Pagpalig-on sa Atong Pagpamatuod
Tibuok Kalibotan nga Debosyonal alang sa mga Young Adult
Dominggo, Pebrero 18, 2024
Elder Ulisses Soares: Sugdan dayon nato sa atong unang hilisgotan, “pagpalig-on sa atong pagpamatuod.”
PERU HUANCAYO— PANGUTANA 2
Elder Soares, akong pangutana mao ang, Unsaon nato nga makaila kon kita nahimong espirituhanon nga nakatulog, ug unsaon nato sa paglingkawas niini?
BOLIVIA LA PAZ— PANGUTANA 6
Elder Soares, unsa ang tambag nga imong ihatag ngadto sa mga batan-on kinsa nagsunod sa ebanghelyo, nasayod nga kini tinuod sa ilang mga hunahuna, apan wala mobati niini sa ilang mga kasingkasing?
CHILE CONCEPCIÓN—PANGUTANA 11
Hello, Elder Soares. Akong pangutana mao ang, Unsa ang labing maayong paagi sa pagtabang sa mga minahal nga mobalik sa dalan sa ebanghelyo human nga nahimo silang dili aktibo sulod sa daghang katuigan?
Elder Soares: Akong minahal nga mga higala, ang tinuod nga pagpamatuod sa ebanghelyo mao ang usa ka personal nga pagsaksi nga gihatag sa atong mga kalag pinaagi sa Espiritu Santo nga tinuod ang piho nga mga kamatuoran nga may mahangtoron nga kamahinungdanon. Kining personal nga pagsaksi magmugna og nagtubo nga tinguha sa sulod kanato nga magbaton og hugot nga pagtuo ug paghinulsol, pagsinati og kausaban sa kasingkasing, pagdawat sa mga ordinansa sa kaluwasan, ug pagpakigsaad nga padayon nga mosunod Kaniya sa tibuok natong mortal nga panaw. Kini magdala sa kahayag sa gipahiuli nga ebanghelyo ni Jesukristo sa atong mga kinabuhi ug makapatutok kanatong tanan ngadto sa samang tumong sa pagbalik ngadto sa atong Amahan sa Langit. Ang usa ka lig-on nga pagpamatuod mamahimong atong kadasig nga mohimo og mas maayo niini nga kinabuhi ug usa ka dili madutlan nga balwarte nga mopanalipod kanato sa walay puas nga mga atake ni Satanas.
Ang Manluluwas miestablisar sa paagi alang kanato sa pagpalig-on sa atong pagpamatuod ug sa paglikay sa pagpahuyang ug sa pagkalaang sa espirituhanon nga walay pagpakabana. Siya miingon, “Pagkat-on kanako, ug paminaw sa akong mga pulong; lakaw diha sa kaaghop sa akong Espiritu, ug ikaw makabaton og kalinaw ngari kanako.” Ang Ginoo Mismo misaad nga Siya mogiya sa atong mga dalan kon atong dawaton kini nga imbitasyon.
Pipila ka tuig ang milabay, ang atong minahal nga propeta, si Presidente Russell M. Nelson, mitudlo mahitungod sa panginahanglan sa pagdagkot sa atong kadasig espirituhanong paglambo. Miingon siya, “Wala kita sukad magkinahanglan og positibo nga espirituhanong paglambo labaw kay sa karon, aron mabatokan ang gipaspason diin ang daotan ug ang nagkangitngit nga mga timailhan sa mga panahon nagkagrabe.” Misugyot siya og lima ka piho nga mga butang nga atong mabuhat nga motabang kanato sa pagpadayon og positibo nga espirituhanong paglambo ug sa ingon makaapekto sa atong pagpamatuod sa ebanghelyo ni Jesukristo. Ania kini:(1) subaya ang dalan sa pakigsaad ug magpabilin diha, (2) diskobreha ang kalipay sa inadlaw nga paghinulsol, (3) magkat-on mahitungod sa Dios ug sa unsang paagi Siya naglihok, (4) tinguhaa og laomi ang mga milagro, ug (5) taposa ang kasungian sa inyong personal nga kinabuhi. Akong minahal nga mga higala, sama sa kanunayng buhaton sa mga propeta, ang ilang mga pagtulun-an gisundan og mga saad: “Samtang inyong lihokon kini nga mga tinguha, ako mosaad kaninyo og katakos nga makapadayon sa dalan sa pakigsaad uban sa nagkadugang nga kadasig sa paglambo, bisan unsa ang mga babag nga inyong giatubang. Ug mosaad ko kaninyo og dugang nga kalig-on sa pagbatok sa tintasyon, dugang nga kalinaw sa hunahuna, ug kagawasan gikan sa kahadlok, ug dugang nga kahiusahan sa inyong mga pamilya.” Mao kana ang gisulti sa propeta.
Akong mga higala, ang hugot nga pagtuo gipakita pinaagi sa aksiyon, ug ang aksiyon makapalambo ug makapalig-on sa atong pagpamatuod. Samtang molihok kita inubanan sa hugot nga pagtuo bahin sa mga butang nga gitudlo sa atong minahal nga propeta, ang atong pagpamatuod sa Manluluwas ug sa Iyang ebanghelyo mapalig-on, atong ipabilin nga anaa kanato si Kristo, ug kita magpuyo sa atong mga kinabuhi “nga nakagamot ug nakabarog ug nga nalig-on diha sa pagtuo, … mapasalamaton kanunay.” Dugang pa, makabaton kamo og dugang nga kadasig alang sa ebanghelyo, mas kanunay nga mobati sa impluwensiya sa Espiritu Santo sa inyong mga kinabuhi, ug mahimong mas espirituhanon nga lig-on ug napanalipdan batok sa espirituhanong walay pagpakabana ug sa usa ka nagkahuyang nga pagpamatuod.
Mahal, ikaw ba adunay tambag mahitungod sa pagtabang sa uban nga mobalik ngadto sa dalan sa pakigsaad kinsa nawagtangan sa ilang pagpamatuod?
Sister Rosana Soares: Oo. Nagtuo ko ug kanunay nga nagtuo nga ang labing maayo nga paagi sa pagtabang sa pagpabalik sa usa ka minahal ngadto sa dalan sa ebanghelyo mao ang paghigugma og maayo sa Dios ug sa tawo ug mamahimong ang labing maayo nga ehemplo nga kamo mamahimo. Kamo makaawhag kanila nga makaila sa Dios ug makatagamtan sa hingpit nga gugma sa Manluluwas nga dili mohukom kanila sa dili matarong nga paagi o mopakamenos kanila. Kon mas mohigugma kita sa Dios ug motuman sa Iyang mga sugo, mas mobati kita og gugma alang niana nga tawo ug magtinguha nga siya makatagamtam sa mga panalangin sa ebanghelyo dili igsapayan kon asa nila makaplagan ang ilang kaugalingon diha sa dalan sa pagkadisipulo. Nagtuo ko nga kinahanglang mobati ang mga tawo nga gihigugma og maayo bisan kon ang ilang mga desisyon nagpalayo kanila gikan sa dalan sa pakigsaad.