iMatai ni Siganei Jaechan
Sa ikoya beka oqo na sala dodonu? Sa vaka me vakaoso vakasama oqo vei Jaechan.
“Au a vakasaqarai Jiova, ka sa rogoci au” (Same 34:4).A yaco na ka oqo mai Gyeonggi-do, ena Ceva Kei Korea.
Sa rogo na ivakatagi ni mamarau ka rau sa tucake mai na nodrai idabedabe o Jaechan kei na Tinana ena volau ni qito ni koronivuli. Era sa veivukayaki na baluni ramase ena lalaga ka ra maqusa na veivosaki na gone eso kei na nodra itubutubu.
Ena mataka sa imatai tiko ni siga ni vuli, ka ra dau tiko na gonevuli vou ni Ceva Kei Korea ena dua na parokaramu digitaki me marautaki kina na tekivu ni vuli. Ena nona sa vakarorogo tiko ki na sere kei na vosa sa vakila na marau o Jaechan. Sa sega tale ni waraka me tekivu vuli!
Ni oti na parokaramu, rau a taubale sobu o Jaechan kei Tinana ena olo ni koronivuli. Ni rau sa yaco ki na nona kalasi, a sotavi nona qasenivuli o Jaechan. E vinaka sara ga o koya.
E muri e qai taubale yani o Na kei Jaechan ki na rarama katakata ni vula itubutubu. Na matanisiga kei na lomalagi e vaka me rau marautaka talega na tekivu ni vuli.
Ena mataka ka tarava, a taubaletaki Jaechan yani ki na matamata ni koronivuli o Na. A mokoti koya vakaukauwa. “Au lomani iko,” a kaya. “Me nomu na vinaka ni imatai ni siga.”
“Io,” a kaya o Jaechan. “Au lomani iko talega!” A yaloyalo me vakamoce ka sa gole sara ki na nona kalasi, me vaka ga a vakatovotovotaki.
Ni sa lako sobu o Jaechan ki na olo, sa tekivu me lomaleqa. Sa ikoya beka oqo na sala dodonu? A tu vakadua o Jaechan ka rai wavoki. A vuki o koya ka taubale sobu ki na dua tale na olo. Sega ni dede sa vaka me vakaoso vakasama na ka kece.
A cegu levu sara o Jaechan. Sa kila tu o koya ni a tiko ena sala ni olo oqo e nanoa. A taubale tikoga ka curuma yani e vica na katuba.
Ia a sega ni raica o Jaechan na nona kalasi, na desi kei na itokani kei na nona qasenivuli vinaka. A raica na volau ni qito. Ia oqo sa sega na tamata se baluni. Sa tu ga oqo e dua na rumu lala levu.
Sa tonawanawa na matai Jaechan. A sega ni tovolea me taqaya, ia sa rere. Sa sega ni kila na sala me kunea kina na nona kalasi. A tekiduru o koya ka masu. “Tamaqu Vakalomalagi, au sa yali. Yalovinaka ni vukei Na me lako mai me vukei au meu gole ki na noqu kalasi. ”
Sa tucake sara o Jaechan. Sa tekivu cegu levu tale o koya. Sa qai wawa toka.
Ni oti e vica na miniti, sa wavoki mai o Na. “Jaechan!” A cici yani o Na ka mokoti koya. “E vakacava?”
Sa tagi yani o Jaechan. Sa vakacegu sara ga o koya ni sa raici Na. “Au sega ni raica rawa na noqu kalasi,” a kaya o koya. “Au sa qai masu mo kunei au.”
Sa qai qusia na wai ni matana o Na. “Au marau ni ko a masu,” a kaya o koya. “Au a sa lako tiko i vale. Au a qai vakila ni dodonu meu vuki yani ka vakadeitaka ni ko sa kunea na nomu kalasi. Ni ko sa sega ni tiko e kea, au a veiraiyaki sara. Au sa qai raici iko!”
A taura o Jaechan na ligai Na ka rau sa gole yani ki na sala donu ni olo. Sa mudu sara na tagi nei Jaechan. Sa kila o koya ni sa sauma mai na Tamada Vakalomalagi na nona masu, ka sa vinaka na ka kece. Ni rau sa yaco ki na kalasi, a rogoci ira na vo ni gone e loma ni ra veidredrevaki ka veiqitori.
“Jaechan! Keimami marau sara ga na raici iko, “a kaya na qasenivuli nei Jaechan ni sa curu yani o Jaechan.
“Vinaka,” a kaya mai o Jaechan ena vakarokoroko. A mokoti Na tale. Sa na qai dua na imatai ni siga vinaka ni vuli.
Droini mai vei Shane Clester