Tshibangidi
Dituilangana Dia Buloba Bujima bua Bansonga Bakulumpa
dimanche 18 février 2024
Bansonga banyi bakulumpa banangibua ba nseka yonsu ya buloba, tshidi diakalenga dinena ne bunema, bua mukajanyi munangibua ne mema bua kuikala nenu mu dituilangana dia bansonga bakulumpa dia buloba bujima ba CES. Tudi kabidi ne disanka dia kuikala munkatshi muetu ne muanetu muluma Chad Webb Mutangidi wa Seminaires ne Institut ya Ntendelelu wa Ekelezia, udi mushindikija kudi mukajienda munangibua, Kristi. Muanetu muluma ne Muanetu Mukaji Webb badi bayidi balelela ba Kilisto ne badi bikala tshilejilu tshia lulamatu ne tshia dinanga mu muenenu yonsu ya nsombelu wabu.
Tudi ne disanka dia bungi bua dilua dienu mu dituilanga edi lelu. Dilua dienu didi dileja ditabuija dia bungi dienu mu Nzambi ne mu Yezu Kilisto ne dijinga dienu dia kumvua mushindu udi dinanga diabu ne kubalonda. Panudi nupangadika bua kubalonda ne kubatendelela, moyo wenu udi mua kuwujibua ne dikankamika dinena ne dipangadika dia mu nyuma didi dikengedibua mu luendu luetu bu bayidi benda mu tshikondu tshietu. Tudi banunanga bonsu buenu!
Ndi munutuadila bonsu mioyo ya disanka ne ya dinanga ya kudi muambi wetu, Mulombodi Mukulu Russell M. Nelson, ya Babedi benda ba mu Bulombodi Bukulu bua Kumpala ne ya Mpuilu mujima wa Bapostolo Dikumi ne Babidi. Badi banunanga bushuwa ne badi nenu mu meji ne basambila buenu misangu yonsu. Ndi ntekemena ne, nenumvua dinanga diabu ne nangananga dinanga dia Nzambi ne dia Yezu Kilisto mu dituilangana edi lelu.
Ndi munanga bikola musambu udi ufuma kudimbibua mpidiewu. Mêyi a nyuma a musambu ewu adi afila tshikemu tshia dituilangana dietu dia dilolu edi ne adi afila diandamuna ku disengelela dia mioyo yetu: “Nkuepi kundi mua kukudimuka bua kupeta ditalala?”
“Nkuepi, kundi mua kunyemena pandi mu dijinga dia kumanya?
“Tshianza tshia bupola tshidi kuepi bua kutuyisha dibungama dianyi?
“Nganyi udi mua kungumvua?
“Amu Yeya, nkayenda.”
“Udi momumua ne muakana,
“Dinanga didi kadiyi ndekelu.”
Mu lutanda lua Nzubu wa Bilo bia Ekelezia mu Tshimenga tshia Salt Lake, mudi tshimfuanyi tshizola ne mukubu tshia Yezu Kilisto mukangula maboku munkatshi mua bayidi benda. Mukalenga mmupitshisha matuku enda onsu a moyo pa buloba mu dibikila dia bantu bua balua kudiye, ne ubajadikila ne lusa lua bungi ne: bobu balua badi mua “kupeta dikisha dia anyima [yabu].”
Yezu Kilisto udi ku bibi bia mioyo yetu matuku onsu ne maboku makangula, utuenzela tshimanyinu wamba ne, “nenkukongoloja mu maboku a dinanga dianyi.” Nansha tuetu tutetuka anyi tutenkakana, tudi mua kupona mu maboku enda, kumvua dinanga diakana, ne kumanya ne; muaba udi mu maboku enda uvua mujidibua buetu kupitshila ku mulambu wenda wa dinanga ne bupikudi. Ke mushindu wa dikema wa kupeta ditalala mu buloba ebu bua dikenga.
Mu nyuma wa kupeta ditalala kupitshila kudi Mupandishi, tuakabikila balongi ba Institut ba nseka yonsu ya buloba bua batuambila masumpakana ne nkonku yabu minena. Mbakuata pa mikaba nkonku yabu mu video ya bitupa ne bavua batutuminayi. Tuvua bakema bikola ne balengibua mu ndondu wetu ku bulenga bushuwa bua ngakuilu kupitshila ku nkonku eyi. Tuvua mua kumvua mu ndondu wetu dijinga dienu dia kusemena pabuipi ne Mupandishi ne kulua bu bayidi benda badi badifila.
Tuakateka video ya bitupa eyi mu biena-bualu, bu mudibi bilonda: (1) Dikankamika dia bujadiki bueba, (2) ntatu mikola, (3) Dilonda bulongolodi bua Nzambi buetu, (4) Didilongolola bua kubuela ne kutendelela mu ntempelo, ne (5) Kushindameja moyo wetu pa Yezu Kilisto.
Netunuleja video misungula ya ku nkonku yenu bua kunupesha ngumvuilu ne ntuadijilu wa tshiena bualu tshionsu mu diyukilangana dietu dia dilolu edi. Muanetu Muluma ne muanetu mukaji Webb nebadisangisha netu patudi tuakula bimua bia ku biena bualu ebi, mu diabanya ngenyi yabu ne bujadiki buabu bua pabuabu bua lumu luimpa lua Yezu Kilisto.
Tuasakidilayi wa bungi. Tudi banunanga bonsu buenu, ne nkonku yenu inudi batuma idi ituleja mushindu unudi bananga Mupandishi wetu Yezu Kilisto.