E Dua na iTukutuku mai Vua na Parofita

Au Lomani Kemuni

Mai vei Peresitedi Russell M. Nelson

Lavetaki mai na “Restoration Conversation with President Russell M. Nelson,” ikumuni ni vidio, Gospel Media Library.

A sotavi ira eso na gone ena Lalai o Peresitedi Nelson ena dua na vale kau e Palmyra, New York, Amerika. E vaka na irairai ni vale a tiko kina o Josefa Simici ena gauna a raica kina na iMatai ni Raivotu. Oqo eso na ka a wasea o Peresitedi Nelson vei ira na gone.

Oi Keda Kece sa Luve ni Kalou

E sega soti ni dua na ka na vanua o a sucu kina se na kuila o na yalovaka se na vosa ni vanua cava o cavuta. Eda sa luvena taucoko na Tamada Vakalomalagi, ka da na tubu cake me da vakataki Koya.

Sasaga kei na Kena iSau

Na bula ni dua na parofita ena taura e levu na cakacaka kei na levu ni vuli. Na veika kece e baleta na noda rawa ni vakataka na iVakabula e dau sasagataki. Ena gauna e vinakata kina na Kalou me solia na Vunau e Tini vei Mosese, evei na vanua a tukuna vei Mosese me lako kina? Ena dela ni Ulunivanua o Saineai. Sa qai taubaletaka kece yani o Mosese na sala ki na dela ni ulunivanua me laki taura kina na Vunau e Tini. Sa dau taleitaka na Turaga na noda sasaga baleta ni sasaga ena kauta mai na kena isau e sega ni rawa me yali mai kina.

Na Matavuvale nei Parofita

Keirau itubutubu ni tini na gone, e ciwa na luvei keirau goneyalewa ka dua na gonetagane. E rua vei ira sa tiko mai lomalagi ena gauna oqo. Era a tiko ena dua na gauna lekaleka e vuravura, ka rau sa veivakauqeti tiko mai lomalagi. Keitou sa vakaduavatataki ena vakamau e valetabu, ka sa kena ibalebale ni keitou na laki tiko vata me tawamudu ni oti na neitou dui itavi lalai e vuravura.

Dua na iKanakana ni Bula Marau

Na ivolanikalou era sa vaka e dua na ivola ni vakasaqa. Kevaka e sega na nomu ivola ni vakasaqa, ka o sa tekivu wakia vata na falawa kei na sucu kei na yaloka, ena sega beka na nomu keke vinaka. Sa solia vei keda na Kalou e dua na ikanakana ni bula marau, e vakatokai na ivunau.

Na vosa ivunau e vaka toka me ivakaro, me vaka sa tukuna tiko na ka meda cakava. Ia sa ikoya dina e dua na sala takoso ni vuli. Me kena ivakaraitaki, sa vakaroti keda o koya meda kakua ni gunuva na alakaolo se vakatavako kei na veika veivakacacani tale eso. Cava na vuna? Me rawa ni ko bula dede ka mamarau. O nanuma beka meu na bula tiko meu yacova na yabaki 95 na yabaki kevaka au a vakatavako ka gunu? Sega. Kau sa marau. Kau rawa ni siki kei ira na makubuqu.

Dua Na Ka totoka

Na veivutuni e kena ibalebale ni veisiga yadua, eda tovolea cake vakalailai ka cakava e levu cake tale na ka me da vakataka na Turaga o Jisu Karisito. Au se veivutuni tikoga. Ena veisiga au tovolea tiko meu vuli vakalevu cake ka vakataka cake vakalevu na kena e gadreva na Turaga meu vakataka. Ia e sega ni itotogi oqori. Oqori e dua na madigi rekitaki. Ena veisiga, au tu mai na imocemoce ena mataka ka kaya, “Isa, e dua na ka talei ena yaco nikua! Au na vakataki Jisu vakalevu cake.”