahigugma kaninyong tanan. Ug namulong ko niining mga butanga diha sa sagrado nga ngalan sa atong Manluluwas ug Manunubos nga si Jesukristo, amen.