Te Butiboro ao te Tabati
E riki te rongorongo aei i Honduras.
“Te Kaonobong bon te bong ae onoti. Bon te bong ae ti katauraoi iai nakon te Tabati” (Aia Boki n Anene Ataei, 196).
Waaki ni kakukurei aika e karaoi n te Kaonobong Samuel e karika ana kangaanga iaon te Tabati.
Samuel e tangiria ni mataku n te terewition ma Papá, riki ni boong aika Kaonobong. E mwakuri korakora Papá inanon wiiki ni kabane. Ma n te Kaonobong, Mamá e kukana te pastelitos de piña (te keeke ae renganaki ma te pineapple) ao a bane ni mataku n te TV.
N tairikin te Kaonobong teuana, a baireia bwa a na mataku n te partido de fútbol (te takakaro n te butibooro). Ma e waeremwe ni waaki te takakaro, e na kabanea te tai ae abwabwaki. Ngke e bane te moan n itera, te bui bon 0-0. E teimatoa Samuel n tangiria ni kan mataku. Ma e aki kona ni katoka te aa ni kanimatu.
“Ai te tai ni matu, Samuelito,” e taku Mamá ma te taeka ae rau. “Ko kainnanoa teutana te matu bwa ko aonga n utimwaaka nakon te taromauri ningabong.”
“Ma Mamá,” e taku Samuel. “Bon uoua tiim aika moan te nakoraoi i Honduras!”
Papá e taraa te tai. “E raoiroi. Kam kona ni waaki nako ni mataku. Ma kam kainnanoia ni kautimwaakai ngkami ningabong iaon te tai.”
E a moanna n roko kakamatakun te takakaro n te kauoua n raun. E a bon uti matan ngkai Samuel! Ngaia ao Papá a uaia ni kaungaunga. Te moan e oreaki te booro n te koona. Ma e reke iroun te kouru n akea ana kaangaanga. Teuana te tiim e rin ana booro, ao imwiina are teuana. Imwain ae ataia Samuel, ao e a toki naba te takakaro. E toki ma taian roro aika titebo 1-1.
N te ingabong are imwiina, e a bon rangi ni kua Samuel are e aki tangiria n teirake man ana kainiwene. Ma e ataia bwa te nako n te taromauri e bon kakawaki.
N tain te bootaki n toa, ao e a roko te kanimatu iroun Samuel. E teimatoa atuna ni bwaka ao ni manga kaetia bukina bwa e rangi ni kekeiaki n aki kan matu. E ororoia Mamá ni buokia bwa e na aki matu. Ma e bon rangi ni kua ngaia are e aki ongora nakoia taan taetae. “I taku n au iango bwa am Kaonobong e a bwakara am Tabati,” e taku Papá.
N te Moanrinan, ana tia reriei Samuel e taekina taekan kawakinan te Tabati bwa te bong ae tabu. E titiraki bwa tera ae a kona ni karaoia ataei ni karika te bong ae Tabati bwa e na onoti. E iango Samuel tabeua te miniti. Imwiina ao e kangai, “Moan taai ni matu n te Kaonobong!”
Ngke a okira mweengaia imwiin te taromauri, e taetae Samuel nakon Mamá ao Papá. “I kukurei ni mataku n te takakaro ngke tairiki,” e taku Samuel. “Ma I riai ni moantaai ni matu. I taku n au iango bwa ti riai ni kabongana mwakoron te Kaonobong ni katauraoi ibukin te Tabati.”
“I kariaia,” e taku Papá.
E katoutoua atuna Mamá. “Ngai naba.”
Te Kaonobong are imwiina, manga iai te takakaro n te TV.
“Tera ae ti riai ni karaoia n te tairiki aei?” E titiraki Papá. “E a manga bwakanako naba te tai.”
“Ti kona ngkanne ni mataku n te tamnei,” e taku Mamá.
“Ke ti kona n nako ibukin te nakonako,” e taku Samuel.
“E raoiroi te nakonako iroum?” Papá e titirakina Mama.
“E koaua,” e taku Mama. “E rangi n tikiraoi te bootaki n utu.”
“Ao ngkana ti okira mweengara,” e taku Samuel, “ti na kona ni bane ni karekea te matu ae raoiroi n te tairiki. Ngkanne ti na tauraoi ibukin te Tabati!”