Taula’i o Tatou Olaga ia Iesu Keriso
Faigalotu i le Lalolagi Atoa mo Talavou Matutua
Aso Sa, 18 Fepuari, 2024
Elder Ulisses Soares: O fesili mananaia uma na tatou talanoaina i le po nei e faatumutumu lava i le autu sili ona taua na outou aumai ia i matou mo le tatou faigalotu: “taulai atu o tatou olaga ia Iesu Keriso.”
Vitio, faamolemole.
BOLIVIA LA PAZ—QUESTION 3
Elder Soares, o la’u fesili. E mafai faapefea, i se lalolagi pagatia, na atinae se faatuatuaga sili atu i le Faaola ma faasusulu lelei atu le malamalama o Iesu Keriso i lenei lalolagi?
AAI O MEKISIKO #1 – FESILI 4
Elder Soares, e mafai faapefea ona ou latalata atili i le mana o le Atua ma, o le faia, e faaleleia ai lo’u olaga ma mafai ona fesoasoani i isi?
FILIPAINA CEBU—FESILI 9
Elder Soares, ou te fia fesili atu, E faapefea na tatou iloa le faafiaatoatoa mai le valaaulia a Keriso ia atoatoa e pei o Ia?
Elder Soares: Faafetai lava mo tou manao amiotonu e mulimuli i le Faaola na faaalia i nei fesili. E tatau ona outou iloa o loo tu lo tatou Faaola o Iesu Keriso i faitotoa o o tatou aso, ma Ona aao alofa e faaloaloa mai, sauni, naunau, ma mafai ona opo i tatou i Lona alofa. E finagalo ia tatou pei o Ia, tatou mafaufau ma amio pei o Ia ona ua Ia silafia o le ala lea e maua ai le filemu ma le fiafia tumau. Ona o lea, o loo valaaulia pea i tatou e le Faaola e faalatalata atu ia te Ia ma mulimuli atu ma le lotoatoa. Mafaufau i lenei valaaulia e pei na tusia i tusitusiga paia:
“Vaai mai ia te aʼu i mafaufauga uma; aua le masalosalo, aua le fefefe.” Ao tatou taliaina lenei valaaulia, e faataunuu e le Faaola Ana folafolaga mata‘ina, e aofia ai le savali i Lona malamalama ma maua le taitaiga patino i o tatou olaga.
O le taulai atu o o tatou olaga i le Faaola e manaomia ai lo tatou faaogatusa o o tatou mafaufau ma manaoga ma Lona finagalo. Ina ia ausia lenei taumafaiga, e manaomia ona tatou taumafai e aoao atili ia te Ia, ia ola pea e tusa ma Lana talalelei, ma faia se taumafaiga filiga i aso taitasi e taulai atu i mea uma e lelei.
I a tatou taumafaiga ia ogatasi o tatou olaga ma le Faaola, atonu tatou te fenumiai i le uiga o le ia atoatoa ia Keriso ma le faafiaatoatoa. La’u Pele, e te faasoa i lea mea?
Sister Rosana Soares: Ioe. Ou te fia toe fai atu le mea na aoao mai e Elder Vern Stanfill mai le Fitugafulu e uiga i lenei mataupu. Sa ia fai mai e tatau ona tatou manatua o le faafiaatoatoaina e le tutusa ma le faaatoatoaina ia Keriso. O le faafiaatoatoa e manaomia ai se tulaga faigata, e faia e le tagata lava ia e faatusatusa ai i tatou i isi. O lenei mea e afua ai le ta’usalaina ma le atuatuvale ma e mafai ona tatou mananao ai e o ese ma faaesea i tatou lava.
O le faaatoatoaina ia Keriso o se isi lea mataupu. O le faagasologa—e taialaina ma le alofa e le Agaga Paia—o le avea atili e faapei o le Faaola. O tulaga faatonuina ua faatulagaina e se Tama Faalelagi agalelei ma silafia mea uma ma ua faamanino mai i feagaiga ua valaaulia i tatou e talia. A o tatou taliaina le valaaulia a le Faaola e o mai ia te Ia, e le pine ae tatou iloa o lo tatou lelei silisili ua lava lea ma o le alofa tunoa o se Faaola alofa o le a faia ai se eseesega i auala e le mafai ona tatou mafaufauina.
Elder Soares:A’u uo, o le auai i lenei mamanu e, aunoa ma se fesili, o se faagasologa faifaimalie o le olaga e le na o se talitonu e moomia ai. Ae a o tatou taliaina, o le a tatou maua le olioli, filemu, ma le tuputupu a’e faaleagaga, ma e mafai ona avea uiga auaumama o le Faaola o se vaega o o tatou uiga, ma tamau ai Ona fofoga i o tatou foliga.
Ua ou vaaitino i le taulai o o tatou olaga i le Faaola e maua ai le malosi e faatoilalo ai faigata, vaivaiga, ma tiga o le olaga, lea e matuai faigata ona tauave e aunoa ma Lana fesoasoani ma le mana faamalolo. E i ai sa’u uo o loo feagai nei ma se ma’i tuga, ma o auga e le lelei. O lenei uo e le o popole i lenei mea. Na pau lona manao ia iloa pe na toa ma lototele i lana molimau i le Faaola o Iesu Keriso i lona olaga. Na manino ia te a’u, na taulai atu e lenei uo lona olaga i le Faaola ma lagona Ona aao faaloaloa o opoina o ia, aemaise i se taimi o le le mautonu.
Na aoao mai Peresitene Nelson: “E [manaomia] ai le lotofuatiaifo [ma] taumafaiga tumau e faatumu o tatou olaga i aso taitasi i afioga [a le Faaola], Ana aoaoga, [ma] Ana upumoni.” E leai se mea e sili atu ona valaaulia ai le Agaga nai lo le taulai atu o la tatou vaai ia Iesu Keriso.
A’u uo pele, ou te manatu ua lata i le faaiuga o le tatou aafiaga faifaatasi matagofie. Ae lei faasoa atua ni upu faaiu, ou te valaaulia lo tatou Uso ma le Tuafafine pele ia Webb ona sosoo ai lea ma si o’u toalua pele e faasoa mai ni a latou molimau pupuu. E mafai ona tou faia lena mea? Faafetai.
Sister Kristi Webb: Uso e ma tuagane, ou te alofa i lo tatou Faaola, o Iesu Keriso. O le malamalama i Lona alofa atoatoa mo a’u ua suia ai lo’u olaga. Na Ia suia a’u. Ou te molimau atu o loo soifua o Ia. Ou te molimau atu e alofa o Ia ia i tatou taitoatasi. Ou te molimau atu na Ia foai Lona soifua e togiola ai tatou. O Lana faataitaiga o le lotomaualalo, usitai, ma le alofa e musuia ai au i aso taitasi. O loo Ia aoao a’u i le ala e faatuatua ma auauna ai i lo’u Tama Faalelagi. O Ia o lo’u sulu, lo’u malosiaga, ma lo’u faamoemoe. I le suafa, o Iesu Keriso, amene.
Brother Chad H Webb: O se faamanuiaga ia i ma’ua le faatasi ma outou ma Elder and Sister Soares i lenei afiafi. . E fia faaopoopo atu la’u molimau i le valaauga o Elder Soares o se Aposetolo a le Alii o Iesu Keriso. Ou te iloa foi o Peresitene Nelson o le perofeta a le Alii i le lalolagi i le asō. E faaopoopo atu la’u molimau e alofa le Tama Faalelagi ia te oe. O loo i ai Sana fuafuaga atoatoa o le fiafia e laveai ma faaea ai Ana fanau. O Iesu Keriso o le totonugalemu lea o lena fuafuaga atoatoa ma o le Faaola ma le Togiola o le lalolagi. O Ia o lo tatou faataitaiga atoatoa. O Ia o le Keriso soifua. O Ia o se Atua laveai. E mafai ona tatou faatuatuaina o Ia ma o tatou loto atoa. Ou te matua faafetai i le avea ai o a’u o se tasi o Lana Ekalesia ma mo faamanuiaga uma ua tatou maua e ala i Lana talalelei toefuataiina. I le suafa o Iesu Keriso, amene.
Sister Soares: A’u uo pele, ou te matuā faafetai lava mo se Atua o loo aofia ai i mea iti o o tatou olaga. Na te silafia mea tatou te manaomia, ma o loo ia te Ia tali i a tatou fesili. Pau le mea e tatau ona tatou faia o le ole atu! A o faaalia lo tatou onosai, lotofaafetai, ma lo tatou faatuatua ia te Ia e ala i le tatalo faamaoni, o loo i ai pea o Ia iina i taimi uma, ua saunia e fesoasoani ia i tatou. O le a Ia le tuua lava i tatou. E tusa lava pe tatou te le lagonaina o Ia iina, o loo i ai pea o Ia iina.
Ma o le mea ua tuuina mai ia te a’u le faamoemoe sili o le iloaina lea o loo i ai so tatou Faaola o loo taitaia Lana Ekalesia iinei i le lalolagi e ala mai ia Peresitene Nelson ma Ana perofeta, tagatavaai, ma talifaaaliga. I le suafa o lo tatou Faaola o Iesu Keriso, amene.