E Dua Ga na Tekisi
E vakaitikotiko o dauvolaivola e North Carolina, Amerika.
“Ni vukei keitou me laurai e dua na tekisi me rawa ni keitou yaco rawa i lotu nikua,” e ratou a masu na goneyalewa.
“Au dau vakila tu ga na marau niu dau lako ki Lotu” (iVolanisere ni Lalai, 157).
Na italanoa oqo e yaco mai Cantabria, Sipeni.
“Tou na rawa vakacava ni laki lotu nikua?” A taroga o Peppa, na taci Ellie lailai. “Sa tau vakalevu na uca!”
“Kakua ni leqa,” a kaya o Ellie. “Tou sa yaloqaqa!”
A vukei Peppa o Ellie me vakabulukautaka na nona kote. A qai dara sara na nona vava ni uca.
Rau sa gole yani i tuba o Ellie kei Peppa vata kei Mami kei Papi. Sa tau bi vakalevu sara na uca. Sa vakatobuicutaki na nodrau iviu na cagi. Sa vaka me sa yalolailai mai o Ellie.
“Na cava beka me daru cakava?” A taroga o Ellie. Sa dredre na taubale ki na basi ni sa rui kaukauwa na uca kei na cagi.
“Me tou sa taura ga e dua na tekisi,” a kaya o Papi.
“Vakasama vinaka,” e kaya o Mami. “Tou lako.“
E ratou sa taubale sobu yani ena gaunisala sa luvu toka. A sega ni dua na tekisi se motoka a bau laurai. Na panadería (vale ni buli madrai) mada ga sa sogo.
Ni ratou sa voleka yani. Na ikelekele tarava a lala talega.
“Oilei!” A kaya o Peppa.
“Está bien. Sega na leqa” a kaya o Ellie. “Ena tiko e dua. Dou se bera ga ni raica.”
E ratou sa voleka yani. Na ikarua ni ikelekele a lala talega.
“Sa qai cava beka?” a taroga o Peppa.
“Au kila,” a kaya o Ellie. “Me tou masu.“
E ratou sa qai vakasolokakana na goneyalewa ena masu. “Nuestro Padre Vakasilesitieli, yalovinaka ni vukei keitou me keitou raica e dua ga na tekisi me rawa ni keitou laki lotu nikua. Keitou sa tovolea tiko me keitou digitaka na dodonu, ka sa vakadredretaka tiko na uca oqo. En el nombre de Jesucristo, amén.” A se vulica tikoga o Ellie na vosa vaka-Sipeni, sa qai cokotavata na vaka-Valagi kei na vosa vaka-Sipeni.E ratou taubale tale vakalailai. Sa lala tale tu ga na ikelekele tarava.
“E vinaka beka ga me tou sa lesu tale i vale,” a kailavaka yani o Papi ena cagi.
“Sa suasua na yavadatou!” a kaya o Mami.
“Me tou toso tale yani vakalailai e liu,” a kaya o Ellie. “Tou na gadreva ga e dua na tekisi.”
Oqo sa ratou qai raica rawa na iotioti ni ikelekele.
E kea, ratou sa raica ena kena cina drokadroka, e dua na tekisi.
Rau sa lade sara o Ellie kei Peppa ki na tekisi. Sa vukei rau o Mami me qusi na uludrau. “Vosoti keitou ni keitou sa vakasuasuataka na nomuni idabedabe,” a kaya o Papi vei draiva.
E ratou a yaco yani ki valenilotu ka kidavaki ira na nodratou itokani ena besos kei na abrazos (iregu kei na imoko).
“Au sega ni vakabauta ni tou a kunea rawa e dua na tekisi,” a kaya o Mami. “¡Que suerte!”
“A sega ni ka ni laki,” a kaya o Ellie. “Keirau a masu kei Peppa me vukei kedatou na Tamada Vakalomalagi me tou gole ki lotu. Ka sa rogoca mai o Koya!
Droini mai vei Patricia Geis