Kushindameja Moyo Wetu pa Yezu Kilisto
Dituilangana Dia Buloba Bujima bua Bansonga Bakulumpa
Dialumingu dia matuku 18 Ngondu Muibidi 2024
Mukulu Ulisses Soares: Nkonku yonsu milenga itudi bakula dilolu edi idi ifikisha ku tshiena bualu tshia mushinga mukola tshinudi batuala bua dituilangana dietu.“ kushindamija moyo wetu pa Yezu Kilisto.”
Video, nuenu basua.
BOLIVIE LA PAZ—LUKONKU 3
Mukulu Soares, ndi ne lukonku. Mu buloba ebu bua disumpakana mushindu kayi utudi , mua kutantshisha dieyemena mu Mupandishi ne kukenkesha bimpa bukenka bua Yezu Kilisto pa buloba?
MEXICO CITY #1—LUKONKU 4
Mukulu Soares, mushindu kayi undi mua kusemena pabuipi ne bukola bua Nzambi ne, ku dienza, dishintulula moyo wanyi ne kuikala mukumbana bua kuambuluisha bakuabu?
PHILIPPINES CEBU—LUKONKU 9
Mukulu Soares, ndi musua bua kukonka, Mushindu kayi utudi mua kuenza dishilangana pankatshi pa bujalama ku dibikila dia Kilisto bua kuikala bajalama bu Yeya?
Mukulu Soares: Tuasakidilayi wa bungi bua bululama buenu ne dijinga dia kulonda Mupandishi kupitshila ku nkonku eyi inudi bela. Nudi ne bua kumanya ne: Mupandishi wetu Yezu Kilisto mmuimana ku bibi bia matuku etu, ne maboku Enda a lusa molola pabuipi, muindila ne mukumbana bua kutuakidila ne dinanga dienda. Yeya mmusua bua tulua bu mudiye, ne tuela meji ne tuenza bu mudiye, bualu mmumanya ne etshi ki njila wa kupetela ditalala ne disanka bia kashidi. Bua bualu ebu, Mupandishi udi amu utubikila misangu yonsu bua tusemena pabuipi nenda ne kumulonda moyo mujima. Tangilayi dibikila edi bu mudidi difunda mu mifundu:
Tumayi meji enu kundi, kanuikadi ne mpata anyi bowa to Patudi tuitaba dibikila edi, Mupandishi udi ukumbaja milayi Yenda misunguluka, momumua kabidi ne kuenda mu bukenka buenda ne kupeta buludiki bua nkaya mu moyo wetu.
Kushindameja moyo wetu mu Mupandishi kudi kulomba bua tululamija meji ne majinga bietu pamua ne enda. Bua kukumbaja didifila edi, tudi mua kuditansthisha bua kulonga bia bungi pa Yeya kuteka nsombelu wetu mu dipetangana dimpa ne lumu luimpa luenda kudifila dituku dionsu ne kuenza muetu monsu bua kushindamina pa bintu bionsu bidi bimpa.
Mu ku dienzeja muetu monsu bua kuteka moyo wetu mu Mupandishi, ne tuelakanangana pa tshidi tshiumvuija kulua mujalama mu Kilisto ne dijalama. Munangibua, udi bua kuela meji bua kuakula pa bualu ebu anyi?
Muanetu Mukaji Rosana Soares: Eyowa. Ndi musua kuambulula tshidi Mukulu Vern Stanfill wa mu Bayidi Makumi Muanda Muteketa muamba pa bualu ebu. Mmuamba ne, tudi ne bua kuvuluka bua ne dijalama kadiena momumua ne kuikala mujalama mu Kilisto to. Dijalama didi dilomba didifila dia nkaya dikola didi mua kufikisha kudi didifuanyikija ne bakuabu. Tshidi tshienza dipîla ne dipampakana ne didi mua kuenza ne tukasomba kuluseka nkayetu.
Kulua mujalama mu Kilisto tshidi bualu bukuabu. Tshidi tshitupa—tshiludikibua ne dinanga ku Nyuma waTshijila wa—bua kulua bafuanangana ne Mupandishi. Mikandu idi miela kudi Tatu wa mu Diûlu mututangidi mumanyi wa malu onsu ne bidi bilejibua mu bipungidi bitudi babikidibua bua kuenza. Patudi tuitaba dibikila dia Mukalenga bua kuya kudiyi, pashisha tudi tujingulula lukasa buakana buetu budi buimpa ndabu ne ngâsa wa dinanga dia Mupandishi nebienza dishilangana mu mushindu utudi katuyi bua kuelela meji to.
Mukulu Soares: Balunda banyi, kudibuinka mu mushindu ewu, tshidi bulondanganyi butungunuka bua moyo mujima ne kudi kulomba ditabuija dipepela. Kadi patudi tuitaba, netujingulula disanka, ditalala, ne nyuma ukola, ne bimanyinu bia Mupandishi bidi bilua tshimua dia ku ngikadilu wetu, ne tshimfuanyi tshienda tshilua tshilamika pa mpala petu.
Ndi mutangila meme nkayanyi mudi kushindamija moyo pa Mupandishi kufila bukola bua kutshimuna malu makola, bufuba, ne ntatu ya moyo, idi mikala mikola bua kuyitamba koku kakuyi diambuluisha Dienda ne bukola bua londopu. Ndi ne mulunda udi muikala usama disama dikola, ne bidi biakudibua kabiena bimpa to. Mulunda ewu kena usumpakana bua bidi biakudibua to. Dijinga dienda didi dia kumanya ne neuvua muikala ne bukitu mu bujadiki buenda bua Mupandishi Yezu Kilisto mu moyo wenda. Buanyi, bidi bimueneka ne mulunda ewu uvua mushindamija moyo wenda pa Mupandishi ne uvua mumvua maboku molola bua kumuakidila, nangananga mu tshikondu etshi tshia disumpakana.
Mulombodi Nelson mmulongesha ne: “bidi [bilomba] kudienzeja kushuwa kua matuku onsu bua kuwuja matuku etu a moyo ne mêyi [a Mupandishi], Malongesha Enda, [ne] malelela enda.” Kakuena tshintu tshidi tshibikila nyuma bu dishindamija lumonu luetu pa Yezu Kilisto.
Balunda banyi banangibua, ndi ngela meji ne tukadi tuya ku ndekelu kua dimanya dietu dimpa pamua lelu. Kumpala kua mema kuamba mêyi anyi a ndekelu, ndi musua kubikila Muanetu Muluma ne Muanetu Mukaji Webb bua bafila mu tshikosu bujadiki buabu. Nudi mua kuenza nanku anyi? Tuasakidilayi.
Muanetu Mukaji Kristi Webb: Bana betu Baluma ne Bakaji, ndi munanga Mupandishi wetu, Yezu Kilisto. Kumvua dinanga Dienda dijalama buanyi, tshidi tshishintula moyo wanyi. Mmunshintulula. Ndi njadika ne Udi ne moyo. Ndi njadika ne mmunanga yonsu wa kutudi. Ndi njadika ne wakafila moyo Wenda bua kutusungila. Udi tshilejilu dia didipuekesha, ditumikila, ne dinanga didi difila meji dituku dionsu. Udi undongesha mushindu wa kueyemena ne kusadila Tatu wanyi wa mu Diûlu. Udi bukenka buanyi, dikankamana dianyi, ne ditekemena dianyi. Mu dîna dia Yesu Kilisto, amena.
Muanetu Muluma Chad H Webb: Tshidi ngâsa buetu bua kuikala nuenu dilolu edi ne kuikala ne Mukulu Soares ne Muanetu Mkaji Soares. Ndi musua kukumbaja bujadiki buanyi pa dibikidibua dia Mukulu Soares bu mupostolo wa Ekelezia wa Mukalenga Yezu Kilisto. Ndi mumanya kabidi ne Mulombodi Mukulu Nelson udi muambi wa Mukalenga pa buloba lelu. Ndi kumbaja kabidi bujadiki buanyi ne Tatu wa mu Diûlu mmununanga. Udi ne dilongolola dijalama dia disanka bua kusungila ne kuzanjika bana Benda. Yezu Kilisto udi tshimfuanyi tshidi tshikala pankatshi pa dilongolola edi dijalama ne udi Mupandishi ne Musungidi wa ba pa buloba. Udi tshilejilu tshietu tshijalama. Udi Kilisto wa Moyo. Udi Nzambi wa londopu. Tudi mua kumueyemena ne mioyo yetu yonsu. Ndi ne disanka dia bungi bua kuikala Tshidimba dia Ekelezia Wenda ne bua mabenesha onsu atudi nawu kupitshila ku lumu luimpa Luenda lupinguluja. Mu dîna dia Yesu Kilisto, amena.
Muanetu Mukaji Soares: Balunda banyi banangibua, ndi ne kusakidila kua bungi bua Nzambi udi muikala mu malu makesa onsu a moyo wetu. Yeya mmumanya bitudi nabi dijinga, ne udi ne mandamuna a nkonku yetu. Butudi nabu mbua kulomba! Patudi tuleja lutulu, kusakidila, ne ditbuija dietu kudiye kupitshila ku disambila, yeya udiku musangu yonsu, pabuipi bua kutuambuluisha. Yeya kakutulekela nansha. Nansha patudi katuyi tumumvua pabuipi, yeya udiku musangu yonsu.
Ne tshidi tshimpesha ditekemena ndimanya dia ne tudi ne Mupandishi udi ulombola Ekelezia wenda pa buloba kupitshila ku Mulombodi Mukulu Nelson, ku bambi, mamônyi, ne babuluidi benda. Mu dîna dia Yesu Kilisto, amena.