E Rokanaki!
E maeka te tia korokaraki i Utah, USA.
E riki te karaki aei i Hungary Nuka, Hungary.
Tao e kona Emma n ibuobuoki!
”Kawenea am onimaki n te Tamnei are e kairiiri nakon karaoan te raoiroi” (Reirei ao Berita aika Tabu 11:12).
Emma e kibakibari atiibu ake a kuraeki ni mataniwiin te kawai n nakonako. Bon te bong ae oota, man n riringa. Ngaia ao Mama a nakonako nakon te titoa ni bwai.
“Mama, raroara taai?” e titiraki.
“I aki koaua iai,” e taku Mama.
Emma e kamakikiia matana are teuana ni kataia n taraa karawa. “N am iango e kona te rokete n nakon taai? N am iango e kabuebue riki taai nakon te oota? Ko taku n am iango …”
E ngare Mama. “A moanna ni matoa ma ni matoariki am titiraki!”
E ngare naba Emma. E rangi ni mwaiti ana titiraki. E karaoa ana kabanea n tamaroa Mama ni kaekai. Anne bukina teuana ngkai e tangiria Emma n nakonako ma Mama.
Emma e taraia kaain rarikina. A buti taekitii rikaaki nakon kawai te atibu. A buti irarikira aomata n aia bwatika. A mwaiti naba aomata aika a nakonako.
Ngkanne Emma e taraa nanon te kaawa. Te ataeinnaine ae e tekateka iaon te kaintamwarake itinanikun ruun te auti. E taraa n ae tang.
E karaurau Emma. E aki riai bwa e na tei n ibuobuoki? Tao te ataeinnaine e tangiria ni katukaki n tingaia. N tabetai Emma e tangiria n tiku n tingaia ngkana e nanokawaki.
Emma e toki n nakonakona. N angiin te tai Emma e tangira temanna bwa e na taetae nakoina ngkana e kainnanoa te ibuobuoki. Ma tao e na kona n ibuobuoki!
E taua bain Mama. “Taraia, Mama. I taku n au iango bwa e kainnanoa te ibuobuoki te ataeinnaine arei.”
Mama e taraa nanon te kawai. “I taku n au iango bwa ko eti.”
Emma e taua bain Mama ngke a rinanon te kawai. E nakonako nakon te kaintamwarake are e tekateka iai te ataeinnaine. “Mauri,” e taku. “Ko tangira te ibuobuoki?”
E maikeike n tang te ataeinnaine ao e tararake n taraia. A kabaeaki baina nakon bubuan waena, ao matana a uraura ao n ikoaki.
“I … I rokanaki itinaniku man au ruu.” E ikerake. Bwanaana e ruru ao e aki karongoa. E katorobubua Emma irarikina bwa e aonga n ongo raoi ana taeka.
“I aki kona ni wareware,” e taku te ataeinnaine. “I aki ataia bwa tera te bwatin ae n na riai n taonna bwa iaonga n rin.”
E taraa te oo Emma itinanikun ruun te kateitei. A rangi ni mwaiti bwatin aika uarereke. Ni katoa bwatin ao iai aara iaona. Irarikin taian bwatin ao iai te tibiika.
“Tera am kabanea n ara?” E titiraki Emma.
“Schneider,” e taku te ataeinnaine.
Mama e wareki ni kabane taian bwatin ni karokoa e kunea teuana ae kangai “Schneider.” E taonna.
Buzz!
Te bwatin e karika te karongoa ae moan te korakora. Imwiina e ongo te bwana ae aki rangi n itiaki rinanon te tibiika.
“Aio te Schneiders. N na kanga ni buokiko?”
Mama e taetae nakon te tibiika. “Mauri! Natiu te aine ao Ngai ti mena itinaniku ma te ataeinnaine ae taku bwa e roka mai itinaniku.”
E waekoa n teirake te ataeinnaine ao e biri nakon te tibiika. “Mama,” e taku, “I aki kona ni wareka te bwatin are n na kona n rin iai, ao aomata aikai a buokai!”
Te bwana iaon te tibiika e bwanaa n rangi ni mimii. “Leni! I taku n au iango bwa ko mena inanon am ruu! Tai raraoma. Ae I a ruorikaaki naba ngkai.”
Imwiin tabeua te teekan, e roko te aine ni biri itinaniku. E birirake te ataeinnaine ao e rabwatia n inga mangaia.
E rairaki te aine nakon Emma. “Kam rabwa ibukin ami ibuobuoki nakon Leni!”
Emma e ngare. “E bon bebete te ibuobuoki.”
A kabo ni baia ao n nakonako n oki nakon te kai n tamwarake. Rabwatan Emma ni kabane e namakina te aabue. E iangoa riki teuana te titiraki ibukin Mama.
“Buokan te ataeinnaine arei e bon bebete. Bukin tera I rangi n namakina te kukurei ibukina?”
Mama e koona bain Emma. “Anne te Tamnei ae Raoiroi ae tuangako bwa ko karaoa te rinerine ae raoiroi”
Emma e ngare. E kukurei bwa e tei n ibuobuoki.