Molimau Mulimuli
Faigalotu i le Lalolagi Atoa mo Talavou Matutua
Aso Sa, 18 Fepuari, 2024
Amene. Faafetai. A’u uo talavou matutua pele i le lalolagi atoa, ou te fia molimau atu ia te outou o le filemu i lenei olaga e na o Iesu Keriso lava ma Lana taulaga togiola e maua ai. “Ou te molimau atu ia te outou o lo tatou talitonuga ia te Ia o le a faamalolosia ai i tatou e agai pea i luma i le olaga, e ui lava i tulaga tatou te uia. Faamolemole ia manatua e le aunoa o le o mai ia te Ia tatou te maua ai le mafuaaga mo le faamoemoe mausali ma tuuina mai ai se taula mautu i o tatou agaga, e tuuina mai ai ia i tatou se filemu tumau i totonu ma se malutaga i se lalolagi fevesia’i ua matua suia lava.
Ou te molimau atu ia te outou o loo matala tele Ona aao ma ua saunia e siomia i tatou i Lona alofa, e oo lava, ma aemaise lava, pe a tatou lagonaina le leiloa, tuulafoaiina, pe tuuatoatasi. O le avanoa paia i le va o aao o le Faaola o le telē tonu lea ma foliga o o tatou loto nutimomoia, olaga pagatia, agaga ua manu’a, ma mafaufau vaivai—na faia faapitoa, e faapitoa lava mo i tatou taitoatasi. Ua faalauteleina e Iesu Lona afio mai e siomia i tatou i Lana opo alofa e faavavau. Ou te molimau atu ia te outou e latalata mai pea o Ia, e faatalitali mai ma le onosai ma naunau e faavavau e savavali faatasi ma i tatou, aemaise pe a tatou vaivai ma sailia se toomaga mai a tatou avega. Ou te valaaulia outou ina ia faalatalata atu ma le filiga i lo tatou Faaola, ia maua o Ia i lou olaga, ma ia lagonaina le malosi o Lona alofa mo outou. O le faia o lena mea, o le a mafai ai ona e faatumuina lou olaga i Lona malamalama ma savavali faatasi ma Ia.
Ou te folafola atu ia te oe i le suafa o lo tatou Faaola o Iesu Keriso e faapea, afai e te le fulitua i Ona aao alofa o faaloaloa mai, o le a faatumuina lou agaga i se tumu o le a nofoia ai vaipanoa lilo uma o lou agaga. Ou te folafola atu a o e sailia ma le naunautai le Faaola, o le a mafai ma o le a faatumuina e Lona mana faamalolo lou agaga i Lona filemu, sulu, malamalama, lototoa, olioli, ma le alofa.
Ou te molimau atu ma le loto atoa o loo soifua Iesu Keriso ma o loo tatala mai Lona alofa atoatoa ia i latou uma e o mai ia te Ia. O Lana Ekalesia toefuataiina lenei i le fogaeleele i lenei tisipenisione mulimuli e tapena ai mo Lona Afio Mai Faalua. Ou te tautino atu foi o loo soifua le Atua ma e alofa ia i tatou ma na Ia auina mai Lona Alo e fesoasoani ia i tatou ia maua le faamoemoe, filemu, ma le olioli tumau. Ou te faamemelo ia te outou. Matou te faaaloalo ia te outou, ma matou te alolofa ia te outou uma. Ou te fai atu ai nei mea i le suafa paia o lo tatou Faaola ma le Togiola, o Iesu Keriso, amene.