Faatomuaga
Faigalotu i le Lalolagi Atoa mo Talavou Matutua
Aso Sa, 18 Fepuari, 2024
A’u talavou matutua pele mai le lalolagi atoa, o se faamanuiaga ma se avanoa sili mo i matou uma le faatasi ai ma outou i lenei faigalotu a le CES mo talavou matutua. Ua matou fiafia foi e faatasi ma Uso Chad Webb, o loo auai faatasi mai ma lona faletua pele o Kristi. O Uso ma Tuafafine Webb o ni soo faamaoni o Keriso ma o ni faataitaiga matagofie o le tuuto ma le alofa i vaega uma o o la’ua soifuaga.
Ua matou fiafia lava i lo outou auai mai i le asō i lenei faigalotu. O lo outou auai mai ua faaalia ai le tele o lo outou faatuatua i le Atua ma Iesu Keriso ma le manao e lagona lo La’ua alofa ma mulimuli ia i La’ua. A o e filifili e mulimuli ma tapuai ia i Laua, e mafai ona faatumulia lou olaga i fuafaatatau faaopoopo o le malosi ma le finafinau faaleagaga lea e manaomia i la tatou malaga o ni Ona soo i o tatou aso. Matou te alolofa ia te outou!
Ou te momoliina atu ia te outou uma ia faafeiloaiga ma alofaaga naunatai ma le mafanafana a lo tatou perofeta pele, o Peresitene Russell M. Nelson, o ona fesoasoani i le Au Peresitene Sili ma le Korama atoa a Aposetolo e Toasefululua. Latou te alolofa ma popole moni ma tatalo e le aunoa mo lo outou manuia. Ou te faamoemoe o le a outou lagona lo latou alolofa ma ae maise le alofa o le Atua ma Keriso i la tatou faigalotu i le asō.
Sa ou fiafia moni lava i le pese musuia sa faatoa lagiina nei. O upu musuia o lenei viiga pele ua faatulaga moni ai le agaga mo la tatou faigalotu i le afiafi nei, ma ua latou aumaia ai se tali i se tasi o aioiga sili ona faamomoiloto o le loto: “O fea lo‘u filemu?”
“A ou fia mautinoa, fea [e] tapa i ai?
“O fea le aao e to’a ai lo’u ātu?
“E tasi lava Ia.
“E silafia.”
“Alofa pea o Ia,
I le potu laolao o le Maota o Ofisa o le Ekalesia i le Aai o Sate Leki, o loo i ai se atavali matagofie o Iesu Keriso ma Ona aao faaloaloa atu i Ona soo. Sa faaalu e le Faaola Lona soifua i le lalolagi e valaaulia ai tagata e o mai ia te Ia, ma sa Ia faamautinoa atu ma le agaalofa ia i latou, o le taimi lava latou te o mai ai, e mafai ona latou “maua le malologa mo o latou agaga.”
O loo tu Iesu Keriso i pa o o tatou olaga i aso taitasi ma aao faaloaloa, ma talotalo mai ia i tatou, ma fetalai mai, “O le a Ou siomia oe i lima o lo’u alofa.” Tusa pe o tatou tau pauu pe tautevateva, e mafai ona tatou pauu atu i Ona aao faaloaloa, lagona Lona alofa atoatoa, ma iloa o le avanoa i le va o Ona aao ua faapaiaina e ala i Lana taulaga alofa togiola, o se nofoaga mo i tatou. Oka se auala ofoofogia e maua ai le filemu i lenei lalolagi pagatia tele.
I le agaga o le mauaina o le filemu e ala i le Faaola, sa matou valaaulia ai tamaiti aoga inisitituti mai le lalolagi atoa e faasoa mai o latou atugaluga ma fesili tetele ia i matou. Sa latou pueina a latou fesili i ni ata vitio pupuu ma auina mai ia i matou. Sa matuai faagaeetia ma ootia lava i ma’ua i le agalelei moni na faaalia mai i nei fesili. E mafai ona ma lagonaina lolotolo lou naunau e faalatalata atili i le Faaola ma avea ma Ona soo tuuto.
Sa matou faavasegaina nei vitio pupuu e ala i autu faapenei: (1) Faamalosia o a tatou molimau, (2) onosaia o tofotofoga, (3) mulimuli i le fuafuaga a le Atua mo i tatou, (4) sauniuni e ulu atu ma tapuai i le malumalu, ma (5) taulai atu o tatou olaga ia Iesu Keriso.
O le a matou faaali atu ia te outou vitio filifilia o a outou fesili e tuuina atu ai ia te outou sina matalalaga ma o se folasaga i autu taitasi i la tatou talanoaga i le po nei. O le a faatasi mai Uso ma Tuafafine Webb a o talanoaina nisi o nei autu, faasoa atu lo la atamai ma o la’ua molimau maoae i le talalelei a Iesu Keriso.
Faafetai tele lava. Matou te alolofa ia te outou uma, ma o fesili na outou auina mai ua ta’u mai ai le tele o lo outou alofa i lo tatou Faaola o Iesu Keriso.