Faamalolosia o ā Tatou Molimau
Faigalotu i le Lalolagi Atoa mo Talavou Matutua
Aso Sa, 18 Fepuari, 2024
Elder Ulisses Soares: Tatou amata loa i le uluai autu, “faamalolosia o ā tatou molimau.”
PERU HUANCAYO—FESILI 2
Elder Soares, o la’u fesili, e mafai Faapefea ona iloa ua tatou momoe faaleagaga, e faapefea foi ona tatou sosola ese ai?
POLIVIA LA PAZ—FESILI 6
Elder Soares, o le a sau fautuaga i le autalavou o loo ola i le talalelei, iloa e moni i ō latou mafaufau, ae lē lagonaina i o latou loto?
CHILE CONCEPCIÓN—FESILI 11
Talofa, Elder Soares. O la’u fesili, O le a le ala sili e fesoasoani ai i ē pele e toe foi mai i le ala o le talalelei, i le mavae ai o le tele o tausaga o lē toe toaaga mai?
Elder Soares: A’u uo pele, o se molimau moni o le talalelei o se molimau patino e tuu i o tatou agaga e le Agaga Paia faapea, o mea moni patino e taua e faavavau, e moni ia. O lea molimau patino e faatupula’ia ai so tatou mana’o e liliu o tatou loto i le Faaola i le faatuatua ma le salamo, maua se liuga o le loto, maua sauniga o le faaolataga, ma osifeagaiga pea e mulimuli ia te Ia i la tatou malaga i la le tino. E aumaia ai le sulu o le talalelei toefuataiina a Iesu Keriso i o tatou olaga ma tatou taulai atu ai i le sini e tasi o le toefo’i atu i lo tatou Tama i le Lagi. E avea molimau malolosi ma faaosofia tatou te faia ia sili atu i lenei olaga ma o se puipuiga e le mafaagaloina malosi lea e puipuia ai i tatou mai osofa’iga a Satani.
Ua faatuina e le Faaola se ala e faamalolosia ai a tatou molimau ma lē faavaivaia ma pauu atu i le mailei o le faatūtūgatā faaleagaga. Na Ia fetalai, “Aoao mai ia te aʼu, ma faalogo mai i aʼu upu; savali i le agamalu o loʼu Agaga, ma o le a e maua ai le filemu ia te aʼu.” Na folafola mai e le Alii lava Ia o le a Ia ta’ita’i o tatou ala pe a tatou talia lenei valaaulia.
Na aoao mai talu ai lo tatou perofeta pele, o Peresitene Russell M. Nelson, e manaomia ona faamumū lo tatou malosiaga faaleagaga. Fai mai a ia, “E leai se isi taimi ua sili ona tatou manaomia le malosiaga lelei faaleagaga e sili lo lenei taimi, e faafetaiaia le saoasaoa faateteleina o mea leaga ma faailoga pouliuli o taimi.” Na ia fautuaina mai mea patino e lima e mafai ona tatou tausisia ai le malosiaga faaleagaga lelei ma mafai ona aafia ai tatou molimau i le talalelei a Iesu Keriso. O mea nei: (1) tu i le ala o le feagaiga ma tumau ai iina, (2) ia iloa le olioli o le salamo i aso taitasi, (3) aoao i le Atua ma le ala e galue ai o Ia (4) saili mo ma faamoemoe i vavega, ma le (5) faamuta feteenaiga i lou lava olaga. A’u uo pele, e pei ona fai pea e perofeta, o latou aoaoga e sosoo ma folafolaga: “A outou galulue i nei tulimata’iga, ou te folafola atu le tomai e agai ai i luma i le ala o feagaiga ma se malosiaga faateleina, po o a lava mea tou te fetaiai. Ma ou te folafola atu le malosi sili e tetee ai faaosoosoga, filemu o le mafaufau, saoloto mai le fefe, ma le lotogatasi tele i o outou aiga.” O le mea lena na fai mai ai le perofeta.
A’u uo, o le faatuatua e faaalia i galuega, o galuega foi e fausia ai ma faamalolosia la tatou molimau. A tatou galulue i le faatuatua i mea e aoao mai e lo tatou perofeta pele, o le a faamalolosia a tatou molimau i le Faaola ma Lana talalelei, o le a tumau le soifua o Keriso i totonu ia i tatou, ma o le a tatou ola i o tatou olaga “ua maua’a ma atiina ae ia te ia, ma faatumauina i le faatuatua, … ia faatele i ai ma le faafetai.” O le a atili ai foi lou naunautai i le talalelei, o le a tatou lagonaina atili le tosinaga a le Agaga Paia i o tou olaga, ma atili ai ona malolosi faaleagaga ma puipuia ai mai le mailei o le faatūtūgatā faaleagaga.
Le pelē, e i ai sau upu e fesoasoani ai i isi ua leiloloa molimau e toefoi i le ala o feagaiga?
Sister Rosana Soares: Ioe. Ou te talitonu pea o le ala sili e fesoasoani ai e toefoi se e pele i le ala o le talalelei, o le alofa tele lea i le Atua ma le tagata ma ia fai ma faataitaiga sili e mafai ona e faia. E mafai ona fautuaina i latou ia iloa le Atua ma olioli i le alofa atoatoa o le Faaola e aunoa ma le faia o faamasinoga amioletonu pe faatauvaa. O le tele o lo tatou alolofa i le Atua ma usita’ia Ana poloaiga, o le tele foi lea ona lagona o le alofa mo le tagata ma le manao ia ona olioli i faamanuiaga o le talalelei pe o fea lava o latou i ai i le ala o le avea ma so’o. Ou te manatu e tatau ona lagona e tagata le alofaina tusa pe o a latou faaiuga ua aveesea ai mai le ala o feagaiga.