Fakamoʻoni Fakaʻosí
Fakataha Lotu Fakaemāmani Lahi maʻá e Kakai Lalahi Kei Talavoú
Sāpate, 18 Fēpueli, 2024
ʻĒmeni. Mālō ʻaupito, ʻofaʻanga. Siʻoku ngaahi kaungāmeʻa lalahi kei talavou mei he funga ʻo e māmaní, ʻoku ou fie fakamoʻoni atu ʻoku toki maʻu pē ʻa e nonga ʻi he moʻuí ʻia Sīsū Kalaisi mo ʻEne feilaulau fakaleleí. ʻOku ou fakamoʻoni kiate kimoutolu ʻe fakamālohia kitautolu ʻe heʻetau falala kiate Iá ke hokohoko atu ʻetau laka ki muʻa ʻi he moʻuí, neongo ʻa e ngaahi tūkunga ʻoku tau fouá. Kātaki ʻo manatuʻi ʻoku ʻomi ʻe he haʻu kiate Iá ha ʻuhinga ke tau maʻu ai ha ʻamanaki lelei mālohi mo ha fakamaʻunga fefeka ki hotau laumālié, ʻo tau maʻu ai ha nonga ʻoku tolonga ʻi hotau lotó pea mo ha hūfangaʻanga ʻi ha māmani faingataʻa mo feliliuaki.
ʻOku ou fakamoʻoni kiate kimoutolu ʻoku mafao mai hono toʻukupú ʻo mateuteu ke takatakaiʻi kitautolu ʻi Heʻene ʻofá, ʻo aʻu ki he taimi ʻoku tau ongoʻi hē, liʻekina, pe tuenoa aí. Ko e ʻofa toputapu ʻoku mafao mai ai ʻe he Fakamoʻuí ʻi Hono toʻukupú ʻoku feʻunga pea taau tofu pē ia mo hotau loto makafokafó, moʻui kuo ngaohikoviá, ngaahi laumālie kuo kafó, mo e ʻatamai ongosiá—ʻo fakatatau pea fakapatonu ia ke tokoniʻi kitautolu fakafoʻituitui. ʻOku faʻa fakalahi ʻe Sīsū ʻEne talitali lelei kitautolú ke Ne takatakaiʻi kitautolu ʻi Heʻene fāʻofua taʻengata mo ʻofá. ʻOku ou fakamoʻoni atu ʻokú Ne ofi mai maʻu pē, ʻi he faʻa kātaki ʻo tatali mai kiate kitautolu, ʻo loto-fiemālie maʻu pē ke ʻaʻeva mo kitautolu, tautautefito ki he taimi ʻoku tau ongosia aí mo kumi ha fakafiemālie ki heʻetau ngaahi mafasiá. ʻOku ou fakaafeʻi kimoutolu ke mou ʻunuʻunu faivelenga atu ki hotau Fakamoʻuí, ke ʻilo Ia ʻi hoʻomou moʻuí, pea ongoʻi ʻa e mālohi ʻo ʻEne ʻofa kiate kimoutolú. ʻI hoʻo fai iá, te ke lava ai ʻo fakafonu hoʻo moʻuí ʻaki ʻEne māmá pea ʻaʻeva mo Ia.
ʻOku ou palōmesi atu ʻi he huafa hotau Fakamoʻui ko Sīsū Kalaisí kapau he ʻikai te ke tafoki mei Hono toʻukupu ʻofa kuo mafao maí, ʻe fakafonu ho laumālié ʻaki ha kakato ʻe nofoʻia ʻe he ngaahi loki taupotu taha ʻo ho laumālié. ʻOku ou palōmesi atu ʻi hoʻo fekumi fakamātoato ki he Fakamoʻuí ʻe lava ʻe Hono mālohi faifakamoʻuí ʻo fakafonu ho laumālié ʻaki ʻEne melinó, māmá, mahinó, loto-toʻá, fiefiá mo e ʻofá.
ʻOku ou fakahā ʻi he loto-māluʻia kiate kimoutolu ʻoku moʻui ʻa Sīsū Kalaisi pea ʻoku aʻu atu ʻEne ʻofa haohaoá kiate kinautolu kotoa pē ʻoku haʻu kiate Iá. Ko Hono Siasi ʻeni kuo fakafoki mai ʻi he māmaní ʻi he kuonga fakakosipeli fakaʻosi ko ʻení ko e teuteu ki Heʻene Hāʻele ʻAnga Ua Maí. ʻOku ou fakahā atu foki ʻoku moʻui ʻa e ʻOtuá pea ʻokú Ne ʻofa ʻiate kitautolu pea naʻá Ne fekauʻi mai Hono ʻAló kiate kitautolu ke tokoni ke tau maʻu ʻa e ʻamanaki leleí, nongá, mo e fiefia ʻoku tuʻuloá. ʻOku ou tanganeʻia ʻiate kimoutolu. ʻOku mau fakaʻatuʻi kimoutolu, pea ʻoku mau ʻofa atu kiate kimoutolu kotoa. Pea ʻoku ou fai ʻeni ʻi he huafa toputapu ʻo hotau Fakamoʻui mo e Huhuʻi ko Sīsū Kalaisí, ʻēmeni.