Kuuna ao Buroburon te Toobu
E ngarengare Alice ngke e iangoa rongorongon Beretitenti Kimball n anene ma te kao.
E itiia te buuna te nuto nakon ana raurau mwanena. E tangiriia mwanena ma tarina aika uarereke—niiman mwaitia! E kakukurei buokakiia. E matoatoa te riki ni karimoa n taai tabetai. Ngke e a manga roko te teei ae uarereke ni mwengaia, e bati riki tabena. E mwaiti te bwai ae riki n ana auti!
“Tera reireiam ae reke n te taromauri n te bong aei?” E titiraki Tamana.
“Iesu!” Tarin Alice ae uarereke riki ae Sarah e taku. E katakanana ana raurau n te aboro ae kamantaki.
E moangare Alice. E rang kakateke Sarah. Ao n rang n aki tarabwai naba.
“I reiakina taekan Beretitenti Kimball …” e taku Alice. Ma e wewete tinana man te ruu are teuana. E kainnanoa ana ibuobuoki Tamana n taraa te teei.
“Taningaai teutana,” e taetae tamana. “I a manga oki.”
Ngke e ibuobuoki Tamana nakon Tinana, Alice e waaki ni buokiia kaain ana auti. E bwaro te mwangko ni miriki iroun Eric. E kaitiakia Alice. E tang Nei Sarah. E rabwatia Alice. Clara e tangira riki kanana te nuuto. E itia te nuuto Alice.
Ngke e oki tamana, e korakora te beroro ao te mangaongao n te tabo n amwarake. E kantaningaia Alice bwa tera ngke e uarereke riki te beroro.
N tokin te tai, a bane n tia ni katawanou. Alice e buokiia tarina ma mwanena n uoti aia bwainamwarake nakon te tabo n ire bwainamwarake. E a roko n te roro are e kona n tararuai bwainamwarake. Ngaia are e tabena ngkai te ire bwainamwarake. E kanoa te tingki ma te ran ae mena n toobu.
E uara ngke bon akea tabeu, e iango Alice. Ma e uringa ana reirei n te Moanrian n rongorongon Beretitenti Spencer W. Kimball. Ngke e uarereke, iai naba tabena. E tatangiria n anene n ana tai n karekea te miriki man te kao!
E iango Alice n aron Beretitenti Kimball n anene ma to kao. E ngarengare.
Ngkanne e a reke ana iango. E kona ni katotoonga te burabet! E anaa ana boki n anene ao e kaukia nakon te moan kuna.
E na riai te boki n tiku n uki. E katuka ana boki i aon te wintoo. E taona iteran ana boki n nnen te aroka. Ao e taona are iterana n te mwangko ae tinebu. E a kona raoi ngkai n noria man te tabo are e mwakuri iai.
I nanon irean taian boora, mwangko ma buun, e anene. E mwengaraoi n buroburon te ran toobu. Ao e kukurei n kuuna ake e anenei.
N te bong are imwina, e manga anene naba Alice. Ao te bong are imwina. E kataia ni kamatenanoi taekan anene aikai. Ngkannne e a manga nakon are imwina. E a rabaku n ananei kuuna aika boou! E a tia n reirei katangan te biano i nanon tabeua te ririki. Ngkana e kabi een te kuna, e kataia ni karekea eena man te biano.
Ao akea ana kangaanga Alice n te irei bwainamwarake. N tabetai e kakukurei karaoana! Ibukina bwa e kakukurei te anene ao iangoan Iesu. Reiakinan kuuna aika boou kanga ai aron karekean raoraom ae boou. E ngae ngke e kaberoro rarikina, anene n taromauri a bon anganna naba te rau.
Kamataata n te tamnei iroun Erin Taylor