Painia ena Veivanua Kecega
Géoffroy Koussemou
iMatai ni Daukaulotu mai Benin
Sa kila tu o Géoffroy ni sa tu vakarau na Kalou me vukei koya kevaka e cakava na nona itavi.
A lako tani mai na kalasi o Géoffroy kei na nona itokani o Théodore. Erau yabaki 16 ruarua na cauravou oqo, ka rau vakaitikotiko mai Benin, e dua na matanitu mai Aferika. Rau sa na gole tiko ki na dua na koronivuli vou me rau laki vulica na teitei. O ya na imatai ni gauna me rau laki tiko tani vakayawa mai na nodrau matavuvale. Ena gadrevi me rau na vuli ka cakacaka vakabalavu ena veisiga yadua.
A dreta cake i tabana o Géoffroy na nona katodreketi. “Au vakabauta niu sa na sega ni vuli. Era sa rui dredre na kalasi oqo.”
“Sega!” A kaya o Théodore. “Kua ni biuta na vuli. E gadrevi mo vakararavi vua na Kalou. Kevaka o cakava, o na rawata.”
Sa katona toka o Géoffroy na vosa nei Théodore ena siga taucoko o ya. E a susugi cake ena lotu va-Karisito o Géoffroy, ia a sega ni tovolea me vakararavi vua na Kalou. A tekiduru e ra o koya ia a sega ni tekivu me masu. E a veilecayaki. Ia kevaka a sega ni vukei mai na dua na vanua, a sega ni rawa me pasi ena nona kalasi. A cuvara vakamalua na uluna o Géoffroy.
“Tamaqu mai Lomalagi,” a kaya o koya, “yalovinaka ni vakaraitaka vei au na sala meu vakararavi kina vei kemuni. E rawa ni o vukei au meu pasi ena noqu kalasi? Au yalataka niu na qaravi kemuni ena noqu vinaka taucoko ena vo ni noqu bula taucoko.”
Mai na gauna o ya, sa yaloqaqa cake o Géoffroy ka sa gugumatua cake. Era se dredre tikoga na kalasi, ia a kila tu ni sa tu vakarau na Kalou me vukei koya ke cakava na nona itavi. A biuta tani o Géoffroy na nona rere ka cakacaka vakaukauwa.
A gugumatua vinaka sara e koronivuli. Ni oti e tinikawalu na vula, sa vakarau me qeretueti. Sa mai rawata o koya!
Ni sa oti na nona vuli, a cakacaka tikoga vakaukauwa o Géoffroy. Sega ni dede sa rawata e dua na nona iteitei.
Ena dua na siga a raica e dua na itokani e lewe ni Lotu i Jisu Karisito ni Yalododonu Edaidai. Na itokani oqo a qai solia vua e dua na iVola i Momani. E a wilika o Géoffroy na iVola i Momani ka masu. A vakila o koya na katakata kei na vakacegu ni lomana ka kila vakaidina ni dina na Lotu.
Sa kila oti tu o koya na ka me na qai cakava. A cakacaka, masu, ka vakararavi vua na Kalou. Taumada a qai papitaiso. A qai wasea na nona ivakadinadina vei ira era tiko voliti koya. Eso na nona itokani era sa papitaiso talega. Na ka a tekivu ena dua na ilawalawa lailai ni lewenilotu era a tubu cake sara me dua na tabana. Sa vukea tiko o koya me tubu na Lotu e Benin!
Sa vinakata o Géoffroy me sa laki kaulotu. E sega ni veirauti na nona ilavo, sa qai volitaka na nona iteitei. Ni oti e vica na vula, a ciqoma na nona veikacivi ni kaulotu ki na Ivory Coast. O koya a imatai ni daukaulotu mai Benin me taura e dua na veikacivi ni kaulotu!
A vukei koya na nona yalodina ena veiyabaki sa oti. Ena vuku ni nona vakabauta, kei na so tale na lewenilotu, era a papitaiso e vuqa na tamata. Sa yaco me dua na tabanalevu na nona tabana. Na tabanalevu oqori sa tiki tiko oqo ni imatai ni iteki e Benin!
Sa tomana tikoga o Géoffroy Koussemou na cakacaka vakaukauwa ka vakararavi vua na Kalou. E kila o koya ni veika lelevu e rawa ni yaco ena veivuke ni Kalou.
Droini mai vei Isabel Muñoz