Ko e Muimui ki he Palani ʻa e ʻOtuá Maʻatautolú
Fakataha Lotu Fakaemāmani Lahi maʻá e Kakai Lalahi Kei Talavoú
Sāpate, 18 Fēpueli 2024
ʻEletā Ulisses Soares: Ko ʻetau kaveinga hokó “ko e muimui ʻi he palani ʻa e ʻOtuá maʻakú.”
Hili ʻeku fanongo ki hoʻo fehuʻí, ʻoku ou loto ke fakaafeʻi ʻa Brother Uepi ke vahevahe ʻene fakakaukau fekauʻaki mo e kaveingá ni. ʻE sai pē ia?
FILIPAINI SEPŪ—FEHUʻI 8
ʻEletā Soares, ʻoku ou loto ke fai atu ha fehuʻi. Ko e fē ʻa e taimi naʻá ke ʻiloʻi ai ʻoku ʻafioʻi ʻe he ʻOtuá ʻa e meʻa kotoa ʻi hoʻo moʻuí?
PALĀSILA—FEHUʻI 3
ʻEletā Soares, ko ʻeku fehuʻí pe ʻoku anga fēfē haʻaku ʻiloʻi ʻoku ou moʻui ʻo fakatatau ki he finangalo ʻo e Tamai Hēvaní maʻakú pea ʻokú Ne hōifua ki he ngaahi fili ʻoku ou faí?
Brother Chad H. Webb: Ko e fuofua taimi naʻá ku ʻiloʻi moʻoni ai ʻení ʻa e taimi ko ia naʻe maʻu ai hoku tāpuaki fakapēteliaké. Naʻe tokoni ʻa e Laumālié ke u ʻiloʻi ʻoku ʻafioʻi au ʻe he ʻEikí pea finangalo ke tokoniʻi au ʻi he ngaahi tapa kotoa ʻo ʻeku moʻuí. Talu mei ai, kuo tuʻo lahi ʻeku mamata mo ongoʻi ʻa e meʻa ko iá. Ko e moʻoni ʻi heʻeku hoko ko ha faifekaú, naʻá ku mamata ki Hono toʻukupú ʻi heʻeku moʻuí mo e moʻui ʻa ha kakai tokolahi ʻi Mekisikou. Kimuʻa peá u ngāue fakafaifekaú naʻá ku fuʻu mā mo ilifia ke talanoa ki he kakaí. Lolotonga ʻeku ngāue fakafaifekaú naʻe tāpuekina au ʻe he ʻEikí ʻi ha ngaahi founga fakaofo, pea naʻá ne liliu moʻoni ʻa e toenga ʻo ʻeku moʻuí.
Ka ko e sīpinga ʻoku ou saiʻia taha aí ʻa e anga ʻEne tokoniʻi au ke u fetaulaki mo Kilisitií. Kimuʻa peá ma fetaulakí, naʻá ku fai ha tohi kole ngāue ki ha ngāue naʻá ku fuʻu fiemaʻu. Naʻá ku fuʻu loto-mamahi ʻi he ʻikai ke u maʻu ʻa e ngāué pea ʻoku ou manatuʻi haʻaku fai ha lotu ʻi he loto-taʻefiemālie moʻoni, ʻo fakahā ki he ʻEikí ʻoku ʻikai ke totonu ʻa e meʻa ʻoku hokó. Naʻá ku maʻuhala ʻo fakakaukau, koeʻuhí ʻoku ou moʻui ʻaki ʻa e ongoongoleleí, pea ʻoku totonu ke Ne ʻomai kiate au ʻa e meʻa ʻoku ou fiemaʻú. Hili ha ngaahi uike siʻi naʻe hoko ha mana, pea naʻe lava ke u maʻu ha ngāue ʻe taha. Naʻá ku feʻiloaki ai mo Kilisitī ʻi he ngāue ko iá. ʻOku lōloa ʻa e talanoá ia, ka ko hono moʻoní kapau naʻe hoko ʻa e meʻa naʻá ku fiemaʻú ʻo maʻu ʻa e ngāue naʻá ku ʻuluaki tohi ki aí, mahalo he ʻikai pē ke u teitei fetaulaki mo Kilisitī. ʻOku ou fakakaukauloto atu ki he anga ʻa e ʻafio mai ʻa e Tamai Hēvaní ki he lotu ʻi he loto-taʻefiemālie naʻá ku faí. Mahalo pē naʻe meimei peheni, “Te ke lava ʻo kiʻi tatali? ʻOku ʻi ai ʻEku palani. ʻOku ou maʻu ha meʻa lelei ange maʻau kapau te ke falala mai pē kiate au.” ʻOku ou fiefia ko Ia naʻá Ne tataki ʻeku moʻuí kae ʻikai ko au. Kuó u ako ʻokú Ne kau ʻi he meʻa kotoa ʻo ʻetau moʻuí pea ʻe lava ke Ne fai ha meʻa lahi ange ʻi heʻetau moʻuí ʻo lahi ange ia ʻi ha meʻa te tau lava ʻo fai maʻatautolu taʻekau ai Ia. ʻOku ou fakakaukau atu pe naʻe mei fēfē nai ʻeku moʻuí kapau naʻe ʻikai ke u fetaulaki mo Kilisitī. ʻOku ou fiefia naʻá Ne ʻafioʻi lelei ange ʻiate au ʻa e meʻa naʻá ku fiemaʻu moʻoní. Ko e meʻa kuó u akó ko e lava ke tau falala kiate Ia ʻaki hotau lotó kotoa.
ʻEletā Soares: Fakamālō atu Brother Uepi ki hoʻo akonaki fakaʻofoʻofá. Siʻoku ngaahi kaungāmeʻa ʻofeina, ʻoku ʻi ai ha palani ʻa e ʻOtuá maʻatautolu. Ko ʻEne palaní ke maʻu ʻa e moʻui taʻengatá. ʻOku ou fakamoʻoni kiate kimoutolu ʻi heʻetau fakaʻaongaʻi ʻa ʻetau tauʻatāina ke filí mo fai ha ngaahi fili angatonú, ʻoku tau fakapapauʻi ai ʻa e anga ʻetau muimui ki he palani ʻa e ʻOtuá.