Lokataki e Tuba!
E vakaitikotiko mai Utah, Amerika, o koya e vola.
Na italanoa oqo e a yaco mai Central Hungary, e Hungary.
E rawa beka ni veivuke o Ema.
“Mo vakarorogo vua na Yalotabu ni na tuberi iko ena sala dodonu” (Vunau kei na Veiyalayalati 11:12).
A lade baleta o Ema na kakaca ena sala simede. A totoka tu na draki, ena siga o ya. Erau a gole tiko kei Nau ki na sitoa.
“Nau, e vakacava beka na yawa ni matanisiga?” a taroga.
“Au sega ni kila,” a kaya o Nau.
A dagava cake o Ema na lomalagi. “O nanuma beka ni rawa ni dua na rokete ena lako rawa ki na matanisiga? O nanuma beka ni katakata cake mai na tibiniliva? O nanuma beka”
Dredre o Nau. “Na nomu taro sa dredre cake tikoga!”
A dredre talega o Ema. E levu na nona vakatataro. E dau saga nona vinaka duadua o Nau me sauma. Oqori e dua na vuna e dau taleitaka kina o Ema me taubale vata kei Nau.
A rai wavokita na nona itikotiko o Ema. Era ciciva sobu na veigaunisala vatu na motoka. Era vodo na tamata ena basikeli. E vuqa na tamata era a taubale talega.
Sa qai rai mai o Ema ki na tai ni gaunisala. A dabe toka e dua na goneyalewa lailai ena ikabakaba e tautuba ni dua na vale. E vaka me tagi tiko.
A vakamalua sobu o Ema. E dodonu beka me tuvakadua ka veivuke? De rairai via tiko duadua beka na goneyalewa. Ena so na gauna dau via tiko duadua o Ema ni sa rarawa.
A cegu ena taubale o Ema. E vuqa na gauna a vinakata o Ema me vosa vua e dua ni gadreva na veivuke. E rawa beka ni veivuke o koya!
A dreta na ligai Nau. “Nau, raica. Au vakabauta ni gadreva na goneyalewa oya na veivuke. ”
A rai kosova na gaunisala o Nau. “Au nanuma ni o dina.”
A taura na ligai Nau o Ema ni rau takosova na gaunisala. A cabeta yani na ikabakaba ki na vanua e dabe toka kina o goneyalewa. “Bula,” a kaya o Ema. “O gadreva beka na veivuke?”
A ceru cake na goneyalewa lailai ka raici rau yani. A mokota toka na duruna e ligana, ka damudamu ka vuvuce na matana.
“Au sa lokataki tu e tautuba ni noqu vale.” A vakatabuicegu. E sautanini ka malumu na domona. A tekiduru vakamalua o Ema me rogoci koya vakavinaka.
“Au sega ni rawa ni wilivola,” a kaya na goneyalewa. “Au sega ni kila se ibulukau cava meu tabaka me rawa niu curu i loma.”
A raica yani o Ema na lalaga ena taudaku ni vale. E levu toka na kena ibulukau lalai. E dua na yaca e tiko ena ibulukau yadua. E toka tikiva na ibulukau e dua na gusunivosa.
“O cei na iotioti ni yacamu?” A taroga o Ema.
“Schneider,” a kaya na goneyalewa lailai.
A wilika o Nau na yaca ena ibulukau yadua me yacova ni sa raica e dua na “Schneider.” A tabaka o koya.
Buzz!
E rogo levu na kena itabataba. Qai rogo mai e dua na domo ena gusunivosa.
“O keitou na Schneiders. Meu na vukei iko beka vakacava?”
A vosa o Nau ena gusunivosa. “Bula! Keirau tiko kei luvequ yalewa e tautuba kei na dua na goneyalewa lailai ka kaya ni sa lokataki.tu e tuba.”
A tucake o goneyalewa ka cici yani ki na gusunivosa. “Nau,” e kaya o koya, “Au sega ni rawa ni wilika na ibulukau meu lesu rawa mai kina, era qai vukei au na tamata oqo!”
E kurabui na rorogo ni domo ena gusunivosa. “Leni! Au nanuma ni o tiko ena nomu rumu! Kua ni lomaleqa. Au sa lako sobu yani. ”
Ni oti e vica na sekodi, a cici mai tautuba e dua na marama. A cici cake na goneyalewa ka mokoti koya.
A vuki na marama vei Ema. “Vinaka vakalevu na nomu vukea na noqu Leni lailai!”
A dredre o Ema. “E rawarawa na veivuke.”
Erau yaloyalo ena vakamoce ka vakasuka yani ki na ikabakaba. A raragi taucoko na yagoi Ema. A vakasamataka e dua tale na taro me baleti Nau.
“E rawarawa na nona vukei na goneyalewa ko ya. Na cava na vuna au vakila kina na marau? ”
E boboka na ligai Ema o Nau. “Oqori na Yalo Tabu e tukuna vei iko ni ko cakava e dua na digidigi vinaka.”
A dredre o Ema. E marau ni a tu vakadua me veivuke.