Kudilongolola bua Kubuela ne Kutendelela mu Ntempelo
Dituilangana Dia Buloba Bujima bua Bansonga Bakulumpa
Dialumingu dia matuku 18 Ngondu Muibidi 2024
Mukulu Ulisses Soares: Tudi bapeta nkonku mimpa ya bungi ipetangana ne tshimua tshia ku biena-bualu binangibua bia Mulombodi Mukulu Russell M. Nelson: “kudilongolola bua kubuela ne kukukuila mu ntempelo.“
Muanetu Muluma ne Mukaji Webb, suayi nuleja ngenyi yenu pa tshiena bualu etshi kabidi panyima pa diumvua nkoku eyi mikuata pa mikaba ya mêyi?
CANADA EDMONTON—Lukonku 1
Mukulu Soares, lukonku luanyi ludi ne, mushindu kayi undi bua kudilongolola bua kuya ku ntempelo bua musangu wa kumpala ne kupeta diambika dianyi?
CANADA EDMONTON—Lukonku 2
Mukulu Soares, mushindu kayi undi bua kumanya ne ndi pabuipi bua kupeta diambikibua dianyi?
CHILE CONCEPCIÓN—Lukonku 2
Mukulu Soares, wetuawu! Ndi ne lukonku. Mushindu kayi undi mua kuvuija diya dianyi dia ntempelo ne mushinga wa bungi ne ditamba kuikala pankatshi pa moyo wanyi?
Muanetu Muluma Chad H Webb: Etshi tshidi lukonku luimpa ne lua mushinga.
Tshintu tshia kumpala tshindi musua kuleja tshidi tshia kudilongolola mu nyuma. Longa bua kumvua dîyi dia Mukalenga ne andamuna ku buenzeji buadi. Kudienzeja bua kuikala mukezuka mu meji ne kuepuka bintu ebi bidi bielela Nyuma mikalu mu moyo weba. Wewa muenza bilema, kudimuna mutshima ne ikala mukumbana bua kuikala mu nzubu wa Mukalenga. Nansha bionsu biwudi muenza mu moyo weba, bupikudi bua Yezu Kilisto budi buenzeka kuwudi. Bualu bua Yeya, udi mua kuika mukumbana. Neakuambuluisha.
Muanetu Mukaji Kristi Webb: Tshiakuenza tshikuabu tshidi kuakula bua ntempelo ne bidimba bia dîku, balombodi, anyi balunda Ntempelo udi wa tshijila, kadi bintu bionsu pa yeya bidi bia musokoku, ne tudi mua kutamba kuakula pa ntempelo mututu tuenza misangu mikuabu. Ne ndi ngela meji ne bidi mua kuikala ne diambuluisha bubidi kumpala ne panyima pa kubuela kueba bua musangu wa kumpala. Bidi bia mushinga bua kuikala ne nkoku; ke mushindu utudi tulonga, ela konku yeba kudi bantu bawudi weyemena, badi bananga ntempelo ne bamuangata muikala wa tshijila. Tshia mushinga, elayi nkoku yenu kudi Mukalenga. Kuikala ne nkoku kudi mushindu muakana udi Mukalenga bua kutulongesha kupitshila ku dibuluila. Pawudi utamba kubuela mu ntempelo, Neakulongesha bia bungi.
Muanetu Muluma Webb: tshintu tshiandekelelu tshikuabu tshia kulonga. Longa bionsu biwudi mua kulonga pa ntempelo. Muaba umua mukumbana wa kuenza nanku udi ku ChurchofJesusChrist.org/temples, uwudi bua kulonga bia bungi pa diambikibua, bilulu bia ntempelo, ne nangananga longa pa bipungidi bionsu biwikala mua kuenza mu ntempelo. Site ewu udi wambuluisha bushuwa.
Bu tshitupa dia dilonga dieba, longa bionsu biwudi bua kulonga pa bimanyinu bia ntempelo. Buanyi mema, umua mushindu muakana wa kudilongolola bua kumvua ntempelo uvua muikala bua kulonga pa nzubu wa tshitendelelu tshia kala tshiumvuija mu Dipungila Dikulukulu. Bimanyinu mu ntempelo ya lelu bidi bishilangana ne bia matuku a kala, kadi nshindamenu ne tuipatshila bidi bitamba kufuanangana ne bidi mua kutuambuluisha bua dimanya dietu dia ntempelo.
Aba bavua babuela mu nzubu wa tshitendelelu tshia kala bavua basemena kumpala ku tshioshelu, muaba uvuabu bafila milambu mu tshifuanyikijilu tshia mulambu wa bupikudi wa Mupandishi. Bavua bowôshibua mayi ne balabibua manyi pa tshiowelu ne bapeshibua bilulu bia tshijila. Mu nzubu wa tshitendelelu muvua kabidi ntenta ubikidibua ne Muaba wa Tshijila uvuabu bakuata menorah, uvua tshimanyinu tshia kusomba ne Nyuma anyi ne bukenka bua Nzambi. Mesa a bidia ne mvinyo, bifuanangana ne bimanyinu bia biakudia bia tshijila. Ne kabidi tshioshelu tshia musenga wa manananshi, tshileja disambila. Tshitupa tshia ndekelu tshia nzubu wa tshitendelelu tshivua Muaba Mutamba Tshijila, uvua ne Musheta wa Tshipungidi ne Tshibuikilu tshia Musheta. Anu bakuidi banena bavua ne mua kupita ku tshilamba ne kubuela pa Muaba Mutamba Tshijila, ne bivua anu musangu umua ku tshidimu, mu dituku dia bupikudi. Munda mua nzubu muvua muleja bukalenga bua telestiya; Muaba wa Tshijila, bukalenga bua terestiya, ne Muaba Mutamba Tshijila, bukalenga bua celestiya. Ditungunuka edi kupitshila ku nzubu wa tshitendelelu divua dilongesha Isalele wa kala mu luendu luabu lua tshifuaka, ne kipatshila kanena ka kubuela kumpala kua Nzambi.
Mu bindi ngela meji tshimua tshia bimanyinu binena mu malu a kala a buloba pavua Yezu mutshiamakibua, kuvua dikanka dia buloba ne tshilamba tshia mu ntempelo wa Heloda tshia kapandika mu bipesa, tshileja ne mpidiewu Bupikudi buvua bukumbana, bonsu badi ne tshipolu tshia kubuela mu bukalenga bua celestiya, anyi kumpala kua Nzambi.
Nansha mâkala mu nzubu wa tshitendelelu—bulee, move, bukunza anyi butoka—bidi ne mua kuikala ne diumvuija dia tshimanyinu. Bulee udi nangananga meji bua kuleja dîulu, move udi tshimanyinu tshia kala bua lulamatu, bukunza budi butuvuluija mashi a Yezu Kilisto, ne butoka butu butamba kuikala buezela bu tshimanyinu tshia bukezuka. Biela pamua ku tshijikilu tshia nzubu wa tshitendelelu ne ku bivualu bia bakuidi, bidi mua kulombola meji etu ku ngenyi ne bidi kupitshila ku mashi a bukalenga a ku dîulu ke kutudi bakezukibua.
Ke bualu kayi tudi tuya ku ntempelo—bua kulonga mushindu wa kupeta bukola bonsu bua mulambu wa bupikudi wa Yezu Kilisto mu mioyo yetu. Tudi tulonga ne kupitshila ku bipungidi ne milulu, ne kupitshila ku Mupandishi, tudi mua kudilongolola bua kupingana kumpala kua Nzambi, batoka ne bakezuka. Mu ntempelo tudi tulonga pa Adama ne Eve ne mushindu uvuabu bipata kumpala kua Nzambi ne mushindu uvuabu badilongolola bua kupingana Kudiye. Kupitshila ku muyuki wabu, tudi tulonga mushindu utudi mua kudilongolola bua dituku adi dimpa. Mulombodi Mukulu David O. Mckay wakamba ne ntempelo “udi kutungunuka dikasa ku dikasa tô ne Kumpala kua wa tshiendelela. Bu bansonga bakesa betu ne mua kupeta ngumvuilu kampanda, ne tshikala budileji bua nyuma butamba bukola bua mioyo yabu.”
Kadi pawudi uya ku ntempelo, keba Yezu Kilisto ne keba tshiwudi mulonga pa kudilongolola bua kuikala kumpala kua Tatu wa mu dîulu, ne neupeta dimanya dilenga.
Muanetu Mukaji Kristi Webb: Ndi mua kuandamuna ku lukonku lua ne: “Mushindu kayi undi bua kumanya tshikondu tshindi mukumbana bua kupeta diambika dianyi?”
Bua kabingila kampanda, lukonku elu ludi lunsaka bua kuela meji pa muambi Abalahama. Kuvua kufika tshikondu mu moyo wa Abalahama pavuayi mumvua mupeshibua meji a dijinga dia bukenka ne dimanya bia bungi bia nyuma. Yeya uvua mujinga bua kushemeja malanda ne Nzambi ne dikumbana dinena bua ku musadila. Mu Abalahama 1:2 Udi wamba ne: Ne kudisangana muabawu kuvua disanka dinena ne ditalala ne dikisha buanyi, Mvua nkeba mabenesha a batatu. Abalahama udi udifuanyikija nkayenda apa bu “mulondi wa buakana, ujinga kabidi bua kuikala umua uvua ne dimanya dinena, ne kuikala mulondi munena wa buakana, ne kuikala ne dimanya dinena … ne ujinga kupeta maludiki, ne kulama mikenji ya Nzambi.”
Ewu udi mushindu umvua ngumvua pamvua banga kuela meji bua kuya ku ntempelo ne kupeta diambikibua dianyi. Mvua mudifila menamena mu diteka mu tshienzedi lumu luimpa. Mvua ndonga bia bungi mu dilonga dia mifundu dianyi; ne mvua ntungununka ne nsadila ne disanka dinena mu tshikongu tshianyi. Kadi ngakumvua dijinga dinena bua kulonga kabidi bia bungi pa Dilongolola dia Tatu wa mu Dîulu buanyi. Etshi tshivua tshitamba kupita dikamakama; Mvua ngumvua dijinga dikola bua kulonga mushindu wa kusemena bikola kudi Nzambi ne kulua muyidi mutamba kusuminyina wa Yezu Kilisto. Mvua bushuwa mujinga bua kulekela Nzambi kukokesha mu muyo wanyi. Balunda banyi ba pabuipi ne muepiskopo wanyi bakajingulula ne mvua mukumbana bua kuenza bipungidi bia ntempelo ne bakangambuluisha bua kudilongolola bua kupeta diambikibua dianyi.
Mukulu Soares: Bimpa. Tuasakidilayi wa bungi bua diakula dienu dimpa, Muanetu Muluma ne Mukaji Webb. Balunda banyi banangibua, bu muvua Mulombodi Mukulu Nelson mulongesha, “Bukumbanyi bua nkaya bua kubuela mu nzubu wa Mukalenga budi bulomba kudilongolola kua nkaya kua bungi mu nyuma. … Bukumbanyi bua nkaya budi bulomba dikudimona moyo dijima dia meji ne mutshima bua kuikala mutamba kuikala bu Mukalenga, … bua kuikala tshilejelu, ne bua kuikala muntu mutamba tshijila.” Ke bualu kayi, tuetu ne buakana bimanyina pa kudilongolola kuetu bua kubuela mu ntempelo, netukudimuna dimanya dietu mu ntempelo, diakudimuna nsombelu wetu pambelu pa ntempelo.