Na Leqa ni Soqo ni Marau
E vakaitikotiko mai Corrientes, e Argentina, o koya e vola.
E dua na tiki ni yaloi Luz e a via gole ki na soqo ni marau. Ia e se lomaleqa tikoga o koya.
“Mo vakasamataka vakavinaka ena nomu vakasama; oti … mo qai taroga vei au kevaka e sa dodonu” (Vunau kei na Veiyalayalati 9:8). Na italanoa oqo a yaco mai Corrientes, e Argentina.
Sa vakila o Luz na marau. Sa vakarau cava tiko na yabaki ni vuli, ka sa yaco e vuqa na ka talei. Sega ni dede sa na qeretueti o koya mai na kalasi ono. Ena yabaki ka tarava, sa na mai vuli torocake!
A kurabui o koya ena totolo ni nona sa tubu cake mai. Sa balavu cake o koya, ka sa sega tale ni dua na gonelailai. Na veiveisau oqo e ka marautaki, ia a vakila talega ni a rere vakalailai.
A nanuma o koya me veivosakitaka vata kei rau na nona itubutubu.
“Oqo e dua na gauna vakasakiti ena nomu bula, Luz,” a kaya o Papá. “Sa kena gauna mo vuli kina, cakava na nomu vinaka taucoko, ka rawata na lalawa ena vukei iko mo na vaka na tamata e kila na Kalou ni o na yacova.”
“Ia na bula e yaco ga mai ya dua na siga e na dua na gauna,” a kaya o Mamá. “Mo na tubu ka vaka na tamata oya ena nomu digidigi lalai vinaka yadua, o na cakava.”
Oqori a vukei Luz me lomavinaka sara kina. A marautaka ni a se sega ni se tubu cake sara ena dua vata ga na gauna.
Ena dua na siga e koronivuli, era a kaya vei Luz na nona itokani ni na caka tiko e dua na soqo ni marau ni taurivola. Era sa marautaka sara ga vakalevu. Ena caka tiko na vakayakavi, ivakatagi, cina, kei na danisi talega!
Ia ni vakarogoca tiko o Luz mai vei ira na nona itokani na veika ni soqo ni marau, sa tekivu me logaloga ca. E sega ni vaka na mataqali soqo ni marau ena rawa ni vakila kina na Yalo Tabu.
“O na lako mai, se vavei, Luz?” a taroga e dua na nona itokani.
“E dodonu mo lako mai!” a kaya e dua tale na itokani. “Au na tukuna vei rau na noqu itubutubu me rau vosa vei rau na nomu itubutubu. Rau na qai soli iko mo lako mai. ”
“Io beka.” Sa yamasamasa na lomai Luz. “Au … Au na qai tukutuku yani.”
Ena mua taucoko ni macawa sa vakasamataka tikoga o Luz na soqo ni marau. A vakasamataka tiko o koya na ka oqo ni a vakatovotovo tiko ena piano. A vakasamataka tiko o koya na ka oqo ena gauna a qito vata tiko kina kei ganena lailai. Se cava ga na ka e cakava, sa vakasamataka tikoga na ka oqo.
Sa lomana tale tikoga me gole ki na soqo. Ia e se lomaleqa tikoga o koya. Na lomaleqa ni lomana a sega ni yali rawa.
“O vinaka tiko, hija?” A taroga o Mamá ena yakavi ni Sigatabu. A seruta o Luz ena iqaqalo ni ligana na uluna balavu, loaloa.
“Io …,” a kaya o Luz.
“O se vakasamataka tiko beka ga na soqo?”
“Au sega ni kila na ka me’u cakava,” a kaya o Luz. “Au via lako. Ia au kila ni’u na sega ni vakila e dua na ka vinaka e kea. ”
A matadredredre o Mamá. “Au kila ni ko na vakatulewa vakavinaka,” a kaya o koya. “Vakasamataka, digia na nomu digidigi, ka tukuna vua na Tamada Vakalomalagi na veika o sa lewa. Ena vukei iko o Koya mo kila ke sa donu. Ko na vakila e lomamu.”
A deguvacu o Luz. A cegu levu ka gole ki na nona rumu me laki masu.
“Tamaqu Vakalomalagi,” e a vakasolokakana o Luz. “Era sa sureti au na noqu itokani ki na dua na soqo ni marau, ia au sega ni loma vinaka kina. Au na tukuna vei ira niu sa sega ni gole yani. Oqo beka na ka dodonu meu cakava?”
A solegi Luz e dua na ua ni yalo vinaka. Sa sega tale ni veilecayaki o koya. E vakila ni sa vakasinaiti tu ena rarama! E kila sara ga ni sa donu na nona digidigi.
Ni curu mai tuba ni nona rumu o Luz, sa laki mokoti Mamá vakaukauwa sara.
“Au sa lewa meu sa kakua ni lako,” a kaya vua o Luz.
“Au dokai iko,” a kaya o Mamá.
A mokoti Luz talega o Papá. “E dua na noqu nanuma,” a kaya o Papá. “Me tou cakava ga na nodatou soqo ni marau ni qeretueti. E rawa ni tou gunu aisikirimu ka marautaka vakamatavuvale! ”
A matadredredre o Luz. E dau taleitaka o koya na gunu aisikirimu! Ka taleitaka ni kila ni sa rawa me cakava na ka dodonu, ena gauna mada ga e dredre kina. Ena veidigidigi lalai, vinaka e cakava, sa rawa vua me tubu cake me vaka na tamata e kila na Kalou e rawa ni vakataka.
Droini mai vei Tammie Lyon