Ntatu Mikola
Dituilangana Dia Buloba Bujima bua Bansonga Bakulumpa
Dialumingu dia matuku 18 Ngondu Muibidi 2024
Mukulu Ulisses Soares: Bimpa! Tuasakidilayi. Tumonayi mpindiewu nkonku pa “ntatu mikola.”
GHANA—LUKONKU 7
Mukulu Soares, ndi musua kumanya bua tshinyi bidi bikola misangu yonsu bua kuteka ditabuija mu tshienzedi mu bikondu bikola.
CHILI CONCEPCIÓN—LUKONKU 8
Mukulu Soares, wetuawu! Lukonku luanyi ludi nunku: Mushindu kayi uwudi mua kuambuluisha muntu udi mukenga bikola mu nsombelu wenda bu ne; katu muanji kupeta mabenesha a lumu luimpa lua Yezu Kilisto?
ESPAGNE BILBAO—LUKONKU 2
Mukulu Soares, mu Ekelezia tudi ne bansonga bakana bavua basadila mu bukenji ne badi batungunuka ne kusadila konsu kubidi mu Ekelezia ne mu musoko. Nansha mudibu basadila nunku, kabena bamona mabenesha malaya to. Tshinyi tshiwudi mua kuambila bansonga aba badi luendu luabu pa buloba kaluyi lubeneshibua bu muvuabu balayibua ne ke muikalabu?
Mukulu Soares: Tuasakidilayi bua nkonku yenu mimpa. Biakana, kudi ngumvuilu mubi wa bungi munkatshi mua ba bungi ba kutudi udi ne, patudi tudienzeja muetu monsu bua kulonda disua dia Mukalenga, mu nsombelu muimpa, tshintu tshibi nansha tshimua katshiena mua kutufikila to. Patuakitaba dilongolola dia Tatu wetu wa mu Diûlu, kumpala kua tuetu kulua pa buloba, tuvua bamanya ne tudi mua kupeta disanka ne mateta ne ntatu mu luendu luetu kupitshila mu moyo ewu wa lufu. Dipitshila mu malu â misangu mikuabu didi dikola ne didi dikala tshitupa tshia ntungulukilu wa dilonga bua kukumbana bua kupingana kumpala kua Tatu wetu wa mu Diûlu. Nanku bulelela budi ne; netututakena ne ntatu mu nsombelu wetu nansha tuetu bikala bakana. Ku luseka lukuabu, bipeta bia bienzedi bimpa nebilua bushuwa kadi misangu mikuabu ki mpindiewu to. Mabenesha â adi mua kulua mu kabala matuku kashilangana ne ketu ne bilondeshila disua dia Tatu udi, mu lungenyi ne mu dimanya dienda, mumanya tshitudi tujinga ne tshidi tshimpa buetu mu moyo ewu.
Nanku tshintu tshia ku bintu bia mushinga tshitudi mua kuenza patudi tututakena ne makenga mu moyo wa lufu tshidi kualuja mutshima ne dieyemena dietu kudi Mupandishi. Tuetu benza etshi, katuakupeta amu busambi nkayabu butudi tukeba kadi netupeta kabidi dikolesha dia ditabuija ne bujadiki bua bulelela bua Mupandishi ne Bupikudi buenda. Kilisto wakakenga bisama, ntatu ne mateta bia mishindu yonsu bua uwujibua ne lusa ne bua amanya bua kutuambuluisha bilondeshila ku mateketa etu. Mupandishi udi mua kutondopa ku malu onsu a ntatu ya mu moyo wa lufu, kupita muntu yonsu mukuabu. Mu misangu mikuabu, katuena tondopibua pa musangu umua mu mubidi ku busami anyi disama dietu to, kadi tudi mua kondopibua mu nyuma ku dipeta dia dikankamana, lumvu ne lutulu bua kuambula majitu atudi nawu. Nanku patudi tupingaja mutshima wetu kudi Mupandishi, neatuenzela bia dikema mu moyo wetu.
Tshikuabu tshia kuangata ne mushinga tshidi ne patudi mua kutangila ntatu ne mateta bu mishindu ya kukola pa mutu pa kubimona bu bidi bitushiya panshi. Balunda banyi, ndi nujadikila ne; ngenzelu wa nunku udi mua kutupesha mushindu wa kuleja Mukalenga ne; tuetu netuenza bintu bionsu bidi Mukalenga mutuelela mukenji bua kuenza—ne kusemena pabuipi ne bintu bidi ne mushinga wa tshiendelela katuyi tutangila malu etu to. Yeya mmumanya ne; tudi mua kuenza malu makola! Udi utupesha bukola bua bungi.
Bu mudibi bilongesha kudi Mukulu Orson F. Whitney, umua wa ku Bapostolo ba mu Dipinguluja: “Disama dionsu didi mua kutufikila anyi lutatu lonsu lutudi nalu kabiena tshianana to. Bidi bikumbaja ku ndongelu wetu, bua kutantshisha makumbana etu bu mudi lutulu, ditabuija, dikima ne didipuekesha, … [ne] patudi tunanukila mu ditudija, udi ukolesha ngikadilu wetu, utokesha mitshima yetu, udiundisha anyima yetu ne utuenza bakana ne ba dinanga, bua tuikala ne bunangi bua kubikidibua bana ba Nzambi. Kupitshila ku dibungama ne makenga, midimu mikola ne mpaji, kutudi tupetela malongesha atudi baluila kulonga panu.”
Balunda banyi, ditantshisha dia lutulu didi dituambuluisha bua kutangila moyo mu mushindu wa tshiendelela, ne tshidi tshilua bukoki bua londopu mu anyima wetu. Ku dilonga kupitshila ku dimanya dietu, tudi tupeta lusa ne tshinyonguelu bua bakuabu ne tudi mua kubambuluisha ne kubajula mu tshikondu tshikola.
Munangibua, udi musua kuandamuna pa tshintu tshia mushinga etshi anyi?
Muanetu Mukaji Rosana Soares: Eyowa, munangibua. Kudi bantu badi bumvua mushindu mushilangana mu makenga ne ntatu ya momumua.
Bamua ba ku bobu badi bela meji ne badi bikala bakepeshibua mu bianza bia Mufuki Munena wetu, udi muikala Nzambi wetu. Bakuabu badi bela meji ne Mukalenga mmubapua moyo ne badi badikonka ne “Buatshinyi?” tudi kumpala kua malu â. Bakuabu badi ne ngikadilu wa ditudija ne wa ditabuija mu Yezu Kilisto ne badi bakumbana bua kumona ne kuitaba disua dia Mukalenga kudibu mu mushindu wa kupeta londopu lua mu nyuma lua anyima yabu. Tudi pa buloba apa bua kulonga ne kukola. Kakesa kakesa, netumona bipeta bia didienzeja dietu, tudi ne bua kutungunuka ne kuikala ne lutulu. Kabivua biteketa ne ke bualu kayi tudi ne Mupandishi wetu Yezu Kilisto!
Mukulu Soares: Tuasakidila, munangibua. Diumvuija dijukula bimpa.
Amua a ku makenga etu adi bipeta bia ngikadilu yetu ya moyo wa lufu ne kaena mua kutungunuka mu moyo walua to. Lelu katuena mua kuikala bakumbana ku tshipimu tshia kumvua tubingila tonsu tua makenga etu anyi mishindu idiwu itupesha bua kukola. Tuetu basuminyina mu ditudija mu bululama bu muvua Joseph Smith muenza, Mukalenga udi mua kutubuluila lumvu lunena pa ntatu yetu ne tuipatshila tuayi mu moyo wetu.