Braden e Kaira te Kawai
E maeka te tia korokaraki i California, USA.
E riki te rongorongo aei i Louisiana, USA.
Te maiu n aia tabo ni kawakinaki alligator e tamaroa. Ma teuana te bwai ae bua.
“Ma ko na riki ba aia tia kakairi aomata aika onimaki” (1 Timoteo 4:12).
Braden ao Dad a uoti bwaketi n amwarake ibukin kanaia alligator aika tinebu nakon te taoki ni kamwarake. A otirake atuia alligator ao a mwaing ni karaurau nakoia. Ngke a roko Braden ao Dad n te nne ni kamwarake, tabeman alligator a kaurei wiia.
Ma Braden e aki maaku. Te mwakuri ma Dad iaon aia tabo alligator bon te bwai ae moan te tamaroa.
“Te tai ni kamwarake!” E taku Braden. E tabeka rake te buun ae on n te kamwarake ao ni kakibai nakon te ran.
Chomp. Chomp. Splash.
Tabeman alligator a karekei amwarake n te eea. Tabeman a kakerui ngke a bwaka iaon te ran. Braden ao Dad a teimatoa ni karenakoi amwarake ni karokoa a bane kanoan bwaketi.
“Ko rabwa ibukin buokau,” e taku Dad. “Ti a nako. Ae a na roko mitinare n te tai ae waekoa.”
A tia ana utu Braden ni moana aia marooro ma mitinare tabeua te namwakaina n nako. E tangiriia mitinare! Ao e tangiria n reirei taekan te Ekaretia. Dad bon kaain te Ekaretia, ma e tuai n nanako n taromauri. Mom ao Braden a bon tuai man bwabetitoaki.
“N te wiiki ae nako ko katea te kouru bwa ko na wareka Motiaea 18,” e taekinna Titita Cox n te tairiki anne. “E uara waakin anne?”
A uaia n itaramata Mom ao Dad ao n aki kakarongoa inanon tabeua te tai. “Ti tabetabe n te wiiki aei,” e taku Mom.
“I warekia!” E taku Braden.
“E tamaroa!” E taku Titita Blood, ma ni uaia ni kerake ni katekeraoia ni kabooi baia ibukin te high five. “E kanga am namakin imwiin ae ko warekia?”
E anga te moangare Braden ae bubura. “E rangin raoiroi. Ao I tataro bwa n na bwabetitoaki. I bon rangin n tangiria.”
“E rangin n tamaroa anne! I ataia bwa e na rang kakukureia Tamara are i Karawa,” e taku Titita Cox. E rairaki nakon tinan Braden. “E kanga am namakin ibukina?”
“I tuai n rangi ni koaua iai. I taku bwa N na tangira riki au tai,” e taku Mom.
Braden e namakina teutana te nanokawaki n tain te reirei aei. E kantaningaia ana karo bwa a na kaaina te Ekaretia. Ao e tangiria bwa e na riki bwa kaain naba te Ekaretia!
Ngke a nako mitinare, e tuangiia ana karo e nanona te bwai are e taekinna mai imwaina. “I tangiria raoi ni bwabetitoaki. Ao …” Braden e ikerake n ae korakora. “I bon tangiria bwa e na bwabetitoai Dad.”
Imwiin te tai ae aki maan, e taetae Dad. “I bon tangira naba ni karaoa anne.”
E aki karongoa Mom. “Ti a tataroakinna.”
Braden e katorobubua ma ana utu ao ni butia Tamara are i Karawa ngkana ngaia ma Mom a riai ni bwabetitoaki. E namakina te kukurei ao te tangira.
Ibukin tabeua wiiki ake imwiina, Braden e wareki booki aika tabu ao n tataro ni katoa bong. N te moan tai, bon ngaia ae tutuangiia ana karo ngkana a na kona n tataro ao ni wareware ma ngaia. Ma n te tai ae waekoa, a moanna n titirakinna. Ngke ngaia ao Dad a kamwarakei alligators, a maroroakina taekan booki aika tabu ke te bwai ae a reiakinna n te taromauri. Ngaia ma Mom a na maroroakin taekan aia reirei mitinare. Ni katoa bong, Mom ao Dad a taraa ni kukurei teutana.
N te bong teuana n tain te reirei ma mitinare, Mom e taekin taeka aika e a kaman kaantaningai Braden: “I tangiria ni bwabetitoaki.”
Ibukin tabeua wiiki ake imwiina, e namakinna Braden ae kanga e beibeti iaon naang.
N tokina, bon aia bong Mom ao Braden ni bwabetito. Ngke e otinako Braden man te ran, e namakina ana tangira Tamara are i Karawa ibukina ao ana utu. E inga ma Dad n ae korakora.
Dad e taua ni kaniia Braden ao e wirikiriki, “Ko rabwa ibukin am banna ni katooto ae tamaroa ao ni buokiira. I tangiriko.”