Koreaki Iroum
N Na Manga Noora Riki Tariu
Iroun Isabella S., age 11, Utah, USA
N te wiiki are imwiina bon ana koronririki tariu Gabriel. E na tia ni koro itiua, ma e boo ao ni mate uoua te ririki n nako. N te Moanrinan ti anenea “Gethsemane (Ketetemwane).” A rang ni bebete taekana ao ni uaana taekana. E kaona te ruu ma te Tamnei.
Imwiin te anene, Titita Webster e kaota ana koaua n Ana Mwakuri ni Kamaiu Iesu Kristo. E kaona riki te ruu te tamnei n ana koaua Titita Webster. Imwiina e taekina taekan tarina ae uarereke riki ngke e mate tabeua ririki n nako. E kauringai taekan Gabriel, ao I moanna ni kuri n tang. I uringnga ngke I taua Gabe n te kabanea n tai. I nanokawaki, ma I namakina naba te rau.
E taekinna Titita Webster arona ni kukurei ngke e a ataia bwa e na manga noora riki tarina. E taekinna ae e ataia bwa ngaira ni kabane ti na manga noriia aika ti tangiriia aika a tia ni mate.
Imwiin te Moanrinan I rabwata Titita Webster n inga mangaia. Ti uaia n tang inanon tabeua te miniti. Ti kona n namakina korakoran te Tamnei. E tuangai bwa n na manga noora riki tariu ae uarereke. E taekinna bwa Ana Mwakuri ni Kamaiu Iesu Kristo tiaki ti ibukiia aika buakaka ma n tangira te rairannano ma nakoia naba aika maraki ni kawai riki tabeua. E titiraki bwa tera te bwai ae I rang n ururingnga mairoun Gabe, ao I kangai bwa I rangi n ururinga aron moangarena.
I tuanga Titita Webster bwa I a tia n nanokawaki bukina bwa bon ana koronririki Gabriel n te wiiki anne ao I bon rangi n tangiria ni kan ataia bwa N na manga noora riki tariu. E tuangai bwa rannimata aika tinako bon rannimata ni kimwareirei. I kona n namakina te Tamnei, ao I ataia bwa te bwai ae taekinna e bon koaua. I bon koaua bwa N na manga noora Gabriel, ao anne are e kakukureiai. I tangiria. I ata anne bukina bwa e tangirai Iesu Kristo, E anga Maiuna bwa I aonga ni manga noora Gabriel.