Talateú
Fakataha Lotu Fakaemāmani Lahi maʻá e Kakai Lalahi Kei Talavoú
Sāpate, 18 Fēpueli 2024
Siʻi kakai lalahi kei talavou mei he tapa kotoa pē ʻo e māmaní, ko ha tāpuaki maʻongoʻonga mo ha faingamālie kiate kimautolu kotoa ke kau fakataha mo kimoutolu ʻi he fakataha lotu fakaemāmani lahi ko ʻeni ʻa e CES maʻá e kakai lalahi kei talavoú. ʻOku mau fiefia foki ke kau fakataha ʻi he poó ni mo Brother Seti Uepi, ʻa ia ʻokú ne kau fakataha mai mo hono uaifi ʻofaʻanga ko Kilisitií. Ko Brother mo Sisitā Uepí ko ha ongo ākonga faivelenga kinaua ʻo Kalaisi pea ʻokú na hoko ko ha sīpinga maʻongoʻonga ʻo e mateakí mo e ʻofá ʻi he tapa kotoa pē ʻo ʻena moʻuí.
ʻOku mau fiefia lahi ʻi hoʻomou kau mai ʻi he ʻahó ni ki he fakataha lotú ni. ʻOku fakahaaʻi ʻe hoʻomou kau maí ha meʻa lahi fekauʻaki mo hoʻomou tui ki he ʻOtuá pea mo Sīsū Kalaisí pea mo homou holi ke ongoʻi ʻEna ʻofá mo muimui ʻiate Kinauá. ʻI hoʻomou fili ke muimui mo moihū kiate Kinauá, ʻe lava ke fakafonu homou moʻuí ʻaki ha mālohi mo ha ivi matuʻuaki fakalaumālie ʻoku lahi angé, ʻa ia ʻoku fuʻu fiemaʻu lahi ʻi heʻetau fononga ko ʻEne kau ākonga ʻi hotau kuongá. ʻOku mau ʻofa atu kiate kimoutolu kotoa!
ʻOku ou fakaaʻu atu ʻa e pōpoaki loto-fiefia mo e ʻofa mei hotau palōfita ʻofeina ko Palesiteni Lāsolo M. Nalesoní, mei hono ongo tokoni ʻi he Kau Palesitenisī ʻUluakí pea mo e kotoa ʻo e Kōlomu ʻo e Kau ʻAposetolo ʻe Toko Hongofulu Mā Uá, kiate kimoutolu kotoa. ʻOku nau ʻofa mo tokanga moʻoni kiate kimoutolu pea lotua maʻu pē homou tuʻunga leleí. ʻOku ou fakatauange te mou ongoʻi ʻenau ʻofá kae tautautefito ki he ʻofa ʻa e ʻOtuá mo Kalaisí lolotonga ʻetau fakataha lotu ʻi he ʻaho ní.
Naʻá ku saiʻia moʻoni ʻi he hiva fakalaumālie naʻe toki ʻosi fakahokó. ʻOku hanga ʻe he ngaahi fakalea fakalaumālie ʻo e himi manakoa ko ʻení ʻo ʻomai ʻa e laumālie totonu ki heʻetau fakataha lotu ʻi he pō ní mo ʻomi ha tali ki he taha ʻo e ngaahi tautapa ongo taha ʻo hotau lotó: “Te u maʻu ʻi fē ʻa e melinó?”
“Te u hūfanga nai ki fē, Ko Koe pē,
“ʻE maʻu nai mei fē, ʻA e fiemālié,
“Ko hai ʻe ʻafioʻi
“Ko Sīsū pē.”
“ʻOku taʻengata
ʻI he loki talitali ʻo e ʻŌfisi ʻa e Siasí ʻi Sōleki Sití, ʻoku ʻi ai ha tā-valivali fakaʻofoʻofa ʻo Sīsū Kalaisi ʻoku mafao ki muʻa Hono ongo toʻukupú ʻi he haʻohaʻonga ʻo ʻEne kau ākongá. Naʻe fakaʻaongaʻi ʻe he Fakamoʻuí ʻEne moʻui ʻi he māmaní ke fakaafeʻi ʻa e kakaí ke nau haʻu kiate Ia, pea naʻá Ne fakapapauʻi kiate kinautolu ʻi he manavaʻofa ko e taimi pē te nau omi aí ʻe lava ke nau “ʻilo ai ʻa e fiemālié ki [honau] laumālié.”
ʻOku ʻafio ʻa Sīsū Kalaisi ʻi heʻetau moʻui fakaʻahó mo mafao mai Hono ongo toʻukupú pea ʻokú Ne kōlenga mai, “Te u takatakaiʻi koe ʻaki ʻa e ongo nima ʻo ʻeku ʻofá.” Tatau ai pē kapau ʻoku tau tō-mo-humu pe fāifeinga, te tau lava ʻo falala kiate Ia ke Ne talitali lelei kitautolu, ke tau ongoʻi ʻEne ʻofa haohaoá, pea ʻiloʻi kuo fakatapui Hono ongo toʻukupú, ʻo fakafou ʻi Heʻene feilaulau ʻofa mo fakaleleí, ko ha potu ia moʻotautolu. He toki founga fakaofo ia ke maʻu ai ʻa e melinó ʻi he māmani faingataʻa ko ʻení.
ʻI he laumālie ʻo hono maʻu ʻo e melinó ʻo fakafou ʻi he Fakamoʻuí, naʻa mau fakaafeʻi ai ʻa e kau ako ʻinisititiuti mei he tapa kotoa pē ʻo e māmaní ke nau vahevahe ʻa e ngaahi meʻa lalahi ʻoku nau tokanga ki aí mo ʻenau ngaahi fehuʻí mo kimautolu. Naʻa nau lekooti ʻenau ngaahi fehuʻí ʻi ha fanga kiʻi vitiō nounou pea ʻomi ia kiate kimautolu. Naʻa mau mālieʻia ʻaupito pea naʻe ongo kiate kimautolu ʻa e lelei naʻe fakahaaʻi ʻi he ngaahi fehuʻi ko ʻení. Naʻe lava ke mau ongoʻi moʻoni hoʻomou loto-holi ke ʻunu ke ofi ange ki he Fakamoʻuí mo hoko ko ʻEne kau ākonga mateaki angé.
Naʻa mau fakakulupu ʻa e fanga kiʻi vitiō nounou ko ʻení ʻo peheni: (1) Ko hono fakamālohia hoʻo fakamoʻoní, (2) ko hono kātekina ʻo e ngaahi faingataʻá, (3) ko e muimui ki he palani ʻa e ʻOtuá maʻatautolú, (4) ko e teuteu ke hū mo moihū ʻi he temipalé, mo e (5) ko e tokanga taha ʻetau moʻuí kia Sīsū Kalaisí.
Te mau fakaʻaliʻali atu ha ngaahi vitiō ʻo homou ngaahi fehuʻí kuo filifili ke hoko ia ko ha puipuituʻa pea ke hoko ia ko ha fakafeʻiloaki ki he tefito takitaha ʻi heʻetau fealēleaʻaki ʻi he pō ní. ʻE kau mai ʻa Brother mo Sisitā Uepi ʻi heʻemau fakamatalaʻi ha niʻihi ʻo e ngaahi tefito ko ʻení, ke vahevahe ʻena potó mo ʻena fakamoʻoni fisifisimuʻa ki he ongoongolelei ʻo Sīsū Kalaisí.
Mālō ʻaupito. ʻOku mau ʻofa atu kiate kimoutolu kotoa, pea ʻoku talamai ʻe he ngaahi fehuʻi naʻa mou ʻomí ʻa e lahi homou ʻofa ʻi hotau Fakamoʻui ko Sīsū Kalaisí.