Bwaeoniia ni Katoai Aba
Julia Mavimbela
Te Tia Kairiiri n te Komiuniti i Africa Maiaki
“E roko te tangira ti man kabwarakin aia bure tabeman.”
Julia e kaoa ramwana. Imwiina e anaa ana tiabora ao e a moana ana keniken. N te tai aei, te tano are e katobibia bon te tabo ni maange. Ma n te tai ae waekoa e na riki bwa te onaroka ae tikiraoi.
Te tai aei e bon kangaanga ibukiia aomata aika Bwabwata i Africa Maiaki. Tuua ikekei a kamaenakoia aomata aika i Bwabwata ao aika a Mainaina. A mwaiti i Bwabwata aika a tia ni kanakoaki man mweengaia ma te matoa ao ni maeka n taabo aika a raroa ma aomata aika Mainaina, ao aki kona ni karaoa te rinerine. Iai te mwakuri n iowawa ae karaoaki n te kaawa are e maeka iai Julia, ao a kainaki reirei ibukina. N tabetai e kakamaku te mena itinaiku.
Ma anne e aki katoka Julia. E tangiria ni karaoa te bwai ae e na uota te raoiroi nakon ana komiunitii. Anne bukina ngkai e a moana ana onaroka.
Tabeman ataei a npora Julia ni mwakuri. “Ti kona n ibuobuoki?” a titiraki.
“Kam kona,” e taku Julia. E anganiia n tatabemaniia te tiabora. E kaotia nakoia aron kamarauan te tano ao ni kanakoi uteute.
“Ti a kena te tano ae mao, ao n nooria bwa tera te uaa ae kona n anganiira, ” e taku. “E roko te tangira ti man kabwarakin aia bure tabeman.”
A nako wiiki, ao a mwaiti riki kaai aika rikirake. Aomata tabeman a roko ni mwakuri n te onaroka. A koutii uteute aika abwabwaki. A uniki riki koraa. A teboki taian aroka. E karika kukurein Julia ngke e nooria aomata aika mwaiti n ibuobuoki.
N te bong teuana e kaitibo Julia ma mwaane aika uoman. E miimi Julia bukina bwa e kangaanga rokoia aomata aika Mainaina nakoia kaain rarikina. A taku bwa ngaiia mitinare. E kaoiia bwa a na tibwaua te rongorongo inanon mweengana.
Ngke natin Julia te mwaane e ongo ae a na roko, e bon kubanako. “Bukin tera ko kaoiia?” e taku. “Bukina bwa a Mainaina. E bon aki mano.”
Ma e onimakiniia mitianre Julia. “Mwaane aikai a kaokoro,” e taku Julia. “A tataekina te rau.”
Ngke a roko mitianre, Julia e butimwaiia ni kariniia. Temanna mai irouia e kinaa te tamnei ae mena iaon te tiaebu ietan nnen te ai. Bon man ana mare Julia.
“Antai arei?” e titiraki te mitinare, ao e kotea te tamnei.
“Kainabau, John.” Julia e taraa naano. “E mate ngke e kurati n te kaa.”
E katoutoua atuna te mitinare. “Ti kakoaua bwa a kona utu ni ikotaki n akea tokina, riki imwiin mateia.”
Namakinan te rau ae e onoti e roota Julia. E kukurei n reirei ana babaire te Atua ao n reitinako ni kaitibo ma mitinare. E rikirake tangiran te euangkerio inanon Julia, kanga ai aron te koraa are e unikaki ao ni bwebwerake kanga aron te aroka inanon ana onaroka. E aki maan ao e iangoia bwa e na bwabetitoaki.
N te taromauri, Julia e kaitibo ma aomata aika boou. Tabeman a Bwatabwata. Tabeman a Mainaina. Ma a bane ni beku ao ni bootaki n reirei.
Julia e kaotia nakoia ataei n te taromauri bwa a na kanga n ibuobuoki n ana onaroka. “Ti riai ni maraurau inanora, n aron te tano aei,” e taku. “Ti riai ni karaoa te tabo ibukin te euangkerio inanora. Ti riai ni karekea te tabo ibukin te tangira.”