Liutaka o Braden na sala
O dauvolaivola e vakaitikotiko e Kalifonia, Amerika
Na italanoa oqo a yaco mai Louisiana, Amerika.
Na bula ena vanua ni susu korokotaile e totoka dina. Ia e dua na ka a yali.
“Mo nodra ivakarau era sa vakabauta” (1 Timoci 4:12).
Erau kauta o Braden kei Ta na vokete bibi ni kedra kakana na korokotaile ki na vanua ni nodra vakani. Era vude mai ki delaniwai na uludra ka ra toso yani vei rau. Ni rau sa gole yani o Braden kei Ta ki na vanua ni vakani, eso na karokotaile era sa dalaga tu.
Ia a sega ni rere o Braden. Na cakacaka vata kei ta ena vanua ni susu korokotaile e vinaka duadua.
“Na gauna ni veivakani!” A kaya o Braden. A taura cake e dua na iluku kakana ka viritaka yani ki wai
Chomp. Chomp. Vakere.
Eso na karokotaile era ciqoma ga i macawa na kakana. Eso era waruma ena gauna era tau yani kina ki wai. Erau viritaka tikoga yani na kakana o Braden kei Ta me yacova ni sa lala nodrau vokete.
“Vinaka vakalevu nomu vukei au,” a kaya o Ta. “Tou lako. Sa voleka sara ni rau lako mai na daukaulotu.”
Eratou sa tekivu veitalanoa tiko kei ira na daukaulotu ena vica na vula sa oti o Braden kei na nona matavuvale. E taleitaki rau sara na daukaulotu o koya! Ka dau taleitaka me vulica na veika me baleta na Lotu. E lewe ni Lotu o Ta, ia a sega ni dau lako vakalevu sara ki Lotu. Erau se bera vakadua ni bau papitaiso o Na kei Braden.
“Macawa sa oti o lalawataka mo wilika na Mosaia 18,” e kaya mai o Sister Cox ena yakavi oya. “Qai vakacava oya?”
Erau veiraici o na kei ta ka vakanomodi toka vakalailai. “Keirau osooso ena macawa oqo,” a kaya o Na.
“Au sa wilika!” A kaya o Braden.
“Totoka Dina!” E kaya o Sister Blood, ka biuta cake na ligana me dua na isabi e cake. “Na cava o vakila ni o wilika oti?”
A dua na matadredredre levu mai vei Braden. “Vinaka sara. Kau a masulaka na papitaiso. Au sa vinakata dina.”
“Totoka sara oqori! Au kila ni sa marau sara vakalevu na Tamada Vakalomalagi, “e kaya o Sister Cox. A vuki vei tinai Braden. “E vakacava na nomu nanuma?”
“Au sega mada ni kila. Au nanuma niu gadreva e levu cake na gauna,” e kaya o Na.
A rarawa toka vakalailai o Braden ena vo ni lesoni. A diva o koya me rau lewe ni Lotu na nona itubutubu. Ka vinakata o koya me lewe ni Lotu talega!
Ni ratou sa biubiu na daukaulotu, a tukuna vei rau na nona itubutubu ni sega ni veiwalitaka na veika a tukuna. “Au Vinakata Meu Papitaiso. Ka vakatabuicegu tu o Braden. “Au vinakata dina me papitaisotaki au o Ta.”
Ni oti e dua na gauna, a vosa mai o Ta. “Au vinakata dina talega o ya.”
E vagagalu toka o Na. “Tou masulaka sara.”
A tekiduru vata kei na nona matavuvale o Braden ka kerea vua na Tamada Vakalomalagi kevaka e dodonu me papitaiso o koya kei tinana. A vakila o koya na katakata kei na loloma.
Ena vica na macawa ka tarava, a wilika o Braden na ivolanikalou ka masu ena veisiga. Taumada, e dau tarogi rau na nona itubutubu kevaka erau na masu ka wiliwili vata kei koya. Ia sega ni dede sa tekivu me rau vakatarogi koya. Ni rau dau vakania tiko na karokotaile kei tamana, erau na veivosakitaka na ivolanikalou se na veika erau vulica ena Lotu. Erau na veitalanoataka vata kei Na na lesoni ni kaulotu. Ena veisiga, erau na rairai mamarau cake o Na kei Ta.
Ena dua na siga ena dua na lesoni vata kei rau na daukaulotu, e kaya kina o Na na vosa a waraka tu o Braden: “Au vinakata meu papitaiso.”
Ena vica na macawa ka tarava, a vakila o Braden ni sa ciri voli ena veio.
Sa mani yaco mai na siga me rau sa papitaiso kina o Na kei Braden. Ni sa cabe cake mai wai o Braden, a vakila na loloma ni Tamada Vakalomalagi me baleti koya kei na nona matavuvale. A mokoti Ta vakaukauwa sara.
A mokoti Braden tu o Ta ka vakasolokakanataka, “vinaka vakalevu na nomu ivakaraitaki vinaka kei na nomu dau vukei keirau. Au lomani iko.”