Onosai’a o Tofotofoga
Faigalotu i le Lalolagi Atoa mo Talavou Matutua
Aso Sa, 18 Fepuari, 2024
Elder Ulisses Soares: Lelei tele. Faafetai. Se’i o tatou vaai nei i fesili e faatatau i le “onosa’ia o tofotofoga.”
KANA—FESILI 7
Elder Soares, ou te fia iloa pe aisea e faigata ai pea pe a oo ina faatino le faatuatua i taimi faigata?
CHILE CONCEPCIÓN—FESILI 8
Talofa, Elder Soares. O la’u fesili lea: E faapefea ona e fesoasoani i se tasi sa feagai ma le tele o faigata i le olaga, e foliga mai latou te lei mauaina faamanuiaga o le talalelei a Iesu Keriso?
SEPANIA BILBAO—FESILI 2
Elder Soares, i le Ekalesia e i ai talavou agavaa na mafai ona faamisiona ma e faaauau ona tautua i le Ekalesia ma le nuu. Ae e ui lava i la la’ua auaunaga, la te le’i mafai ona vaai i faamanuiaga folafolaina. O le a sau tala i na talavou o la latou malaga i le lalolagi e le’i faamanuiaina e pei ona folafolaina o le a maua?
Elder Soares: Faafetai tele lava mo na fesili tulaga ese. O se lē malamalama masani i le tele o i tatou pe a tatou taumafai ma lo tatou malosi uma e mulimuli i le finagalo o le Alii, ola i se olaga amiotonu, e leai se mea leaga e tupu ia i tatou. Pe a tatou talia le mua’i fuafuaga a lo tatou Tama Faalelagi i le olaga nei, sa tatou iloa o le a tatou maua le olioli faapea ni suega ma tofotofoga i la tatou malaga i le olaga faaletino. O le ui atu i nei tulaga faigata i nisi taimi o se vaega o lo tatou aoaoina ina ia agavaa ai e toefo’i atu i le afioaga o lo tatou Tama Faalelagi. O le mea moni la o le a tatou feagai ma puapuaga i lo tatou olaga tusa pe o le a lo tatou amiotonu. I se isi itu, o le a oo moni mai lava taunuuga o galuega lelei, ae o nisi taimi e le vave mai. E mafai ona oo mai nei faamanuiaga i se taimi faatulagaina ese nai lo tatou ma tusa ai ma le finagalo o le Tama, o Lona poto ma le silafia o mea uma, e silafia le mea tatou te manaomia ma le mea sili mo i tatou.
O se tasi o mea e sili ona taua e mafai ona tatou faia pe a tatou feagai ma puapuaga i le olaga nei o le liliu o o tatou loto ma le faatuatuaga i le Faaola. A tatou faia, e le gata ina tatou maua le mafanafana tatou te sailia ae maua foi se faatuatua faateleina ma le molimau i le moni o le Faaola ma Lana Togiola. O Keriso na mafatia i tiga ma puapuaga ma faaosoosoga o ituaiga eseese uma, ina ia mafai ai ona faatumulia o Ia i le alofa mutimutivale ma iloa le ala e fesoasoani mai ai, e tusa ma o tatou vaivaiga. E mafai e le Faaola, sili atu i lo se isi lava, ona faamalolo aafiaga o soo se tulaga faigata o le olaga faaletino. I ni isi taimi, atonu e le faamaloloina vave faaletino i tatou mai tiga po o ma’i, ae e mafai ona faamalolo faaleagaga i le tuuina mai o le malosi, malamalama, ma le onosai e tauave ai avega e tuu i o tatou luga. A o tatou liliu atu la o tatou loto i lo tatou Faaola, o le a Ia faia mea ofoofogia i o tatou olaga.
O se isi itu e mafaufau i ai e mafai ona tatou vaai i faigata ma tofotofoga o ni avanoa e tuputupu a’e ai nai lo le faatagaina o i tatou tatou e lagona le tosoina ifo i lalo e i latou. Ou te faamautinoa atu ia te outou, a’u uo, o le faia o lenei mea e mafai ona maua ai avanoa e faaali ai i le Alii ma i tatou lava e mafai ma o le a faia mea uma na poloaiina tatou e le Alii e fai—ma ola latalata atili ai i mea o le faavavau e ui i o tatou tulaga. Na te silafia e mafai ona tatou faia mea faigata! Na te tuuina mai ia i tatou le tele o le mana.
E pei ona aoao mai Elder Orson F. Whitney, o se tasi o Aposetolo o le Toefuataiga: “E leai se tiga tatou te mafatia ai, leai se tofotofoga tatou te oo i ai e maimau. E aoga mo lo tatou a’otauina, i le atinaega o na uiga auaumama e pei o le onosai, faatuatua, lototoa ma le lotomaulalo, … [ma] pe a tatou onosaia ma le onosai, fausia o tatou tagata, faamamaina o tatou loto, faalautele o tatou agaga, ma faia i tatou ia sili atu ona agamalu ma agaalofa, sili atu ona agavaa e ta’ua o fanau a le Atua. … E ala mai i faanoanoaga ma puapuaga, fita ma faigata, tatou te maua ai le malamalama lea ua tatou o mai ai iinei ia maua.”
A’u uo, o le atia’eina o le onosai e fesoasoani tatou te tilotilo ai i le olaga mai se vaaiga faavavau, ma avea ai o se tosinaga faamalolo i o tatou agaga. O le aoaoina e ala atu i o tatou lava aafiaga, tatou te maua ai le malamalama ma le alolofa mo isi, ma mafai ona fesoasoani e siitia i latou i o latou taimi o faigata.
La’u pele, e te fia talanoa i lea mataupu taua?
Sister Rosana Soares: Ioe, lau pele. E i ai tagata e ese a latou aga i luitau faapea po o mafatiaga faifaipea.
E manatu nisi o i latou ua faamamaina i latou i aao o lo tatou Foafoa Silisiliese, o lo tatou Atua lea. O isi e manatu ua faagalo i latou e le Alii ma fesili pea “Aisea?” ao lei oo i nei tulaga. O isi o loo faatino le onosai ma le faatuatua ia Iesu Keriso ma ua mafai ona vaai ma talia le finagalo o le Alii e fesoasoani ia i latou ia faamalolo ai faaleagaga o latou agaga. Ua tatou i ai i lenei lalolagi e aoao ma tuputupu a’e. O sia mea ititi i sia mea ititi, o le a tatou vaai i fua o a tatou taumafaiga; tau ina tatou agai pea i luma ma le onosai. E lei faigofie lava, o le ala lea ua i ai lo tatou Faaola o Iesu Keriso!
Elder Soares: Faafetai la’u pele. O ni manatu ‘anoa tele.
O nisi o tatou luitau o taunuuga o tulaga o le olaga nei, ma o le a le faaauau i le isi olaga. I le asō atonu e le mafai ona tatou maua mafuaaga uma o tatou luitau po o avanoa tatou te maua e tuputupu a’e ai. A o tatou tumau ma le onosai i le amiotonu, e mafai e le Alii ona faaali mai se malamalama sili atu i o tatou tofotofoga ma le faamoemoega o na mea i o tatou olaga.