Kukankamika Bujadiki Buetu
Dituilangana Dia Buloba Bujima bua Bansonga Bakulumpa
Dialumingu dia matuku 18 Ngondu Muibidi 2024
Mukulu Ulisses Soares: Tubangishayi ne tshiena bualu tshia kumpala, “kukankamika bujadiki buetu.”
PERU HUANCAYO—QUESTION 2
Mukulu Soares, lukonku luayi ludi ne: mushindu kayi utudi mua kujandula ne katuena tutuma ntema ku nyuma, ne mushindu kayi utudi mua kutshiepuka?
BOLIVIA LA PAZ—QUESTION 6
Mukulu Soares, mubelu kayi uwudi mua kupesha bansonga badi bateka lumu luimpa mu tshienzedi, bamanya ne ludi lulelela mu meji abu, kadi kabayi balumvua mu mioyo yabu to?
CHILE CONCEPCIÓN—QUESTION 11
Mukulu Soares Wetuawu! Lukonku luanyi ludi ne: mushindu kayi muimpa wa kuambuluisha banangibua betu bua kupingana mu njila wa lumu luimpa panyima pa bateketa mu ditabuija mu bidimu bia bungi?
Muluku Soares: Balunda banyi banangibua, bujadiki bulelela bua lumu luimpa, budi bujadiki bua muntu nkaya budi Nyuma wa Tshijila ututuadila ne malu makuabu a tshiumvuidi tshia tshiendelela adi malelela. Bujadiki bua muntu nkaya budi bufuka dijinga dikola kutudi bua kuikala ne ditabuija mu Mupandishi ne kukeba diambuluisha dienda patudi tukudimuna mutshima, dimanya dia dishintulula dia mutshima, kupeta milulu ya lupandu, ne bipungidi bua kutungunuka kumulonda mu moyo wetu wa pa buloba. Budi bulua ne bukenka bua lumu luimpa lupinguluja lua Yezu Kilisto mu mioyo yetu ne lututangija bonsu buetu ku kipatshila kamua ka kupingana kudi Tatu wetu wa mu Dîulu. Bujadiji bukola budi bulua dikankamika dietu bua kuenza bidi bimpa bitamba mu moyo ewu ne budi kabidi bukubi budi butukuba ku mateta a Satana.
Mupandishi mmutuenzela njila bua tuetu kukolesha bujadiki buetu ne kuepuka masungulangana mabi adi utusaka bua kubenga kudiabakena bua kumvua buenzeji bua nyuma. Wakamba ne Longela kundi, ne teleja mêyi anyi; enda mu ditudija dia Nyuma, ne neupeta ditalala mu mema. Mukalenga nkayenda mulaya ne nealombola njila yetu atuikala ne bua kuitaba dibikila edi.
Bidimu bikesa bipita, muambi wetu musuibua, Mulombodi Mukulu Russell M. Nelson, wakalongesha bitangila dijinga dia kujikula ditanta dia mu nyuma. Wakamba ne, “Katutu banji kuikala ne dijinga dikola dia ditanta mu nyuma dimpa bu mpidiewu, bua kutshimuna lubilu ludi bubi ne bimanyinu bia mîdima bia bikondu bidi bivula. Wakatuleja bintu bitanu bitudi mua kuenza bidi mua kutuambuluisha bua kulama ditanta dimpa mu nyuma ne bidi mua kulenga bujadiki buetu bua lumu luimpa lua Yezu Kilisto. Mbiobi ebi: (1) kubuela mu njila wa tshipungidi ne kushala momu, (2) kujandula disanka dia dikudimuna mutshima dia dituku dionsu, (3) kulonga pa Nzambi ne mushindu udiyi wenza mudimu, (4) kukeba ne kuindila bishima, ne (5) kuimakija matandu mu moyo weba. Bumutu bambi benza misangu yonsu, malongesha abu atu alondibua kudi milayi: “Nuenu bateka mu tshienzedi malu â, Ndi nulaya dikumbana dia kutungunuka kumpala mu njila wa tshipungidi ne ditanta dikola, kakuyi kutangila ntatu inudi nayi. Ne ndi nulaya bukola bua bungi bua kukandamena matêta, nulaya kabidi ditalala dia bungi mu meji ne budishikaminyi ku bowa, ne bobumua bunena mu mêku enu.” Ebi ke bidi muambi muamba.
Balunda banyi, ditabuija didi dilejibua ku bienzedi, ne bienzedi bidi bibaka bujadiki buetu ne bibukolesha kabidi. Tuetu benzela mu ditabuija malu malongeshibua kudi muambi wetu musuibua, bujadiki buetu bua Mupandishi ne lumu luimpa luenda nebikala bikoleshibua, netulama Kilisto ne moyo munda muetu, netusomba nsombelu wetu “muela miji ne tuibakibua munda muenda, ne [bibaka] mu ditabuija, … mu divudija ne disakidila.” Bua kukumbaja, nenupeta disanka dia bungi dia lumu luimpa, nenumvua buenzeji bua Nyuma wa Tshijila bukola mu moyo wenu misangu yonsu, ne nenulua ne makanda a mu nyuma ne nenukubibua ku masungulangana mabi adi utusaka bua kubenga kudiabakena bua kumvua buenzeji bua nyuma.
Munangibua, udi ne mubelu pa bidi bitangila kuambuluisha bakuabu bua kupingana mu njila wa tshipungidi bua badi bajimija bujadika buabu anyi?
Muanetu Mukaji Rosana Soares: Momu. Ndi muitabuija ne mushindu muakana wa kuambuluisha munanga wetu bua kupingana mu njila wa lumu luimpa udi wa kunanga Nzambi ne muntu ewu bikola ne kuikala tshilejilu tshimpa tshitamba. Udi mua kubakankamika bua kulua kumanya Nzambi ne kusanka mu dinanga dijalama dia Mupandishi kuyi ubalumbuluisha mu mushundu udi kawuyi muimpa anyi ubapuekesha to. Patudi tutamba kunanga Nzambi ne tunemeka mikenji yenda, netutamba kumvua dinanga bua muntu yonsu ne netujinga bua ne muanetu muluma anyi mukaji asanka ne mabenesha a lumu luimpa kabiyi kutangila muaba udiye udisangana mu kuenza masungula a mu nyuma adi alombola muntu bua kulua muyidi wa Yezu Kilisto. Ndi ngela meji ne bantu aba badi ne tshia kumvua banangibua bukola nansha mapangadika abu mikala abepula ku njila wa tshipungidi.