Kolendisa Litatoli na Biso
Losambo ya Mokili Mobimba mpo na Bilenge Bakola
Mokolo ya Eyenga 18, Sanza ya mibale 2024
Mpaka Ulisses Soares: Tika tobanda na likambo ya yambo, “kolendisa litatoli na biso.”
PERU HUANCAYO—MOTUNA 2
Mpaka Soares, motuna na ngai ezali lolenge nini tokoki koyeba ntango tozali kokoma ya kolala na molimo, mpe lolenge nini tokoki kokima yango?
BOLIVIA LA PAZ—MOTUNA 6
Mpaka Soares, toli nini okolinga kopesa na bilenge oyo bazali kobika nsango malamu, bayebi ete ezali ya solo na makanisi na bango, kasi bazali koyoka yango te na mitema na bango?
CHILE CONCEPCIÓN—MOTUNA 11
Mbote, Mpaka Soares. Motuna na ngai ezali lolenge nini ya malamu ya kosunga balingami kozonga na nzela ya nsango malamu nsima ya kotika kobika yango uta mibu ebele?
Mpaka Soares: Baninga na ngai ya bolingo, litatoli ya solo ya nsango malamu ezali litatoli ya moto yemoko ememami na milimo na biso na nzela ya Molimo Mosantu ete makambo mingi ya ntina ya seko ezali solo. Litatoli oyo ya moto yemoko ekelaka mposa ya makasi kati na biso ya kobalola mitema na biso epayi ya Mobikisi kati na bondimi mpe boyamboli, koyekola mbongwana ya motema, kozwa makuli ya lobiko, mpe koyokana na kokoba kolanda Ye na mobembo na biso ya bomoi ya kufa mobimba. Ememaka pole ya nsango malamu ezongisama ya Yesu Klisto kati na bomoi na biso mpe etyaka biso nyonso na mokano moko ya kozonga epayi ya Tata na biso ya Lola. Litatoli ya makasi ekomaka botindiki na biso ya kosala malamu koleka na bomoi oyo mpe efelo oyo ekoki kokweisama te oyo ebatelaka biso uta na bitumba esilaka te ya Satana.
Mobikisi atyaki nzela mpo na biso tolendisa litatoli na biso mpe koboya kolemba mpe kokweya na motambu ya bolembu ya molimo. Alobaki, “Boyekola na ntina na ngai, mpe boyoka maloba na ngai; botambola kati na bosembo ya Molimo na ngai, mpe bokozwa kimia epayi na ngai.”. Nkolo Yemei alakaki ete Akolinga kotambwisa matambe na biso soki tokondima libiangi oyo.
Mibu mileki, profeta na biso ya bolingo, Mokambi Russel M. Nelson, ateyaki mposa ya kopelisa bolingi na biso ya kotambola na molimo. Alobaki, “Naino tosengela na bolingi ya malamu ya molimo te koleka oyo tosengeli na yango lelo, mpo na kosukisa lombango ya mabe mpe bilembo ya bantango ezali komata.” Apesaki likanisi ya makambo mitano ya sikisiki tokoki kosala oyo ekosalisa biso tobatela bolingi ya kotambola na molimo ya malamu mpe na ntina na yango ekoki kozala na bopusi na litatoli na biso ya nsango malamu ya Yesu Klisto. Ezali awa: (1) kokota na nzela ya mayokani mpe kotikala kuna, (2) kozwa esengo ya boyamboli ya mokolo na mokolo, (3) koyekola na ntina ya Nzambe mpe ndenge nini Asalaka, (4) koluka mpe kozela makamwisi , mpe (5) kosukisa boswani kati na bomoi na bino moko. Baninga na ngai, lokola baprofeta basalaka ntango nyonso, mateya na bango elandanaka na bilaka: Ntango bokolandela bantina oyo, nalaki bino makoki ya kokende liboso na nzela ya liyokani na bolingi makasi, kotala te mikakatano nini bokoki kokutana na yango. Mpe nalaki bino makasi koleka mpo na kotelemela masenginya, kimya koleka na makanisi, bonsomi na esika ya bobangi, mpe bomoko makasi na mabota na bino.” Oyo ezali oyo profeta alobaki.
Baninga na ngai, bondimi elakisamaka na misala, mpe misala etongaka mpe elendisaka litatoli na biso. Ntango tozali kosala kati na bondimi na makambo eteyamaki na profeta na biso ya bolingo, litatoli na biso ya Mobikisi mpe ya nsango malamu na Ye ekokoma makasi, tokobatela Klisto na bomoi kati na biso, mpe tokobika bomoi na biso “etiami misisa mpe etongami kati na Ye, mpe [etiami] kati na kondima, … kotondisama na bozongisi matondo. ” Mingi koleka, bokozala na esengo mingi mpo na nsango malamu, bokoyoka botindiki ya Molimo Mosantu mbala mingi koleka na bomoi na bino, mpe bokokoma koyika mpiko mingi na molimo mpe bokobatelama na bozangi bosepeli na molimo mpe litatoli moko ya kolemba.
Balingami, bozali na maloba mpo na kosalisa basusu kozonga na nzela ya mayokani oyo babungisaki litatoli na bango?
Ndeko mwasi Rosana Soares: Iyo. Nandimaka mpe nandimaka ntango nyonso ete lolenge malamu oyo esungaka molingami moko azonga na nzela ya nsango malamu ya nsango malamu ezali kolinga Nzambe mpe moto mingi mpe kozala ndakisa ya malamu koleka bokoki kozala. Bokoki kolendisa bango koya koyeba Nzambe mpe kosepela na bolingo ebongi nie ya Mobikisi kozanga kosambisa bango na lolenge ya mabe to kokitisa bango. Mingi tolingi Nzambe mpe totosi mibeko na Ye, mingi toyoki bolingo mpo na moto mpe mposa ete ye asepela na mapamboli ya nsango malamu kotala te esika bazali komimona na nzela ya boyekoli. Nakanisi bato basengeli komiyoka balingami ata soki mikano na bango ezali komema bango mosika na nzela ya mayokani.