Sauniuni e Ulufale ma Tapuai i le Malumalu
Faigalotu i le Lalolagi Atoa mo Talavou Matutua
Aso Sa, 18 Fepuari, 2024
Elder Ulisses Soares: Ua matou maua le tele o fesili lelei e faatatau i se tasi o mataupu e fiafia i ai Peresitene Russell M. Nelson: “sauniuni e ulufale ma tapuai i le malumalu.”
Brother ma Sister Webb, faamolemole pe mafai ona faasoa mai lua manatu i lenei foi autu i le mavae ai o le faalogologo i fesili na pueina?
KANATA EDMONTON—FESILI 1
Elder Soares, o la’u fesili, E faapefea ona ou sauni e alu i le malumalu mo le taimi muamua ma maua o’u faaeega paia?
KANATA EDMONTON—FESILI 2
Elder Soares, e faapefea ona ou iloa ua ou saunia e maua o’u faaeega paia?
CHILE CONCEPCIÓN—FESILI 2
Talofa, Elder Soares. O la’u fesili. E mafai faapefea ona ou faia le auai i le malumalu ia taua atili ma o se vaega tutotonu o lo’u olaga?
Brother Chad H Webb: Manaia tele ma taua le fesili.
O le mea muamua ou te fautua atu ia saunia faaleagaga. Aoao e lagona le siufofoga o le Alii ma tali i uunaiga. Taumafai malosi ia mama ma aloese i mea e faatapulaa ai le Agaga i lou olaga. A e faia mea sese, salamo ma ia agavaa e i ai i le maota o le Alii. E tusa po o fea sa e i ai i lou olaga, e faatatau le Togiola a Iesu Keriso ia te oe. Ona o Ia, e mafai ona e agavaa. O le a Ia fesoasoani ia te oe.
Sister Kristi Webb: O le isi fautuaga o le talanoa e uiga i le malumalu ma tagata o le aiga, taitai, ma uo faatuatuaina. O le malumalu e paia, ae e le o mea uma e uiga i ai e le faalauaiteleina, ma e mafai ona tatou talanoa atili i ai nai lo le tatou faia i nisi taimi. Te manatu e fesoasoani lena i le taimi muamua ma le mavae ona e auai ai mo le taimi muamua. Manaia le i ai o fesili; o le ala lena e aoao ai, ave tou fesili i tagata faatuatuaina, e alolofa i le malumalu ma faapaiaina. O le mea taua, ave tou fesili i le Alii. O le i ai o fesili o le ala sili lea e aoao ai e le Alii tatou e ala i faaaliga. O le tele o lou auai i le malumalu, o le a tele foi Lona aoao o oe.
Brother Webb: O le fautuaga mulimuli ia suesue. Aoao mea uma e uiga i le malumalu. O lesi mea lelei e fai ai o le ChurchofJesusChrist.org/temples, lea e mafai ona e aoao atili ai i le faaeega paia, ofusa o le malumalu, ae maise o feagaiga taitasi o le a e osiaina i le malumalu. E ese le aoga o le saite lena.
O lau suesuega, aoao i mea uma e uiga i faafaatusa o le malumalu. O se tasi o ala sili e saunia ai e malamalama i malumalu o le aoao i le falefetafai anamua o loo faamatalaina i le Feagaiga Tuai. O faatusa i malumalu i onapo nei e ese mai anamua, ae tutusa lava mataupu faavae ma faamoemoega, e mafai na fesoasoani e saunia tatou mo aafiaga o le malumalu.
O e na ulu i le falefetafa’i anamua e muamua i le fatafaitaulaga lea e ofo atu ai taulaga e faatusa i le taulaga togiola a le Faaola. Sa mulumulu i latou i se tanoa ma uuina i le suauu ma faaofu i laei paia. I totonu o le falefetafai e i ai se faleie na ta’u o le Nofoaga Paia, na i ai le minora, e faatusa i le mafuta ma le Agaga po o le malamalama o le Atua. O le laulau o le areto ma le uaina, o faatusa talitutusa i le faamanatuga. Na i ai foi le laulau o mea manogi, e faatusa i le tatalo. O le vaega faaiu o le falefetafa’i o le Paia o Paia, sa i ai le Atolaau o le Feagaiga ma le Nofoa o le Alofatunoa. Na’o le faitaulaga sili e ui atu i le veli ma ulu atu i le Paia o Paia, i le aso e tasi o le tausaga, o le aso o le Togiola. O le lotoā i fafo e faatusa i le malo telesitila; o le Nofoaga Paia o le malo terasitila; ma le Paia o Paia, o le malo selesitila. O lenei faagasologa atu i le falefetafa’i na aoao ai Isaraelu anamua i la latou malaga i le olaga, ma le sini faaiu ia ulu atu i le afioaga o le Atua.
I le mea ou te manatu o se tasi o faatusa silisili i le talafaasolopito o le lalolagi, ina ua faasatauro Iesu, sa lulu se mafuie ma saelua ai le veli o le malumalu o Herota, e faatusa o lea ua maea le Togiola, e maua e tagata uma le avanoa e ulu atu ai i le malo selesitila po o le afioaga o le Atua.
E oo i lanu o le falefetafa’i—lanu moana, vaiuli, mumu, ma pa’epa’e—e i ai ona uiga faafaatusa. O le lanu moana e faatusa i le lagi, vaiuli o se faatusa anamua o le tautupu, mumu e manatua ai le toto o Iesu Keriso, ma le pa’epa’e e masani ona faaaoga o le faatusa o le mamā. Tuu faatasi i pupuni o le falefetafa’i ma ofutalaloa o faitaulaga, e faasino ai o tatou mafaufau i le manatu faapea, e ala i le toto tautupu o le lagi ua tatou mamā ai.
O le pogai lena tatou te o ai i le malumalu—ia iloa le ala e maua ai le mana atoa o le taulaga togiola a Iesu Keriso i o tatou olaga. Tatou te iloa i feagaiga ma sauniga o le malumalu, ma le Faaola, e mafai ona tatou saunia e toefoi i le afioga o le Atua, mamā ma lē pona. I le malumalu tatou te aoao e uiga ia Atamu ma Eva ma le tuliesea o i laua mai le afioaga o le Atua ma lo la saunia e toe foi atu ia te Ia. O le la tala ua tatou aoao ai i auala tatou te saunia ai mo lena aso matagofie. Fai mai Peresitene Tavita O. MaKei o le malumalu “o le alua’e faasolosolo i le Afioaga e faavavau. Afai e iloa atu e le autalavou sina ata, o se uunaiga faaleagaga aupito mamana lea i o latou olaga.”
A e alu la i le malumalu, vaai mo Iesu Keriso ma mea o loo e aoaoina e uiga i le sauniuni ia i ai i le afioaga o le Tama Faalelagi, ma o le a e maua se aafiaga matagofie.
Sister Webb: Sei ou tali i le fesili “E faapefea ona ou iloa ua ou sauni e maua o’u faaeega paia?”
Mo se mafuaaga, o le fesili lea ua ou mafaufau ai i le perofeta o Aperaamo. Sa i ai se taimi i le olaga o Aperaamo na ia lagona ai se manao musuia mo le malamalama ma le poto faaleagaga sili atu. Sa ia manao i se mafutaga vavalalata ma le Atua ma se gafatia tele atu e tautua ai o Ia. I le Aperaamo 1:2 fai mai, “Ina ua ou iloa o loo i ai se filemu, ma se mapusaga, ma se fiafiaga sili, e mafai ona ou maua, o lea na ou saili ai ia ou maua faamanuiaga o ou tama.” Na faamatala e Aperaamo o ia “o se soo o le amiotonu, na manao ia umia se malamalama tele, ma ia avea ma se soo sili atu o le amiotonu, ma ia umia se malamalama sili atu … ma manao e maua faatonuga, ma tausi poloaiga a le Atua.”
O ou lagona ia ina ua amata ona ou mafaufau i le alu i le malumalu e maua ou faaeega paia. Sa ou auai atoatoa i le ola i le talalelei. E tele mea sa ou aoaoina mai a’u suesuega o tusitusiga paia; ma sa ou ola ma tautua fiafia i la’u uarota. Ae sa ou lagona se fiaai loloto e aoao atili e uiga i le Tama Faalelagi ma Lana fuafuaga mo au. Sa sili atu i le fiailoa; o se lagona malosi e aoao pe faapefea ona faalatalata atili i le Atua ma avea o se soo mausaili a Iesu Keriso. Sa ou manao moni ia faamuamua le Atua i lo’u olaga. Sa iloa e a’u uo ma lo’u epikopo sa ou sauni e osia feagaiga o le malumalu ma fesoasoani ia ou saunia e maua o’u lava faaeega paia.
Elder Soares: Lelei tele. Faafetai lava mo lua finagalo matagofie, Brother ma Sister Webb. A’u uo pele, e pei ona aoao mai Peresitene Nelson, “o le agavaa faaletagata lava ia e ulufale atu ai i le maota o le Alii e manaomia ai le tele o sauniuniga faaleagaga a le tagata lava ia. … O le agavaa faaletagata lava ia e manaomia ai se liua atoa o le mafaufau ma le loto ina ia avea atili pei o le Alii, … ia avea ma se faataitaiga sili, ma ia avea ma se tagata paia atu.” O lea, a tatou taulai amiotonu i a tatou sauniuniga e ulu atu i le malumalu, o le a sui a tatou aafiaga i le malumalu, lea o le a suia ai o tatou olaga i fafo o le malumalu.